Tuesday, October 11, 2011

" ဘာကိုယူမလဲ..."


တစ်ခါတုန်းက အီလုံတက္ကသိုလ်မှာ

ပါမောက္ခက ကျောင်းသားကိုမေးတယ်။

“ ရွှေနဲ့အသိဥာဏ်အနက်က

ကြိုက်တာတစ်ခုကို ရွေးဆိုရင် မင်းဘာကို ယူမလဲ”

ကျောင်းသားက

“ ကျနော် ရွှေကိုယူမယ်ဆရာ”

"ဆရာဆိုရင်ရော ဘာကိုယူမလဲ"

လို့ကျောင်းသားကပြန်မေးပါတယ်။

ဆရာက

“ အသိဥာဏ်ကို ယူမှာပေါ့ကွ”

လို့ဖြေပါတယ်။

ဒီတော့ ကျောင်းသားကမှတ်ချက်ချတာက...

“ လူဆိုတာ ကိုယ့်မှာမရှိတာကို ယူတတ်စမြဲပါပဲ” တဲ့။

" အမေ့ထံသို့ပေးစာများ-၁၆..."



သို့
ချစ်တဲ့အမေ
သားသတိတရစာရေးလိုက်ပါတယ်။
အမေနေကောင်းလား၊
အမေနေကောင်းပါစေလို့ကျနော်အမြဲတမ်းဆုတောင်းနေပါတယ်။
"အရာရာဟာကောင်းဖို့ဖြစ်လာတာပါ"
လို့အမေခဏခဏပြောဖူးတဲ့စကားကို
ကျနော်မမေ့ပါဘူး။
အဲဒီစကားဟာ ကျနော့်အတွက် အမြဲတမ်းခွန်အားဖြစ်စေခဲ့ပါတယ်။
“အကောင်းလည်းမမြဲဘူး။
အဲ…အဆိုးလည်းမမြဲပါဘူး။
အကောင်းနဲ့အဆိုးဟာ ဒွန်တွဲနေတယ်။
အဆိုးကြောင့်လည်း အကောင်းတွေဟာ ပိုလှပနေတာပါ” တဲ့။
ဒါကြောင့်အဆိုးကို သတ္တိရှိရှိ ရင်ဆိုင်လိုက်စမ်းပါ" တဲ့။
ကျနော်ဟာ အမေ့သားပါ။
သတ္တိရှိတဲ့အမေရဲ့သားဖြစ်တဲ့အတွက်
သားအမြဲတမ်းဂုဏ်ယူမိပါတယ်။
ကျနော်ငယ်ငယ်က
ဒီသင်ခန်းစာကို ကောင်းကောင်းမကျေညက်ခဲ့တဲ့အတွက်
ဒီမှာ ကျနော်အလူးအလဲခံစားရတာကိုတော့ ဝန်ခံပါတယ်။
ဒီရောက်တော့ ကျနော်ကားတွေကို ကျွမ်းကျွမ်းကျင်ကျင်မောင်းတတ်နေပြီအမေ။
အမေရိကန်ရဲ့ ကားလမ်းအမျိုးမျိုးအပေါ်မှာ ကားအမျိုးမျိုးကိုမောင်းတတ်တာကိုပြောတာပါ။
ဒါဟာ ပျော်စရာကောင်းတဲ့အတွေ့အကြုံတစ်ခုပါပဲ။
ဖြစ်ပုံကဒီလိုပါ။
အိမ်မှာနေရတာ နားညီးလွန်းတာနဲ့ရရာအလုပ်တစ်ခုကို လုပ်ဖို့ဆုံးဖြတ်ဖြစ်ခဲ့တယ်။
အမေရိကန်မှာနေရတာ အလုပ်ရှိရင်လည်း ဒုက္ခ၊
အလုပ်မရှိရင်လည်း ဒုက္ခပါပဲ။
အလုပ်ရှိသူတွေရဲ့ဒုက္ခက အလုပ်ရှင်တွေရဲ့အတ္တကြောင့်ဖြစ်လာတဲ့ဒုက္ခပေါ့။
ဒီကအလုပ်ရှင်တွေက အလုပ်သမားတွေကိုလခပေးပြီးဆိုတာနဲ့
အဲဒီအလုပ်သမားဆီက လုပ်အားကို ကြံကြိတ်စက်က ကြံချောင်းရဲ့အရည်ကို
ညှစ်ယူသလိုမျိုးညှစ်ယူတာဆိုတော့ ဘယ်မှာ သက်သာမလဲ။
