Wednesday, August 31, 2011

" အမေ့ထံသို့ပေးစာများ-၁၀..."




သို့
ချစ်တဲ့အမေ
သားရိုသေစွာစာရေးလိုက်ပါတယ်။
အမေနေကောင်းတယ်မဟုတ်လား၊
အမေရဲ့နှလုံးဆေးတွေကိုရော မှန်မှန်သောက်ဖြစ်လား။
အမေလှူချင်တာလှူဖို့၊
အမေစားချင်တာစားဖို့၊
အမေရဲ့ကျန်းမာရေးအတွက် ဆေးဝယ်ဖို့၊
အခြားအမေလိုအပ်တာ ဝယ်ဖို့၊
အတွက် ကျနော်ငွေပို့လိုက်တာရောက်လား။
တရားဝင်ငွေလဲနှုန်းကြောင့် ဘဏ်ကငွေမပို့နိုင်ပါ။
(တရားဝင်ငွေလဲနှုန်း… တစ်ဒေါ်လာ= ၆-ကျပ်၊
မှောင်ခိုငွေလဲနှုန်း…တစ်ဒေါ်လာ=တစ်ထောင်ကျပ်နီးပါး၊)
ဟွန်ဒီနဲ့ပဲပို့လိုက်တယ်။
ဒီဖက်က ငွေလွှဲခကတော့ မပေးရပါဘူး။
ဒါပေမယ့် ငွေလဲနှုန်းမှာတော့ သူအမြတ်စားမယ်လို့ကျနော်ထင်တယ်။
ခုချိန်မှာတော့ တန်ရာတန်ကြေးမပေးဘဲ အလကားရတာ မရှိသလောက်နည်းသွားပါပြီ။
တန်ရာတန်ကြေးပေးပြီး တန်ရာတန်ကြေးပြန်ရတာကိုပဲ သူတို့တွေကို ကျေးဇူးတင်ရမှာပါ။
ဘာကြောင့်ဆိုတော့ လိမ်တဲ့သူတွေ ပေါများလာလို့လေ။
အမေရိကန်မှာက ငွေရှာရခက်ခဲတယ်။
အလုပ်တွေက ရှားသထက်ရှားလာတယ်။
ရလာတဲ့ငွေကျပြန်တော့ ဒီမှာက တန်ဖိုးရှိတယ်။
အခုထိ ဒီမှာက ပြားစေ့(တစ်-ဆင့်) ကိုသုံးနေရတုန်းပဲရှိသေးတယ်။
ဒီရောက်တော့မှ အမေရိကန်ဒေါ်လာတွေ အားလုံးကိုမြင်ဖူးတော့တယ်။
ပြီးတော့ ကိုင်သုံးဖူးတယ်။
ဒါကိုက အမြတ်တစ်ခုလို့မှတ်ယူပါတယ်။
မြန်မာနိုင်ငံမှာတော့
ဆရာဝန်တစ်ယောက်အနေနဲ ငွေရှာရတာ လွယ်တယ်။
ရလာတဲ့ငွေကျတော့ တန်ဖိုးနည်းနေသလိုပဲ။
ဘာမှ အသုံးမခံဘူး။
ဝင်ငွေက သိန်းဘယ်လောက်ရတယ်လို့ပြောပေမယ့်
လကုန်လို့စာရင်းချုပ်လိုက်တဲ့အခါ
ပိုငွေ ထွက်မလာဘူး။ ဘာတွေမှာကုန်နေသလဲဆိုတာလည်း
သေသေချာချာ တိတိကျကျ မရှိသလိုပဲလို့ခံစားနေရတာကြာပါပြီ။
အမေရိကန်မှာက ပြောင်းပြန်ဖြစ်နေတယ်။
ရှာရခက်တယ်။
ရလာတဲ့ငွေက အသုံးခံတယ်။
ငွေနည်းနည်းနဲ့ပစ္စည်းတွေ အများကြီးဝယ်လို့ရတယ်။
စားစရိတ်ကပေါပါဘိသနဲ့။
အဝတ်အထည်လည်းပေါတာပါပဲ။
အဲ…နေစရိတ်ကတော့ကြီးတယ်။
အိမ်ငှားနေတဲ့လခ နဲ့ အိမ်ဝယ်ပြီး ဘဏ်ကိုလစဉ် သွင်းနေတဲ့လခက သိပ်မကွာတော့
လူအများစုက အိမ်ကိုအကြွေးနဲ့ဝယ်ပြီး ဘဏ်ကိုငွေသွင်းနေကြတာ များတယ်။
ဝင်ငွေသာ ပုံမှန်ရှိရင် ဘဏ်ကလည်း ငွေချေးတာပါပဲ။
အဲဒီတော့ လူတိုင်းနီးပါး အိမ်ပိုင်တွေဖြစ်သွားကြတာပါပဲ။
မပိုင်ခင်တော့ လျှာထွက်အောင်ရှာပြီး ဘဏ်ကို သွင်းပေတော့။
