Sunday, September 18, 2011

" အမေ့ထံသို့ပေးစာများ-၁၂..."




သို့
ချစ်တဲ့ အမေ
အမေနေကောင်းလား၊
ကျနော်အလုပ်လုပ်နေပြီ။
အမေရိကန်မှာက အလုပ်ရှိမှ ဂုဏ်ရှိစွ ဖြစ်နေတယ်လေ။
အလုပ်မရှိရင် ငွေမရှိဘူး။
ငွေမရှိရင် စား၊ဝတ်၊နေရေး အစဉ်မပြေနိုင်တော့ဘူး။
အချို့ကတော့ ငွေရှိတယ်။
အလုပ်လုပ်ရတယ်။
ဘာကြောင့်လဲဆိုတော့ ကျန်းမာရေးအတွက်ကြောင့်ပဲ။
သိတဲ့အဖွားကြီးတစ်ယောက်ဆိုရင် ချမ်းသာတယ်။
အိမ်မှာအိမ်ဖေါ်လေးယောက်တောင် ခေါ်ထားနိုင်တယ်။
လခပေးထားနိုင်တယ်။
Shopping Mall တစ်ခုမှာ အချိန်ပိုင်း အလုပ်လုပ်နေတယ်။
ဘာကြောင့်လဲလို့မေးကြည့်တော့ Medicare လို့ခေါ်တဲ့ ကျန်းမာရေးစရိတ်အတွက်
အလုပ်လုပ်တာလို့ပြောတယ်။
အစပိုင်းကတော့ နားမလည်ပါဘူး။
Medicare ဆိုတာ ဘာလဲပေါ့။နောက်တော့မှ သိလာတယ်။
Medicare ဆိုတာက အစိုးရကနေထောက်ပံ့တဲ့ကျန်းမာရေးစရိတ်ဖြစ်တယ်။
အလုပ်လုပ်တဲ့လူတိုင်းကို ခံစားခွင့် ပေးထားတယ်။
ဆေးရုံစရိတ်က အရမ်းကြီးတယ်။
ဘာ Medicare မှမရှိရင်
တစ်ခုခုဖြစ်လို့ဆေးရုံတက်ရရင်တော့ ရှိသမျှ သောင်းဂဏန်း၊သိန်းဂဏန်း ဒေါ်လာတွေ
ကုန်လောက်အောင်ကို ဈေးကြီးတော့ လူတိုင်းလန့်ကြတယ်။
အဲဒါ ရက်ပိုင်းအတွင်းမှာ ကုန်တာနော်။
အကြောင်းတစ်ခုခုကြောင့်ဆေးရုံတက်ဖို့ကြုံလာရင်
ဆေးရုံပေါ်ရောက်တာနဲ့စစ်ဆေးစမ်းသပ်မှုတွေ အားလုံးလုပ်တော့တာပဲ။
လိုတာရော၊မလိုတာရော အားလုံးပါပဲ။
လိုတာကတော့ပြောစရာမရှိပါဘူး။
မလိုတာက ရောဂါကို မတွေ့မချင်းရှာနေတော့တာပဲ။
ဆရာဝန်တွေက ထင်မြင်ချက်နဲ့မကုသတော့ဘူး။
ကျွမ်းကျင်မှုရှိတာတောင်မှ ဓါတ်ခွဲစမ်းသပ်မှုတွေ အားလုံးလုပ်ပြီးမှ
ဆုံးဖြတ်ချက်ချတတ်တော့ အားလုံးလုပ်မှ ဖြစ်တော့မယ်လေ။
ဒီလိုလုပ်ရတာကလည်း အကြောင်းရှိတယ်။
မသေချာပဲနဲ့ဆရာဝန်ကလုပ်လိုက်လို့အမှားအယွင်းတစ်စုံတစ်ရာရှိလာခဲ့ရင်
အဲဒီဆရာဝန်တစ်သက်လုံးရှာထားတာတွေ
တရားစွဲခံရလို့ ကုန်ပြီသာမှတ်ပေတော့။
ဒီတော့ ဆရာဝန်ကလည်း သူ့ရဲ့အန္တရာယ်ကင်းရာကင်းကြောင်းအတွက်
သေချာသထက်သေချာအောင်လုပ်တော့တာပဲ။
ဒီတော့ လူနာကလည်း ရောဂါကြောင့်မသေ၊
ငွေကုန်များလွန်းလို့ သေမဲ့ကိန်းကို အလိုလိုရောက်သွားတော့တယ်။
ကြားကတော့ ဒိုင် စားသွားပါတယ်။
ဒိုင်ကတော့ အသက် အာမခံကုမ္ပဏီနဲ့ဘဏ်တွေပါပဲ။
အဲဒီတော့ အဲဒီလို ဘေးဆိုးကြီးတွေအတွက် အကောင်းဆုံးကာကွယ်နည်းကတော့