နှေးလိုက်တာဆိုပြီးအတင်းမောင်းတော့တာပဲ။
မကျွမ်းကျင်ရင် နှေးမှာပဲ။ ဒါကိုလက်မခံဘူး။
မြန်မြန်လုပ်။
မြန်မြန်လုပ်တော့ မသေသပ်တော့ဘူး။
မလိုချင်ဘူး။
မြန်မြန်နဲ့သပ်သပ်ရပ်ရပ်ပြီးရမယ်တဲ့။
သူတို့ပြောသလိုပြီးအောင်လုပ်နိုင်လာတော့
တန်ဖိုးပေးထားတဲ့အလုပ်ချိန်အတွင်းမှာ အအားမနေရဘူးတဲ့။
အလုပ်ပါးရင် ကျန်တဲ့အလုပ်တွေကို ရှာကြံလုပ်ရမယ် တဲ့။
ရှာကြံခိုင်းတယ်။
ပြေးနေတဲ့မြင်းတစ်ကောင်ကို အားမရလို့ကြာပွတ်နဲ့တစ်ချိန်လုံးရိုက်နေသလိုမျိုးဆိုတော့
အိမ်ပြန်လာရင် ခြေကုန်လက်ပန်းကျပြီ။
ဘာအားမှ မကျန်တော့သလိုခံစားရတယ်။
ခြေကုန်လက်ပန်းကျတယ်ဆိုတာဒါမျိုးလို့အခုမှပဲ သေသေချာချာ သိတော့တယ်။
အလုပ်မရှိသူရဲ့ဒုက္ခက စိတ်ပင်ပန်းရတာပါပဲ။
လူကတော့ မပင်ပန်းပါဘူး။
စိတ် ပင်ပန်းတာက ပိုဆိုးပါတယ်။
အလုပ်မရှိသူဟာ ငွေရေးကြေးရေးကိစ္စကိုပူပန်ရတယ်။
ငွေက တန်ခိုးကြီးတယ်။
ငွေမရှိရင် ရေရှည်ရပ်တည်နိုင်ဖို့ခက်ခဲမှန်းသိလို့စိတ်ပင်ပန်းရတာကတစ်မျိုး။
ငွေကိုတန်ဖိုးထားလွန်းတဲ့မိသားစုထဲနေမိတာကြောင့်
တစ်ချိန်လုံးအလုပ်ရှာဖို့ချည်းပြောနေတော့တာပဲ။
အင်တာနက်ထဲအလုပ်လျှောက်ရတာလည်းအမော။
အလုပ်လိုက်ရှာရတာလည်းအမော။
အလုပ်ရှားပါးတဲ့ခေတ်ရောက်မှ
ဒီကိုလာမိတဲ့အတွက် အလုပ်ကလည်းရှားလိုက်တာမပြောပါနဲ့တော့။
မိန်းမက ကျနော့်အပေါ်နားလည်မှုရှိပါတယ်။
သူတစ်ယောက် လုပ်တာက စား၊ဝတ်၊နေရေးအစဉ်ပြေပါတယ်တဲ့။
မိဘများကို လှူချင်ရင်တော့ အလုပ်ရှိရမယ်တဲ့။
ကိုယ်နဲ့သင့်တော်တဲ့အလုပ်ရမှ လုပ်ပါတဲ့။
ဒီမှာက အိုးကမပူ၊စလောင်းကပူဆိုသလိုဖြစ်နေတယ်။
ကျနော်အလုပ်မရှိတာကိုပဲ ကျနော့်မိန်းမကလွဲပြီးအားလုံးကဝိုင်းပူနေတယ်။
သူတို့ရဲ့အပူက ကူးတယ်လေ။
နားညီးလို့စာကြည့်တိုက်သွားပြီးစာဖတ်ချိန်မှာတော့ နားအေးနေပေမယ့်
အိမ်ပြန်ရောက်တာနဲ့ အို…တစ်အိမ်သားလုံး ဝိုင်းပြီးပူညံပူညံလုပ်တော့တာပဲ။
တစ်ခါမှမတွေ့ဖူးဖူး။
တစ်ပတ်၊တစ်လအလုပ်မရှိတာပဲ၊
တစ်သက်လုံးအလုပ်မရှိသလိုမျိုးပြောနေတာကိုက အံသြမိတယ်။
ကျနော့်ကို လက်ကြောမတင်းတဲ့ငပျင်းလို့ထင်နေပုံရတယ်။
သူတို့ဆိုရင် အသက်ခုနှစ်ကျော်တဲ့အထိ အချိန်ပိုင်း အလုပ်လုပ်တုန်းဆိုတာကတစ်မျိုး၊
