" မေတ္တာထက် အစွမ်းထက်တဲ့တောင်ဝှေး..."

ဘာဘဲတွေ့တွေ့ ချိုနဲ့ဝှေ့လိုက်မယ်...

  တစ်ခါတုန်းက ရွာတစ်ရွာမှာ မေတ္တာ 

အမြဲပွားနေတဲ့ဆရာတော် တစ်ပါးရှိပါတယ်။

တစ်နေ့တော့ ထုံးစံအတိုင်း ဆရာတော်ရယ်၊ 

ကပ္ပိယဖိုးသူတော်ကြီးရယ် ရွာထဲကို 

ဆွမ်းခံကြွဖို့ ပြင်ပါတယ်။

ဆရာတော်က ကျောင်းက ထွက်ကတည်းက မေတ္တာပွားလာတာပါ။

ရွာမရောက်ခင် လယ်ကွင်းထဲရောက်တော့ ကျွဲတစ်ကောင်က

ဆရာတော်ဆီကို ခွေ့ဖို့ဒေါသတကြီး ပြေးလာပါတယ်။

ဆရာတော်ကတော့ သူ့ဆီပြေးလာနေတဲ့ ကျွဲကြီးကို အာရုံပြုပြီး 

“ကျွဲကြီး ကျန်းမာပါစေ၊ ချမ်းသာပါစေ”ဆိုပြီး မေတ္တာပဲ ပို့ပေးနေပါတယ်။

ကျွဲကြီးက နီးသထက် နီးလာပါပြီ။

ဆရာတော်က မေတ္တာပို့နေတုန်းပါ။

ရှေ့နှစ်လှမ်း သုံးလှမ်း အကွာလောက်လည်း ရောက်လာရော 

ကပ္ပိယဖိုးသူတော်ကြီးက ပါလာတဲ့တောင်ဝှေးနဲ့ပြေးပြီးတော့ 

ကျွဲကြီးရဲ့ခေါင်းကို အားရပါးရ ရိုက်ထည့်လိုက်ပါတယ်။

ဒီတော့မှ ကျွဲကြီးလည်း တစ်ခါတည်း နောက်ပြန်လှည့်ပြေးသွားပါတော့တယ်။

ဒီတော့ ဆရာတော်က ဖိုးသူတော်ကို ပြောလိုက်တာက…

“ ဖိုးသူတော်ကြီးရယ်… ငါ့မေတ္တာထက် 

နင့်တောင်ဝှေးက ပိုပြီး အစွမ်းထက်နေပါလား” လို့။

+++++++++++++++++++++++++++

ကျနော် မစ်ချီဂန် (အမေရိကန်) ရောက်တော့ ညရောက်လာမှာ
 ကြောက်တဲ့စိတ်ဖြစ်ပေါ်လာမိပါတယ်။

အကြောင်းက ကျနော်နေတဲ့အခန်း (အပတ်မန့်(apartment)က 
 ကြမ်းပိုးတွေ သောင်းကျန်းလွန်းလှတာပါပဲ။ 

သတ္တဝါကို မသတ်ချင်တာနဲ့ မေတ္တာပို့ကြည့်ပါတယ်။

 ကြမ်းပိုးက မေတ္တာပို့တာကို ဂရုမစိုက်ပါဘူး။ 
ညရောက်လာရင် အင်နဲ့အားနဲ့ လာပြီး ကိုက်တော့တာပါပဲ။ 
တစ်ကိုယ်လုံးလည်း ဒဏ်ရာတွေ ရလာပါတယ်။
 ကြမ်းပိုးကိုက်ရင် အရင်ဆုံးက ယားပါတယ်။ 
ယားတာကို ကုတ်ရင် အနာဖြစ်ပါတယ်။
အဲဒီအနာက တစ်ရက် နှစ်ရက်အတွင်းမှာတော့ ရောင်ပြီး အဆံလိုအသီးကြီးဖြစ်နေတယ်။