အလုပ်လုပ်ပြီး Medicare ရအောင် ကြိုးစားလာကြတယ်။
အလုပ်လုပ်တဲ့လူတိုင်းအပေါ်အစိုးရက အခွန်ကောက်တယ်။
အဲဒီအခွန်ထဲက Medicareအတွက်လည်းပါတော့
လူတိုင်းကိုယ်စီအလုပ်လုပ်ဖို့ဖြစ်လာကြတယ်။
အမေရိကန်ရဲ့လူတိုင်းအပေါ်ထားတဲ့စံနစ်ကတော့
ကောင်းတယ်လို့ပြောရမယ်ထင်တယ်။
ဒါကြောင့် ဆင်းရဲတဲ့လူလည်းအလုပ်လုပ်တယ်။
ချမ်းသာတဲ့လူလည်းအလုပ်လုပ်တယ်။
အရွယ်ရောက်တဲ့လူတိုင်း အလုပ်လုပ်တယ်။
အရွယ်လွန်နေတဲ့လူတွေတောင် အချိန်ပိုင်းအလုပ်လုပ်နေကြတာကိုတွေ့ရတယ်။
အတူနေခဲ့ဖူးတဲ့ သက်ကြီးပိုင်းတွေဆိုရင် အသက်၇၀-နှစ်ကျော်နေတာတောင်
အလုပ်လုပ်နေတာကို တွေ့ရတယ်။
သူတို့တွေကိုတော့ အချိန်ပြည့်တော့အစိုးရကခွင့်မပြုတော့ပါဘူး။
အချိန်ပိုင်းတော့ခွင့်ပြုထားတယ်။
အမေရိကန်နိုင်ငံဟာ အလုပ်နဲ့နိုင်ငံတော်ကြီးကို တည်ဆောက်ထားတာမို့
ချမ်းသာတဲ့နိုင်ငံဖြစ်လာတာတော့ မဆန်းပါဘူး။
ငွေကြေးအကြတ်အတည်းကြုံနေတာတောင်
ဆင်ပိန်တော့ ကျွဲလောက်တော့ ကျန်နေပါသေးတယ်။
အော်…ဒါနဲ့ကျနော်တို့ဆန်ဖရန်စစ္စကိုလေဆိပ်ကိုရောက်တော့ည ၉:၀၀နာရီကျော်နေပြီ။
မိန်းမရဲ့အမျိုးတွေက လာကြိုကြပါတယ်။
ဆန်ဖရန်စစ္စကိုမှာ ည ၉:၀၀နာရီဆိုရင်
ကျနော်တို့ထွက်လာခဲ့တဲ့ကာရိုးလိုင်းနား(မြောက်)မှာတော့
ည ၁၂:၀၀နာရီထိုးနေပြီ။
စံတော်ချိန် ၃:၀၀နာရီတောင်ကွာတာကိုတွေ့ရတယ်။
ပတ်ထားတဲ့နာရီတွေကိုလည်း စံတော်ချိန်ကို ပြန်ပြင်ရပါတယ်။
ကျနော်တို့က အမေရိကန်နိုင်ငံရဲ့အရှေ့ဖက်ခြမ်းကနေ
အနောက်ဖက်ခြမ်းကို ရောက်လာတာပေါ့။
အရှေ့ဖက်ခြမ်းကိုတော့ Eastern Time လို့ခေါ်တဲ့အရှေ့ပိုင်းအချိန်ကိုအသုံးပြုတယ်။
အခုရောက်နေတဲ့ဆန်ဖရန်စစ္စကိုမှာတော့ Pacific Time ကိုအသုံးပြုတယ်။
ကွာခြားချိန်ကတော့ စံတော်ချိန် ၃:၀၀နာရီဖြစ်နေတယ်။
မြန်မာနိုင်ငံမှာတော့ မြောက်ပိုင်း၊တောင်ပိုင်း၊အရှေ့ပိုင်း၊ အနောက်ပိုင်း
အားလုံးဟာ စံတော်ချိန်တစ်ခုထဲကိုအသုံးပြုနေတော့
ဒီရောက်တော့ အံသြမိပါတယ်။
ကျနော်တို့အခုတည်းခိုမယ့် နေရာက ဆန်ဖရန်စစ္စကိုနဲ့ကားမောင်းရင်
၄၅မိနစ်လောက်မောင်းရတဲ့ ဆန်ဟိုဆေးမြို့(San Jose) မှာဖြစ်တော့
ကားထပ်စီးရတယ်။
ဖြတ်သန်းခဲ့တဲ့လမ်းတစ်လျှောက် မီးတွေထိန်ထိန်လင်းနေတာကို တွေ့ရတယ်။
အော် အမေရိကန်ဟာ လုံးဝကို မမှောင်တဲ့မြို့ကြီးတွေပါလားလို့တွေးမိတယ်။