ဒါလည်း တွန်းအားတစ်မျိုးပဲပေါ့။
တိုင်းရင်းသားအမေရိကန်တွေက ငွေရှာတယ်။
ရလာတဲ့ငွေကို ဇိမ်ခံတယ်။
VACATION လို့ခေါ်တဲ့အားလပ်ရက်ကို ပုံမှန်ယူတယ်။
ခရီးထွက်တယ်။ ဇိမ်ခံဟော်တယ်တွေမှာ တည်းတယ်။
နောက်ဆုံးပေါ်လို့ခေါ်တဲ့အရာတွေအားလုံးကိုဝယ်တယ်။
လူ့ဘဝဆိုတာ ဇိမ်ခံဖို့၊လွတ်လွတ်လပ်လပ်နေဖို့လို့တွေးပြီး
ပျော်ပျော်နေတဲ့လူတွေအများကြီးကိုတွေ့ရတယ်၊
နောက်တစ်မျိုးကတော့
အထူးသဖြင့်တော့ အတိုင်းတိုင်းအပြည်ပြည်က
နောက်မှရောက်လာကြတဲ့အမေရိကန်နိုင်ငံသားအဖြစ်ခံယူသူ
တွေပေါ့။
သူတို့ကအလုပ်လုပ်မယ်။
ငွေစုမယ်။
အိမ်ဝယ်မယ်။
ကားကောင်းကောင်းဝယ်မယ်။
ပညာတွေကောင်းကောင်းသင်မယ်။
အသေးစား ဇိမ်ခံမှုကိုလုပ်ပေမယ့် ငွေကုန်ကြေးကျများမယ့် ဇိမ်ခံအလုပ်တွေ
ဘာမှမလုပ်ပဲ ငွေကို မက်မက်မောမောစုနေတဲ့လူတစ်မျိုးပေါ့။
သေတော့လည်း ဘာမှမပါမှန်း ပါစပ်ကတွင်တွင်ပြောပေမယ့်
ငွေတွေကိုတော့ ယူသွားလို့ရမယ့်အတိုင်း စုနေလေရဲ့။
ငွေမက်တဲ့လူမျိုးပေါ့။
ရောက်ခါစလူအဖို့တော့ ဘယ်သူ့ကို အားကျရမှန်းကို မသိပါဘူး။
အမေရိကန်ကလည်းငွေကို ဗဟိုပြုထားတဲ့နိုင်ငံဆိုတော့
ဘယ်သူ့မှလည်း အပြစ်ပြောလို့မရပါဘူး။
ကိုယ်သန်ရာ ကိုယ်လုပ်နေလေရဲ့။
ကိုယ်မှားရင် ကိုယ်ခံပဲ။
ကိုယ်မှန် ကိုယ်စံပဲ။
အရာရာဟာ ကိုယ်နဲ့ပဲဆိုင်နေတယ်။
ကိုယ်ရွေးတဲ့လမ်းကို ကိုယ်လျှောက်ရတာပါပဲ။
ကယ်ရိုးလိုင်းနား(မြောက်)၊ဘာလင်တန်မြို့မှာနေရတာ ပျော်စရာကောင်းတယ်။
ရာသီဥတုကအေးတယ်ဆိုပေမယ့် အနေကြာလာတော့နေသားကျလာတယ်။
သူငယ်ချင်းကလည်း ဧည့်ဝတ်ကျေတော့ စိတ်အေးချမ်းပါတယ်။
အိမ်တိုင်းမှာ ပန်းအလှစိုက်ထားတော့ တစ်မြို့လုံးဟာ ဥယျာဉ်တစ်ခုလိုဖြစ်နေတယ်။
ပန်းတွေနဲ့ဝေနေတဲ့မြို့တစ်မြို့ပါပဲ။
ရာသီလေးနည်းနည်းပြောင်းသွားတာနဲ့ ပန်းအရောင်တွေလည်းပြောင်းပြောင်းလာတယ်။
ကားစီးသွားတဲ့အခါ တစ်ချိန်မှာ တစ်မြို့လုံး ပန်းအရောင်က ခရမ်းရောင်။
နောက်တစ်ခါအပြင်ထွက်ရင် တစ်မြို့လုံး ပန်းအရောင်က အဖြူရောင်။
နောက်တစ်ခါ အဝါရောင်၊
နောက်တစ်ခါ အနီရောင်၊
ပန်းတွေကလည်း အရောင်စုံလွန်းလှပါတယ်။
ပန်းမြို့တော်လို့တင်စားရမလိုဖြစ်နေတယ်။
ဝင်ငွေကောင်းကောင်းရှိတဲ့အလုပ်သာရှိရင်
အဲဒီမှာအိမ်ဝယ်ပြီးနေဖို့ကောင်းတဲ့နေရာလို့တောင်တွေးလာမိတယ်။
ပျော်ရာမှာ မနေရပါ။ တော်ရာမှာနေရစမြဲဆိုသလို
နယူးရောက်မြို့ကို အလည်ခရီးထွက်ပြီး တစ်ပတ်အတွင်းမှာပဲ