နောက်တော့ အနာဖြစ်သွားပါတယ်။
 အနာပျောက်တော့ ဒဏ်ရာကျန်ခဲ့ပါတယ်။

အခုတော့ တစ်ကိုယ်လုံး အနာရွတ်ဖြစ်နေပါတယ်။ 

မခံနိုင်လွန်းတာကြောင့် ကြမ်းပိုးသတ်ဆေးတွေသုံးဖြစ်ပါတယ်။

အမေရိကန်နိုင်ငံထုတ် ကြမ်းပိုးဆေးတွေကို အမျိုးစုံအောင် သုံးပေမယ့်
 ကြမ်းပိုးက ပိုဆိုးလာပါတယ်။

အဲဒီလိုဆေးသုံးတဲ့ညမျိုးဆိုရင် မအိပ်နိုင်အောင် ကိုက်ပါတော့တယ်။

နောက်ဆုံးတော့ မခံနိုင်လွန်းတာကြောင့်
 မြန်မာဆန်ဆန် လက်နဲ့ဖမ်းရပါတော့တယ်။ 

တစ်ညထဲ အကောင်နှစ်ဆယ်လောက်မိတဲ့ ညမျိုးတောင် ရှိပါတယ်။

အဲဒီလိုလက်နဲ့ဖမ်းတော့မှ တဖြည်းဖြည်းနည်းလာပါတယ်။

အခုထိတော့ ညတိုင်း အကိုက်ခံရတုန်းပါပဲ။

ဒီတော့ ဒီပုံပြင်ထဲက ဖိုးသူတော်တောင်ဝှေးကို သတိရမိပါတယ်။

မေတ္တာကို နာလည်နိုင်စွမ်းမရှိတဲ့ တိရိစ္ဆာန်အတွက် အကြောင့်အားလျှော်စွာ

တောင်ဝှေးသုံးရပါလားလို့နားလည်လာမိပါတယ်။

အမေရိကန် ကြမ်းပိုးက ပိုဆိုးနေရော့သလား...

"မသေ သေးဘူးလေ…"

 တစ်ခါတုန်းက

ဆေးရုံလုပ်သားများက လူနာကို တွန်းလှည်းပေါ် တင်လာကြတယ်။

အဲဒီအချိန်မှာ လူနာက သတိပြန်ရလာပါတယ်။

လူနာက ဟိုကြည့် ဒီကြည့်နဲ့။

ပြီးတော့  လူနာက မေးတယ်။

“ခင်ဗျားတို့ ကျနော့်ကို ဘယ်ခေါ်သွားနေတာလဲဗျ”

“ရေခဲတိုက်ကို”

“ဒါပေမယ့် ကျနော်မှ မသေသေးပဲဟာ”

ဆေးရုံလုပ်သားပြန်ပြောလိုက်တာက...

“ကျနော်တို့ကလည်း ရေခဲတိုက်ကို မရောက်သေးပါဘူး”

"နောက်ဆုံးပေါ် ချစ်ခြင်းမေတ္တာ..."

 တစ်ခါတုန်းက

လူငယ်ဖြစ်တဲ့ကိုဝင်းချစ်ဟာ 

သူချစ်နေတဲ့ အမျိုးသမီးဖြစ်တဲ့ မဝတ်မှုန်ရွှေရီကို

လက်ထပ်ခွင့်တောင်းဖို့ အကြိမ်ကြိမ် ကြိုးစားခဲ့တယ်။

ဒါပေမယ့် အကြိမ်တိုင်းလိုလို မဝံ့မရဲ ဖြစ်ပြီး

 နောက်ဆုတ်ပြန်ခဲ့တာချည်း ဖြစ်နေတယ်။

အခုအခေါက်မှာတော့ သူငယ်ချင်းလှမြင့်ဦးက မြှောက်ပေးတဲ့အတွက်

တယ်လီဖုန်းနဲ့ လက်ထပ်ခွင့်တောင်းဖို့ ဆုံးဖြတ်ချက်ချလိုက်ပါတယ်။

“ ဟဲလို…ဝတ်မှုန်ရွှေရီလား”

