Wednesday, October 26, 2011

" အမေ့ထံသို့ပေးစာများ-၁၈..."




သို့
ချစ်တဲ့ အမေ
သားသတိတရစာရေးလိုက်ပါတယ်။
အမေနေကောင်းလား။
ကျန်းမာရေးဂရုစိုက်နော်။
ကျနော့်ကိုအမေပြောဖူးတဲ့စကားကိုအမှတ်ရတယ်။
“ သား၊ မှတ်ထားသင့်တဲ့စကားဆိုရင် အမြဲတမ်းမှတ်ထား၊
ပြီးတော့လိုက်နာနိုင်အောင်ကြိုးစားကွယ့်။
" ဘာပြောမလို့လဲအမေ"
အမေကဆက်ပြောတယ်။
"သူများထက်သာအောင်ကြိုးစားအားထုတ်ပါသားရယ်။
ဒါပေမယ့် သူများထက်သာကြောင်းကိုတော့
ဘယ်တော့မှ မပြလေနှင့်"
“ဘာဖြစ်လို့လဲအမေ”လို့ကျနော်ကနားမလည်လို့ပြန်မေးတော့
အမေကပြန်ဖြေပါတယ်။
“ လူတွေဟာ ကိုယ့်ထက်နိမ့်တယ်လို့ထင်ရင်
လွယ်လွယ်ကူကူ သနားဂရုဏာဖြစ်တတ်တယ်။
အဲဒါသဘာဝလိုဖြစ်နေတယ်။
သနားဂရုဏာဖြစ်ရင် လူ့စိတ်ကပျော့ပျောင်းတတ်တယ်။
အဲဒီအချိန်မှာ ဆက်ဆံရတာ ပိုလွယ်ကူတတ်တယ်။
လူတွေက သနားပြီးဆိုရင် အကူအညီမလိုတာတောင်မှ
အကူအညီတွေပေးတတ်တယ်။
ဒါပေမယ့် လူတွေဟာ ကိုယ့်ထက်မြင့်လာပြီလို့ထင်လာရင်
မုဒိတာမဖြစ်တတ်ဘူး။
အရင်ဆုံးဖြစ်တတ်တာက မနာလိုစိတ်ပဲ။
မနာလိုစိတ်ဖြစ်လာရင် မိတ်ဆွေတောင် ရန်သူစိတ်ဖြစ်သွားတတ်တယ်။
ရန်လိုလာတတ်တယ်။ စိတ်ဟာ ကြမ်းတမ်းသွားတတ်တယ်။
ဆက်ဆံရတာ ခက်ခဲသွားတတ်တယ်။
မနာလိုစိတ်ဟာ ဆင်းရဲမှုကို တာရှည်စေတဲ့စိတ်ဖြစ်တယ်။
ကိုယ်ရော၊စိတ်ပါဆင်းရဲစေတာပါ။
အကုသိုလ်ထဲမှာ အဆိုးဆုံးအကုသိုလ်လို့တောင် ပြောရမလားမသိဘူး။
ဒါကြောင့် သားကိုမှာချင်တာက ဘယ်သူ့အပေါ်မှ မနာလိုစိတ်မဖြစ်ပါနဲ့။
ဘယ်သူ့ကိုမှလည်း ကိုယ့်ကြောင့် မနာစိတ်မဖြစ်ပါစေနဲ့။
သတိထားဆင်ချဉ်ပေါ့သားရယ်”
ဒီစကားကိုကျနော်မမေ့ပါဘူး။
ဒီအမေရိကန်ကိုရောက်တော့ ကျနော်သတိထားဆင်ချဉ်ပါတယ်။
ကျနော်ကြိုးစားအားထုတ်မှုကို မလျော့ပါဘူး။
ဘယ်သူတွေဘာပြောပြော ကျနော်လုပ်စရာရှိတာကိုလုပ်ဖြစ်ပါတယ်။
ဆရာဝန်ဘဝကို ကျနော်မေ့ထားလိုက်တယ်။
ဆရာဝန်ဖြစ်ကြောင်းကိုလည်း အသိမိတ်ဆွေအသစ်တွေကို
မပြောပဲနေဖြစ်အောင်ကြိုးစားဖြစ်ပါတယ်။
မမေ့နိုင်သူက ကျနော့်မိန်းမ။
သူမရဲ့သဘောထားက လူတွေဟာ
ဂုဏ်သိက္ခာကိုကြည့်ပြီးဆက်ဆံတတ်ကြတော့
အမှန်ကိုတော့ပြောပြသင့်တယ်လို့ပြောတယ်။