အမှောင်ကမ္ဘာထဲကလာတော့ နေ့နေ့ညည လင်းနေတဲ့နေရာရောက်တော့
အံသြရပါတယ်။
လူချင်းအတူတူ ဘာတွေများကွာခြားနေပါလိမ့်နော်။
တစ်နေကုန်အောင် လေယာဉ်ကွင်းတွေထိုင်ရတာကတစ်ကြောင်း၊
လေယာဉ်ကိုလည်း အချိန်အကြာကြီးစီးရတာကတစ်ကြောင်းကြောင့်
ပင်ပန်းပြီး အိပ်ချင်နေပြီ။
ဒါပေမယ့် ဧည့်သည်ဖြစ်နေတော့ အိမ်ရှင်က နေရာချပေးမှ နေရာကျမှာလေ။
မိန်းမနဲ့အိမ်ရှင်ရဲ့မိန်းမတို့က ညီအစ်မ တစ်ဝမ်းကွဲတော်တယ်။
မတွေ့ကြရတာ နှစ်ပေါင်းနှစ်ဆယ်ကျော်ကြာလာခဲ့ပြီမို့
အလွမ်းတွေသယ်နေကြတာနဲ့ တော်တော်နဲ့မအိပ်ရပါဘူး။
ဟန်ဆောင်နေရတဲ့ဘဝကို မနှစ်သက်ပေမယ့်
အကြောင်းအားလျှော်စွာ ဟန်ဆောင်ပြီး နေရတာပါပဲ။
ဘဲနဲ့တတ်နိုင်မှာလဲ။
ကိုယ်ကရွေးချယ်ခဲ့ပြီလေ။
ကိုယ်ရွေးချယ်တဲ့လမ်းကို ကိုယ်လျှောက်ရမှာပါပဲ။
ဘာဘဲပြောပြော နေရာသစ်တစ်ခုကိုရောက်လာတဲ့အတွက်တော့
ပျော်မိပါတယ်။
အတွေ့အကြုံသစ်တွေရမယ်ဆိုတော့ တန်ပါတယ်လေလို့တွေးမိသေးတယ်။
အဲဒီနေ့ အိပ်ချိန်ကို တော်တော်လေးလွန်မှ အိပ်ရပါတယ်။
အိပ်ရပြီဆိုတာနဲ့အိပ်လိုက်တာ ဘယ်အချိန်မိုးလင်းသွားမှန်းတောင် မသိလိုက်ပါဘူး။
မြောက်ကာရိုးလိုင်းနားမှာ နေခဲ့တဲ့အချိန်ကို စိတ်တွက်တွက်ကြည့်တော့
နှစ်လခွဲနီးပါးကြာသွားခဲ့တယ်။
ပညာတွေအများကြီးရလိုက်တယ်လို့ပြောနိုင်တယ်။
ကားမောင်းတတ်လာတယ်။အမေရိကန်ကားလိုင်စင်လည်းရတယ်။
ဆူရှီးပညာလည်းတတ်လာတယ်။
မြန်မာပြည်တုန်းက လုံးဝမသိတဲ့ပညာကို ဒီရောက်မှ တတ်လာတယ်။
ကုသိုလ်လည်း အထိုက်အလျောက်ရပါတယ်။
ငွေကြေးတော့ လုံးဝမရဘူး။
ကုသိုလ်၊ပညာ၊ငွေကြေးတွေနဲ့ချိန်ကြည့်တာ
မြောက်ကာရိုးလိုင်းနားမှာ ဒီလောက်နေတာလုံလောက်ပါပြီ။
ရှေ့ကိုခရီးဆက်ခဲ့တာ မှန်တယ်လို့ပြောရမယ်ထင်တယ်အမေ၊
အမေရိကန်မှာက စိန်ခေါ်မှုအမျိုးမျိုးက ကြိုဆိုနေတော့
ဘာတွေဖြစ်လာဦးမယ်မသိသေးဘူး။
ဘာတွေဘဲဖြစ်ဖြစ် အမေ့သားဖြစ်တဲ့ကျနော်က
အမေ့လိုပဲ သတ္တိတွေနဲ့ရင်ဆိုင်မှာပါ။
စိတ်ချပါအမေ။
ကျနော်ကြောင့် အမေစိတ်မပျက်စေရပါဘူး။
အမေရေ…စာလည်းရှည်သွားပြီ။
အမေလည်းညောင်းရော့မယ်။
နောက်တော့မှ အချိန်ရရင်ရသလို ရေးလိုက်ပါဦးမယ်။
အမေကိုချစ်တဲ့
အောင်ဝင်းဟိန်း
ဆန်ဟိုဆေးမြို့(San Jose)
ကယ်လီဖိုးနီးယား(California)
အမေရိကန်ပြည်ထောင်စု(USA)



လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com