“ ဟုတ်ပါတယ် ရှင်…”

ကိုဝင်းချစ်က အရဲ့ကိုးပြီး ပြောချလိုက်ပါတယ်။

“ ဝတ်မှုန်ရွှေရီကို ကိုယ်လက်ထပ်ချင်တယ်။

ကိုယ့်ကို လက်ထပ်မလားဟင်”

ဝတ်မှုန်ရွှေရီ ပြန်ပြောလိုက်တာက…

“ လက်ထပ်မှာပေါ့၊

ဒါနဲ့ အခုစကားပြောနေတာ ဘယ်သူလဲဟင်…”

"စိတ်ကျေနပ်မှုရတဲ့အလုပ်ကို လုပ်ပါ...(၂၀)..."

စိတ်ချမ်းသာတဲ့သူတွေမှာ ရှိတတ်တဲ့ အချက် (၆)ချက်မှ...အဆက်-

ကျေနပ်စရာကောင်းတဲ့အလုပ်ဆိုတာ ဘယ်လို အလုပ်လဲ။

ကိုယ့်အရည်အချင်းကို အစွမ်းကုန် သုံးရတဲ့အလုပ်ပါပဲ။

ဘယ်သူတွေက ကိုယ့်အလုပ်ကို ကျေနပ်မှုရသလဲ။

ရှိသမျှ ကိုယ်စွမ်း ဥာဏ်စွမ်းတွေကို အကုန်ထုတ်ပြီး လုပ်ရတဲ့အလုပ်ကို လုပ်တဲ့သူက ကျေနပ်မှုရတယ်။