ဂုဏ်သိက္ခာမဲ့မဲ့ ဒီကိုလာခဲ့တာမဟုတ်ဘူးဆိုတာလည်း
သူမကပြောပြန်တယ်။
ကျနော်တားကြည့်တယ်အမေ။
ဒါပေမယ့်တားလို့မရဘူး။
ကျနော်တို့ရောက်စမှာ အရမ်းအစဉ်ပြေတယ်အမေ။
ဒီမှာက ကားတွေကလည်းများလိုက်တာ၊မျက်စိနောက်စရာတောင်ကောင်းလှတယ်။
ရောက်စဆိုတော့ ကျနော်တို့မှာ ကားကမရှိဘူး။
လမ်းကိုလည်းဖြတ်မကူးတတ်ဘူး။
ဒီတော့ အဲဒီအိမ်မှာရှိတဲ့အဖွားတစ်ယောက်က
'လမ်းကူးနည်းသင်ပေးမယ်'ဆိုပြီးကားလမ်းမဘက်ခေါ်လာတယ်။
လမ်းလေးဆုံမီးပွိုင့်မှာ ရပ်ရတယ်။
မီးပွိုင့်ရဲ့မီးတိုင်မှာ ကိုယ်သွားချင်တဲ့ဖက်ကို မြှားပြထားတဲ့ခလုတ်ဖုလေးကို
နှိပ်လိုက်ရတယ်။
မကြာခင်မှာပဲ မီးပွိုင့်ကလူကူးလို့ရပြီးဆိုတဲ့အချက်ပြမီးအဖြူရောင်ကိုတွေ့ရတယ်။
အချက်ပြအသံလည်းတပြိုင်နက်ထဲကြားရတယ်။
အဲဒီတော့လာနေတဲ့ကားတွေ ရပ်ကုန်ပါလေရော။
မြန်မြန်သွက်သွက်ကူးစရာမလိုပါဘူး။
ပုံမှန်လျှောက်လို့ရတယ်။
ခွင့်ပြုချိန်ကိုလည်း အချက်ပြမီးတိုင်မှာပြနေတယ်။
အချို့ဆိုရင် ဘယ်ကားကိုမှဂရုမစိုက်ပဲ
အေးအေးဆေးဆေးကိုလျှောက်နေတော့တာပဲ။
ဒါက သူ့အခွင့်အရေးလေ။
လမ်းလျှောက်သူကိုလည်း တော်တော်ဦးစားပေးထားတာကိုတွေ့ရတယ်။
လူတိုင်းကိုယ်စီ၊အခွင့်အရေးကိုယ်စီနဲ့ပါပဲ။
သူကဘာမို့၊ငါကဘာမို့ဆိုတာမရှိကြပါဘူး။
သတ်မှတ်ထားတဲ့စည်းကမ်းနဲ့ဥပဒေကိုသာလိုက်နာရင်
အေးအေးချမ်းချမ်းနေနိုင်တဲ့နေရာတစ်ခုလို့တောင်ပြောနိုင်ပါတယ်။
အိမ်မှာအဖွားရှိသလို အဖိုးလည်းရှိတယ်။
မြေးလေးကိုဗဟိုပြုပြီးအဖိုးအဖွားလို့ခေါ်ရပေမယ့်
သူတို့အသက်က ခုနှစ်ဆယ်ပတ်ဝန်ကျင်ပဲရှိပါသေးတယ်။
အဖိုးက ကျန်းမာရေးကိုလိုက်စားတယ်။
လမ်းလျှောက်တိုင်းကျနော်ကိုခေါ်တယ်။
အနီးပတ်ဝန်ကျင်နေရာတွေဆို လမ်းလျှောက်ပြီးမရောက်ဖူးတဲ့နေရာတောင်
မရှိသလောက်ပါပဲ။
ပြီးတော့ တစ်ပတ်တစ်ခါ စက်ဘီးစီးကြတယ်။
ကျနော် စက်ဘီးမစီးတာတောင်တော်တော်ကြာပြီ။
လေးတန်းစာမေးပွဲဖြေတော့ ကျောင်းအားလပ်ရက်မှာ
သူငယ်ချင်းတွေနဲ့အတူ စက်ဘီးစီးသင်ကြတယ်။
စက်ဘီးကိုငှားပြီးသင်ကြတာပါ။
ဒူးတွေဗြဲလို့၊သွေးတွေထွက်လို့။
စက်ဘီးစီးတတ်ချင်တော့ ဘာကိုမှမကြောက်ပါဘူး။
ပျော်တောင်ပျော်နေသေးတယ်။
စက်ဘီးစီးတတ်ပြီးနောက်ပိုင်းမှာ စက်ဘီးကိုမစီးဖြစ်တော့ပါဘူး။