ကယ်လီးဖိုးနီးယား(California)မှာရှိတဲ့ မိန်းမရဲ့အမျိုးတွေဆီကို
လေယာဉ်နဲ့ထွက်လာခဲ့ရပါတယ်။
အဲဒီမှာ ထူးခြားတဲ့ဖြစ်ရပ်တစ်ခုကတော့
မှတ်မှတ်ရရ ဧပြီလ ၂၉-ရက် (April 29,2011)နေ့သောကြာနေ့မှာ လေယာဉ်ခရီးစဉ်ရှိတယ်။
ညနေ53း0PMမှာဖြစ်တယ်။
သူငယ်ချင်းက သူ့ရဲ့ဆူရှီးလုပ်ငန်းကိုလည်းသွားလုပ်တယ်။
ပြီးတော့ အိမ်မှာလည်း ဘုန်းကြီးတစ်ပါးကို နေ့ဆွမ်းကပ်တယ်။
သူငယ်ချင်းဖြစ်သူကျနော်ကိုလည်း လေယာဉ်ကွင်းကို လိုက်ပို့ဖို့စီစဉ်ပြန်တယ်။
တစ်နေ့ထဲ အလုပ်ကများစွာဖြစ်သွားတယ်။
အိမ်နဲ့လေဆိပ်က တစ်နာရီနီးပါး ကားမောင်းရတယ်။
အချိန်ကပ်ပြီးမှ ထွက်တော့ လေဆိပ်ရောက်တော့
လေယာဉ်ထွက်ချိန်ဖြစ်နေပြီ။
ပျက်ကွက်တာက ကိုယ့်ဖက်ကဖြစ်ပေမယ့်
လေယာဉ်ခရီးစဉ်ကိုနောက်တစ်နေ့နံနက်စောစောမှာ
ငွေထပ်ပေးစရာမလိုပဲ အစားထိုးပေးပါတယ်။
ကျနော်တို့အဖို့တော့ ကသိကအောင့်ဖြစ်သွားပေမယ့်
ငွေထပ်မကုန်တဲ့အတွက်
လေယာဉ်ကုမ္ပဏီကိုကျေးဇူးတင်ရပါတယ်။
ဝင်ငွေမရှိသေးချိန်မှာ အပိုငွေကုန်တဲ့အလုပ်ကို မလုပ်နိုင်ဘူးလေ။
နောက်တော့မှပဲ စာရေးလိုက်ပါအုန်းမယ်။
အခုတော့ အိပ်တော့မယ်နော်။
အမေတို့မြန်မာမှာနေ့ဆိုရင် ဒီမှာက ညဖြစ်နေတယ်။
အရှေ့နဲ့အနောက်ဖြစ်နေတော့
အားလုံးကိုက ပြောင်းပြန်ဖြစ်နေသလားမသိပါဘူးနော်။
ကွာခြားတာတော့ တော်တော်ကို ကွာပါတယ်။
အကောင်းအဆိုးကိုတော့ မဝေဖန်ချင်ပါဘူး။
အမေရိကန်မှာ ကောင်းတာတွေအများကြီးရှိသလို အဆိုးတွေလည်း အများကြီးပါပဲ။
မြန်မာနိုင်ငံမှာရော...အကောင်း၊အဆိုးတွေကတော့ ရောပြွန်နေတာပါပဲ မဟုတ်လား၊
ကျနော်ပြောချင်တာက ဘာကိုမှ အထင်ကြီးနေစရာမလိုသလို
အထင်သေးစရာလည်း မလိုပါဘူး။
အဓိကအရေးကြီးတာက ကိုယ့်ဘဝကို ကိုယ်ကျေနပ်ဖို့ပါ။
ကျေနပ်အောင်လည်း အမြဲတမ်းကြိုးစားအားထုတ်နေဖို့လိုတယ်လို့
အမေပြောခဲ့တာကိုလည်း
ကျနော်မမေ့ပါဘူး။
အမြဲတမ်းကြိုးစားနေတဲ့
ချစ်တဲ့သား...
အောင်ဝင်းဟိန်း
ဘာလင်တန်မြ်ို့၊
မြောက်ကာရိုးလိုင်းနားပြည်နယ်၊
အမေရိကန်ပြည်ထောင်စု။
ြ သဂုတ်လ၊၃၁၊၂၀၁၁

+++++++++++++++++++++++++
(ဒါက အမေရိကန်တစ်-ဆင့်တန်ပါ၊
လင်ကွန်းပုံပါတဲ့အတွက် လမ်းမှာတွေ့တိုင်း
ကောက်ပြီးသိမ်းထားမိတယ်၊
တော်တော်များများတောင်စုမိနေပြီ။
လင်ကွန်းက ကျနော့်ရဲ့စံပြပုဂ္ဂိုလ်ပါပဲ။)
လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com