အလုပ်ဟာ လုပ်ပြီးသားကိုပဲ ထပ်တလဲလဲ မလုပ်ရပဲ အပြောင်းအလဲရှိတဲ့ အလုပ်ဖြစ်ပြီး

အရေးပါတဲ့ ထိရောက်တဲ့ အလုပ်ကို လုပ်ရတဲ့သူက ကျေနပ်မှု ရတယ်။

++++++++++++++++++++

လွယ်လွန်းရင် ကျေနပ်မှုမရဘူး။

လုပ်ပြီးသားကိုပဲ ထပ်ခါထပ်ခါ လုပ်ရရင် ကျေနပ်မှု မရဘူး။

အရေးမပါတဲ့ အလုပ်ကို လုပ်ရရင် ကျေနပ်မှု သိပ်မရဘူး။

အဲဒီတော့ ကိုယ့်အလုပ်ကို ကိုယ် ကျေနပ်မှုရချင်ရင် ဘာလုပ်မလဲ။

ခက်တာကို ရှာလုပ်ပါ။

ခက်တဲ့အလုပ်က ကိုယ့်အရည်အချင်းကို မြှင့်ပေးတယ်။

အလုပ်လုပ်ရင်း အရည်အချင်းမြင့်လာတာ ကျေနပ်တယ်။ ပျော်တယ်။

+++++++++++++++++++++

မလုပ်ရသေးတာ မလုပ်ဖူးသေးတာကို ရှာလုပ်ပါ။

အပြောင်းအလဲရှိရင် စိတ်ဝင်စားစရာ ပိုကောင်းတယ်။

မသုံးရသေးတဲ့ အရည်အချင်းတွေကို သုံးရတယ်။

မရသေးတဲ့အရည်အချင်းအသစ်တွေကို ရတယ်။

အသိဥာဏ် တိုးတယ်။

အပေါင်းအသင်း မိတ်ဆွေသစ်တွေ တိုးတယ်။ 

အဲဒါကြောင့် ပျော်တယ်။

++++++++++++++++++++++++++++

အလုပ်လုပ်ရတာ ပျော်ချင်ရင် အရေးပါတဲ့အလုပ်ကို လုပ်ပါ။

ကိုယ်လုပ်တဲ့အလုပ်ဟာ လူအများကို အကျိုးပြုတယ်ဆိုရင် ငါ့အလုပ်ဟာ ထိရောက်တယ်။

အရေးပါတယ်။ ငါ မလုပ်ရင် လူအများမှာ အခက်အခဲရှိမယ်။ ငါ လုပ်လို့

လူအများ အဆင်ပြေတယ်။ ငါ့မိသားစုမှာ အရေးပါတယ်။

အသိုင်းအဝိုင်းမှာ အရေးပါတယ်။အဲဒီလိုခံစားရရင် ကျေနပ်တယ်။

စိတ်ချမ်းသာတယ်။ လူတိုင်းဟာ အရေးပါတဲ့သူ ဖြစ်ချင်တယ်။

+++++++++++++++++++++++++

လိုရင်းက စိတ်ချမ်းသာချင်ရင် အလွယ်လမ်းကို မလိုက်ပါနဲ့။

ရိုးရိုးသားသား လုပ်ရတဲ့အလုပ်ကို လုပ်ပါ။

လူအများကို အကျိုးပြုတဲ့ အလုပ်ကို လုပ်ပါ။

ကိုယ့်အရည်အချင်းကို မြှင့်ပေးတဲ့အလုပ်ကို လုပ်ပါ။

+++++++++++++++++++++++++++++++++++

Through our work we define ourselves,even leave a legacy

That adds meaning to our living.

ကိုယ့်အလုပ်နဲ့ ကိုယ်ဘယ်လိုလူဆိုတာကို ဖော်ပြတယ်။

အလုပ်ဟာ ကိုယ့်အရည်အချင်း၊ ကိုယ့်စေတနာကို ဖော်ပြတယ်။

အရည်အချင်းဆိုတာ အပြောသက်သက်နဲ့ ပြလို့မရပါဘူး။

အလုပ်နဲ့မှ ပြလို့ရတယ်။

စေတနာကိုလည်း အပြောသက်သက်နဲ့ပြလို့မရဘူး။

အလုပ်နဲ့ ပြရတယ်။

++++++++++++++++++++++++

ဒါထက် ကိုယ့်အလုပ်ဟာ ကိုယ်နေတဲ့လောကကို အမွေလည်းပေးခဲ့တယ်။

အဲဒါက ကိုယ့်ဘဝကို အဓိပ္ပာယ်ထပ်ဆောင်း ပေးတယ်။

“ငါ သေရင် ဘာကျန်ခဲ့မလဲ” ဆိုတဲ့မေးခွန်းကို မကြာခဏ ကိုယ့်ကိုယ်ကို ကိုယ်မေးပါ။

ကိုယ်လုပ်တဲ့အလုပ်နဲ့ ကိုယ့်လောက ကိုယ့်အသိုင်းအဝိုင်းကို အမွေပေးခဲ့ပါ။

++++++++++++++++++++++++++++

It’s better to have work than be idle, 
but it’s especially be better to do work that satisfies.

အလုပ်တစ်ခု ရှိတာက ဘာမှ မလုပ်ပဲ နေတာထက် ပိုကောင်းပါတယ်။

ဒါပေမယ့် အထူးပိုကောင်းတာက စိတ်ကျေနပ်မှုရတဲ့အလုပ်ကို လုပ်ပါ။

+++++++++++++++++++++++++

Through our work we also identify with a community.