ဒီရောက်မှပြန်စီးရတော့ ခပ်ကြောက်ကြောက်ပဲ။
အသက်အရွယ်ရလာတော့ ကြောက်တတ်လာတာကိုတွေးပြီးပြုံးမိသေးတယ်။
စက်ဘီးစီးတဲ့ပညာက ကြာခဲ့ပေမယ့် မမေ့ဘူးဆိုတာကို
စက်ဘီးပေါ်တက်နင်းလိုက်တော့မှ သိရတယ်။
ကားလမ်းရဲ့ဘေးနားမှာ စက်ဘီးပြေးလမ်းတွေရှိတယ်။
သူ့လမ်းနဲ့သူသွားနေတာပါ။
အန္တရာယ်မရှိလောက်ပါဘူး။ဒီမှာက စက်ဘီးစီးရင် စက်ဘီးဦးထုပ်ဆောင်းရတယ်။
ညစီးရင် ညမီးပါရတယ်။
စက်ဘီးနဲ့ပတ်သက်တဲ့ကိရိယာတွေစုံလင်မှ စက်ဘီးစီးခွင့်ပြုတာကိုတွေ့ရတယ်။
စက်ဘီးပြေးလမ်းပေါ်မှာ ကျန်းမာရေးအတွက် စက်ဘီးကိုအုပ်စုလိုက်နင်းနေသူတွေကို
ခဏခဏတွေ့ရပါတယ်။
အချို့ကလည်း တစ်ယောက်ထဲပါပဲ။
အထူးသဖြင့် လူငယ်တွေအတော်များများကို
စက်ဘီးကို စတန့်ထွင်ပြီးစီးနေကြတာကိုတွေ့ရတယ်။
ကျနော်တို့နေတဲ့နေရာနဲ့မနီးမဝေးတဲ့နေရာမှာ
တောင်တက်စခမ်းတစ်ခုရှိတယ်။
စနေ၊တနင်္ဂနွေဆိုရင် လူတွေနဲ့ပြည့်လို့။
တောင်ခြေမှာ ကားတွေထားခဲ့ပြီး မိသားစုလိုက်တောင်ပေါ်တက်ကြတယ်။
ပျော်ပွဲစားထွက်ကြတယ်။
ကျနော်တို့လည်းတစ်လတစ်ကြိမ်လောက်တော့တက်ဖြစ်တယ်။
အဖိုးကဦးဆောင်သူပေါ့။
သူက တော်တော်တက်နိုင်တယ်။ကျန်းမာရေးလည်းတော်တော်ကောင်းပုံရတယ်။
တစ်နေ့မှာ ကျနော်တို့လေးယောက်တောင်ပေါ်တက်ဖြစ်တယ်။
အဖိုးရယ်၊ကျနော်ရယ်၊မြေးလေးရယ်၊မြေးရဲ့သူငယ်ချင်းရယ်။
တောင်ပေါ်မှာ လမ်းမှားလို့လေးနာရီးကျော်ကျော်ကြာခဲ့တယ်။
မရပ်မနားလျှောက်ရတော့ လူလည်းတော်တော်ပင်ပန်းတယ်။
ကြိုတင်စီစဉ်ထားတာလည်းမရှိတော့ သောက်ရေလည်းပါမလာဘူး။
ရေငတ်လိုက်တာအရမ်းပါပဲ။
အာခေါင်တွေခြောက်လာတယ်။
မြေးနဲ့သူငယ်ချင်းတွေက ခြေကုန်လက်ပန်းကျနေပြီ။
ကျနော်လည်း ဒီလိုခရီးကို ကျောင်းသားဘဝတုန်းကသာ သွားဖူးတာလေ။
အထက်တန်းကျောင်းသားဘဝတုန်းက
ခြေလျင်တောင်တက်အဖွဲ့ဝင်ဖြစ်ခဲ့ဖူးတယ်လေ။
အခုလိုမလျှောက်ခဲ့တာနှစ်ပေါင်းများစွာ။
အိနြေ္ဒမပျက်သူကတော့ အသက်အကြီးဆုံးဖြစ်တဲ့အဖိုး။
တောင်ပေါ်မှာလမ်းပျောက်ပြီး လည်နေတယ်။
လေးနာရီလုံးလုံးလမ်းလျှောက်ပြီး၊
ဘာမှစားမလာတော့ ဆာလည်းဆာလာတယ်။
ရေလည်းငတ်လာတယ်။
ဒါနဲ့ပဲ နောက်ဆုံးကိုယ့်လို မျက်စိလည်၊လမ်းမှားသူတွေနဲ့တွေ့ပြီး