ကိုယ့်အသိုင်းအဝိုင်းနဲ့ကိုယ်ကို ဆက်စပ်မှုရှိအောင်

ကိုယ့်အလုပ်က လုပ်ပေးတယ်။

ဒီအသိုင်းအဝိုင်းထဲမှာနေပြီး  ဒီအသိုင်းအဝိုင်းကောင်းဖို့လုပ်တဲ့သူဟာ

ဒါဟာ ငါ့အသိုင်းအဝိုင်း၊ ဒီအသိုင်းအဝိုင်းကောင်းဖို့ ငါ လုပ်နေတယ်။

ဒါဟာ ငါ့နေရာ။

ဒါကြောင့် ဒီအသိုင်းအဝိုင်းနဲ့ပတ်သက်တာ ငါ ပြောခွင့်၊ ဝေဖန်ခွင့်ရှိတယ်။

+++++++++++++++++++++++++++++++

စိတ်ချမ်းသာဖို့လိုရင်းပါ (ဆရာတော်ဦးဇောတိက) စာအုပ်မှ ကောက်နှုတ်ဖော်ပြပါတယ်။

+++++++++++++++++++++++++++

ကိုယ်ကိုယ်တိုင် ဖတ်ဖို့(၂၀)...

"အမေ့ထံသို့ ပေးစာများ-၃၉..."

သို့

ချစ်တဲ့အမေ

သားသတိတရ စာရေးလိုက်ပါတယ်။

အရွေ့အပြောင်းတွေ များလွန်းနေတာကြောင့် စာရေးချင်စိတ်သာ ရှိနေတယ်။

တကယ်တန်း မရေးနိုင်ခဲ့ဘူး။

ကယ်လီဖိုးနီးယားပြည်နယ်ကနေ အင်ဒီယားနား ပြည်နယ်ကို ပြောင်းရွေ့ရတယ်။

ဒါလည်း အလုပ်ကြောင့် ရွေ့ပြောင်းရတာပါ။

အင်ဒီယားနားရောက်ပြီး နှစ်လမပြည့်ခင်မှာပဲ မစ်ချီဂန်ကိုပြောင်းရွေ့ရပြန်ပါတယ်။

အင်ဒီးယားနားမှာ ရှိတဲ့အလုပ်ရှင်နဲ့ အခု မစ်ချီဂန်မှာ ရှိတဲ့အလုပ်က အလုပ်ရှင်တစ်ဦးထဲပါ။

အင်ဒီးယားနားမှာ စာဖိုးမှူးပညာသင်တယ်။ အလုပ်လုပ်တယ်။

အခုတော့ သူ့ရဲ့ဆိုင်အသစ် ဖြစ်တဲ့ မစ်ချီဂန်ဆိုင်ကို

လင်မယားနှစ်ယောက်စလုံး ပြောင်းရွေ့ရတယ်။

ပြောင်းတော့ ဝယ်ထားတဲ့ 4RUNNER ကားနဲ့ပြောင်းတယ်။

ကားက ကြီးတော့ ရှိတဲ့ပစ္စည်းတွေ အကုန်လုံး သယ်လို့ရတယ်။

သယ်လို့ရအောင်လည်း ကားကြီးကြီး ဝယ်ဖြစ်တဲ့သဘောပါပဲ။

ဒါပေမယ့် အမေရိကန်နိုင်ငံမှာတော့ ခရီးဝေးဝေးကို တစ်ခါမှ မမောင်းဖူးဖူး။

အခုမောင်းခဲ့ရတဲ့ခရီးက မိုင်ပေါင်း လေးရာပတ်ဝန်ကျင်လောက်ရှိမယ်ထင်တယ်။

ရန်ကုန်-မန္တလေး ခရီးအကွာအဝေးလောက် ရှိမယ်လို့ ခန့်မှန်း မိပါတယ်။

မမောင်းမဖြစ်မောင်းရတော့လည်း မောင်းဖြစ်သွားတာပါပဲလေ။

အမေပြောခဲ့ဖူးတဲ့စကားကို သတိရမိတယ်။

"နယ်မြေအသစ်ကိုသွားရင် အရေးအကြီးဆုံး လိုအပ်တာကတော့

သတ္တိပဲ။ နေ့စဉ်ဘဝမှာကို သတ္တိက လိုအပ် နေတတ်တယ်။

လိုအပ်တဲ့အခါတိုင်း အသုံးချနိုင်ဖို့ ကိုယ်နဲ့အတူ ယူသွားပေါ့"တဲ့။

အခုတော့ အမေပြောတဲ့အတိုင်း သတ္တိက နေ့တိုင်းကိုလိုအပ်နေတယ်။

ဘာဖြစ်လို့ဆိုတော့ နေ့တိုင်း စိန်ခေါ်မှုတွေ ရှိနေလို့ပါပဲ။

အလုပ်သစ်လုပ်နေရတော့ စိန်ခေါ်မှု အသစ်နဲ့တွေ့တယ်။

ကိုယ်မကျွမ်းကျင်တဲ့ အလုပ်ဖြစ်တာမို့ သိစရာ တတ်စရာက အများကြီး။

မှန်အောင် မနည်းကြိုးစားနေရချိန်မှာ အမြန်လုပ်ဖို့ အခြေအနေကတောင်းဆိုတယ်။

မဖြစ်မနေ မြန်အောင် လုပ်ရပြန်တော့ မမှားအောင် အာရုံစိုက်ရပြန်တယ်။

မီးဖိုချောင်မှာ အလုပ်လုပ်တော့ မီးမလောင်အောင် ဂရုစိုက်ရတယ်။

ဘယ်ရမလဲ။ အကြီးအကျယ် မီးအပူမလောင်တာပဲ ရှိတယ်။

အသေးအဖွဲလောင်တာက နေ့စဉ်နဲ့အမျှပါပဲ။

အခုဆိုရင် အပူလောင်တာကို ရိုးသွားသလိုတောင် ဖြစ်နေပြီ။

မီးလောင်တာကို ခံစားကြည့်တော့မှ ငရဲဆိုရင် ဒီထက်ပူလောင်မှပဲလို့ တွေးမိတယ်။

မီးဖိုချောင်ဆိုတော့ အလှီးအဖြတ်တွေက များကများပါဘိသနဲ့။

ဓားက မျိုးစုံအောင် ကိုင်တွယ်ရတယ်။

ဓားမထိအောင်လည်း သတိထားရတယ်။

သတိထားတဲ့အတွက် ဓားကတော့ အထိအခိုက်မရှိပါဘူး။

ဒါပေမယ့် ဓားသွေးတော့ သတိလွတ်သွားတယ်။

အဲဒီတော့မှ ဓားထိတော့တာပဲ။

လူနာတွေကို လှီးဖြတ်တုန်းကတော့ နာရကောင်းမှန်းမသိခဲ့ပါဘူး။

ကိုယ့်အသားကို ကိုယ်လှီးမိတော့ နာလိုက်တာအမေရယ်။

ကိုယ်ချင်းစာတရားဆိုတာ ကိုယ်ခံရတော့မှ သိတဲ့တရားလားလို့တောင်တွေးမိသေးတယ်။