အုပ်စုလိုက်ပြန်လာတော့မှ အိမ်ပြန်ရောက်တော့တယ်။
အဲဒီနောက်ပိုင်း တောင်တက်တဲ့အလုပ်ကိုမလုပ်ဖြစ်တော့ပါဘူး။
သုံးလေးရက်လောက်ကို ကိုယ်လက်တွေနာလို့
အကိုက်အခဲပျောက်ဆေးသောက်ရတဲ့အထိပါပဲ။
မိန်းမရဲ့အမယောကျာ်းကလည်း သူအလုပ်ကပြန်ရင်
အားကစားရုံတွေကိုသွားလေ့ရှိတယ်။
ရောက်ခါစဆိုတော့ ကျနော့်ကိုခေါ်သွားဖူးတယ်။
အို…အားကစားတွေကမျိုးစုံလို့ပါပဲ။
လမ်းလျှောက်စက်နဲ့လမ်းလျှောက်မလား။
စက်တွေနဲ့အလေးမမလား။
စက်တွေနဲ့စက်ဘီးစီးမလား။
ယောဂလေ့ကျင့်မလား။
စုံလိုက်တာမပြောပါနဲ့တော့။
ရေကူးကန်လည်းရှိတယ်။
ရေနွေးစိမ်ကန်လည်းရှိတယ်။
ရေနွေးငွေ့ပေါင်းခံတဲ့အခန်းလည်းရှိတယ်။
လူပေါင်းနှစ်ရာကျော်လောက်ကိုတစ်ပြိုင်နက်ထဲ
ကစားနိုင်လောက်တယ်လို့ခန့်မှန်းမိတာပဲ။
သင်တန်းဆရာတွေ၊ဆရာမတွေလည်းရှိကြတယ်။
ယောကျာ်းတွေနဲ့မိန်းမတွေရောပြီးကစားနေတာကိုလည်းတွေ့ရတယ်။
'ယောကျာ်း၊မိန်းမမရှိဘူး။ရုပ်၊နာမ်ပဲရှိတယ်'
ဆိုတာကိုတရားမှာတော့ ခဏခဏကြားဖူးတယ်။
ဒီမှာတော့ ယောကျာ်းမိန်းမမခွဲခြားထားဘူး။ရောနေတာပဲ။
ယောကျာ်း၊မိန်းမမရှိတော့သလိုပါပဲ။
သင်တန်းကြေးကတော့ တစ်လကိုဒေါ်လာသုံးဆယ်ကျတယ်။
မြန်မာငွေနဲ့တွက်ကြည့်ရင် ခန့်မှန်းခြေ တစ်လသုံးသောင်းကျပ်လောက်ဆိုတော့လည်း
ဝင်ငွေမရှိသေးချိန်မှာ မသုံးရက်ပြန်ဘူး။
နောက်တစ်ကြောင်းက ယောကျာ်းတွေရဲ့ရေချိုးခန်းမှာ အားလုံးက
မိမွေးတိုင်း၊ဘမွေးတိုင်းလုံးတီးရေချိုးနေတာကိုတွေ့တော့
မမြင်ဖူးတော့ ရှက်တာလည်းပါတယ်။
သူတို့ကတော့ အလေ့အကျင့်ဖြစ်နေပုံရပါတယ်။
ဘာမှမဖြစ်သလိုပဲ။
အဲဒီအကြောင်းတွေကြောင့် နောက်ပိုင်းမသွားဖြစ်ပြန်ဘူး။
ယဉ်ကျေးမှုမတူတဲ့နေရာမှာနေရတာ
အမြဲတမ်းတော့အစဉ်မပြေလှပါဘူး။
ယဉ်ကျေးမှုမတူတဲ့လှိုင်းလေဒဏ်ကိုတော်တော်ခံရတယ်။
အမေရေ…
မိန်းမအလုပ်ဆင်းတော့မှာမို့ သူ့ကိုသွားကြိုလိုက်ဦးမယ်။
နောက်မှ အမေရိကန်အတွေ့အကြုံကိုပြောပြပါဦးမယ်။
ဒါပဲနော်။
ချစ်တဲ့သား
အောင်ဝင်းဟိန်း
ဆန်ဟိုဆေးမြို့(San Jose)
ကယ်လီဖိုးနီးယားပြည်နယ်(California)
အမေရိကန်ပြည်ထောင်စု(USA)
၁၀-၂၆-၂၀၁၁

လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com