မီးဖိုခန်းထဲမှာ ဆီတွေနဲ့လုပ်နေရသမို့ ချောမလဲအောင် သတိထားရတယ်။

စီးနေကျဖိနပ်နဲ့ တစ်ရက်အလုပ်လုပ်ကြည့်တယ်။

စကိတ်စီးနေရတဲ့အတိုင်းပါပဲ။ မဖြစ်သေးပါဘူးဆိုပြီး

ချောမလဲအောင် ဆီထဲမှာ စီးလို့ရတဲ့ဖိနပ်တစ်ရံဝယ်လိုက်တယ်။

အဲဒီဖိနပ်ဝယ်တော့မှ အစဉ်ပြေသွားတယ်။

အင်ဒီးယားနားမှာနေတုန်းကတော့

ကျနော်နဲ့တွဲလုပ်ရတာက ချင်းတိုင်းရင်းသား လူငယ်နှစ်ယောက်ပါ။

သူတို့က မလေးရှားကနေ ရောက်လာကြတယ်။

မလေးရှားမှာလည်း စားသောက်ဆိုင်မှာပဲ အလုပ်လုပ်ခဲ့ကြတယ်။

စားသောက်ဆိုင် အတွေ့အကြုံတွေကတော့ များလှပါတယ်။

အတွေ့အကြုံအရတော့ ဆရာကြီးတွေပေါ့။

မစ်ချီဂန်မှာလည်း ကျနော်နဲ့တွဲလုပ်သူတစ်ယောက်က မြန်မာပါ။

နောက်တစ်ယောက်ကတော့ ပေါ်တူဂီလူမျိုးလို့သိရတယ်။

သူတို့လည်း အမေရိကန်ရောက်နေတာ ကြာလှပြီ။

စားသောက်ဆိုင်မှာပဲ လုပ်တော့ အတွေ့အကြုံအရတော့ ဆရာကြီးပေါ့။

လုပ်ငန်းခွင်မှာ ဆရာလုပ်တာကို သီးခံနိုင်ပါတယ်။

ဒါပေမယ့် လူမျိုးမတူ၊ဘာသာမတူကြတော့

မိုက်ရိုင်းတာကို သီးခံဖို့ခက်ခဲလှပါတယ်။

ဒါပေမယ့် သီးခံနိုင်ဖို့ သတ္တိလိုလာပြန်တယ်။

သတ္တိမရှိရင် သီးခံနိုင်ဖို့မလွယ်လှဘူး။

မိုက်မိုက်မဲမဲ တုန့်ပြန်တာဟာ သတ္တိမဟုတ်ဘူးလို့အမေမှာတာကိုလည်း

သားမမေ့ပါဘူး။

တစ်နှစ်ကျော်ကာလမှာပဲ အခြေအနေအရ လေးနေရာပြောင်းရွေ့နေထိုင်ခဲ့တယ်။

အကောင်းဖက်ကတွေးရင် အမေရိကန်နိုင်ငံမှာ ပြည်နယ်လေးခုကို

ရွေ့ပြောင်းနေထိုင်ခွင့်ရတယ်။ပြီးတော့

အတွေ့အကြုံအများကြီးရတာဟာ အမြတ်တွေချည်းပါပဲလို့ မှတ်ယူနိုင်ပါတယ်။

အတွေ့အကြုံဟာ ငွေနဲ့ဝယ်လို့ရတာမျိုး မဟုတ်ပါဘူး။

ဘာလိုလိုနဲ့ သင်္ကြန်တောင်ပြီးသွားပြီနော်။

ဒီမှာတော့ သင်္ကြန်ဆိုတာ ဘာမှန်းတောင် မသိလိုက်ဘူး။

မြန်မာပြည်မှာဆိုရင် သင်္ကြန်ကာလမှာ တရားစခမ်းတစ်ခုခုမှာ တရားဝင်ဖြစ်တာကို

ပြန်တွေးမိပါတယ်။ လွမ်းမိသလိုခံစားရပါတယ်။

မြန်မာပြည်နဲ့ဝေးနေပေမယ့် မြန်မာစိတ်တွေ မပျောက်ပါဘူး။

မြန်မာဟာ မြန်မာပါပဲ။

အချိန်ရတိုင်း မြန်မာပြည်ကို လွမ်းမိပါတယ်။

အမေ ကျန်းမာရေးကို ဂရုစိုက်ပါနော်။

သားတို့အားလုံးနေကောင်းကြပါတယ်။

အမေ့ကိုချစ်တဲ့သား

အောင်ဝင်းဟိန်း

လန်ဆင်းမြို့(Lansing)

မစ်ချီဂန်ပြည်နယ်(Michigan)

အမေရိကန်ပြည်ထောင်စု(USA)။

၎-၂၁-၂၀၁၂