ဆရာဝန်ဘဝကိုမေ့ပစ်လိုက်တော့ဆိုတာကတစ်မျိုး၊
အလုပ်ရှိမှ ငွေရှိမှာဆိုတာကတစ်မျိုး၊
ငွေမရှိရင် မကျန်းမာတဲ့အခါ ဆေးကုဖို့ခက်ခဲမယ်ဆိုတာကတစ်မျိုး၊
အလုပ်ဆိုရင် ဘာအလုပ် လုပ်လုပ်ဂုဏ်ရှိတယ်ဆိုတာကတစ်မျိုး၊
အို…စုံနေတာပါပဲအမေရာ။
နေ့စဉ်ကြားနေရတော့ နားညီးလာတယ်။
ဘာအလုပ်ဖြစ်ဖြစ်လုပ်မယ်လို့ ပြောလိုက်တယ်။
သူတို့ကရှာပေးရှာပါတယ်။
ကားသန့်ရှင်းရေးအလုပ်၊
ကားရေဆေးတဲ့အလုပ်ဆိုတော့ ပင်ပန်းတာပေါ့။
ပင်ပန်းတယ်လို့မညီးတော့ပါဘူး။
ဘာကြောင့်ဆိုတော့ အမေကိုလုပ်ကျွေးနေတာပဲဆိုတဲ့စိတ်နဲ့လုပ်ခဲ့တဲ့အတွက်ကြောင့်ပါပဲ။
အမေ့ကြောင့်ဆိုတဲ့စိတ်ကြောင့်ကျနော်လုပ်နိုင်ခဲ့ပါတယ်။
နေပူထဲမှာလုပ်ရတော့ နဖူးကချွေး၊ခြေမပေါ်ကျတယ်ဆိုတာကို
အခုတော့ လက်တွေ့ကြုံရပြီလေ။
တစ်ခါတစ်လေအလုပ်များလာရင် ထွက်လာတဲ့ချွေးဟာ
မျက်လုံးထဲဝင်တာတောင်သုတ်ချိန်မရပါဘူး။
မျက်လုံးစပ်လိုက်တာ၊
နေပူလိုက်တာလည်းမပြောပါနဲ့တော့။
မျက်နှာနဲ့ နေထိတဲ့အပိုင်းတွေ မဲလာတယ်။
အင်္ကျီ ဝတ်ထားတဲ့အသားကဖြူနေတယ်။
အခုမှ အမဲနဲ့အဖြူ(Black&white)ဖြစ်နေတယ်။
လက်ဆစ်တွေဟာ အလုပ်လုပ်ရလွန်းလို့ ယောင်နေတယ်။
ကိုက်နေတယ်။ အမြဲတမ်းအကိုက်အခဲပျောက်ဆေးကိုသောက်မှ သက်သာတယ်။
အကိုက်အခဲပျောက်ဆေးရဲ့ဘေးထွက်ဆိုးကျိုးတွေကိုလည်း ထည့်မတွက်နိုင်တော့ဘူး။
ဖြစ်ချင်ရာ ဖြစ်စေတော့။
အလုပ်များတဲ့အချိန်မှာ ရေငတ်လွန်းလို့ နူတ်ခမ်းတွေခြောက်လာတယ်။
ဒါပေမယ့် ရေသောက်ချိန်မရတာမျိုးလည်းကြုံရတယ်။
ကျနော့်ဘဝမှာ အပင်ပန်းဆုံးအချိန်ပါပဲ။
အဲဒီကရလာတဲ့ငွေတွေကို မသုံးရက်ဘူး။
ဘာသုံးသုံးမတန်ဘူးအမေ၊
အဲဒါကြောင့် အမေ့ဆီကို ကျနော်ပို့ပေးလိုက်ပါတယ်။
အမေလှူချင်ရာ လှူဖို့၊
အမေစားချင်ရာ စားဖို့၊
အမေသုံးချင်ရာသုံးဖို့အတွက်ပါ။
အဲဒီတုန်းကတော့ အဖြစ်မှန်ကို ကျနော်မပြောခဲ့ဘူး။
အမေမျိုမကျမှာစိုးလို့ပါ။
အမေမသုံးရက်၊မလှူရက် မှာစိုးလို့ပါ။
အခုတော့ ကျနော်မလိမ်ချင်ဘူးအမေ။
အမေပြောခဲ့ဖူးတယ်လေ။
“လိမ်ရလောက်အောင် ထိုက်တန်တဲ့လူဆိုတာမရှိပါဘူး။
ဘုရားကိုချစ်ရင် ဘုရားစကားကိုနားထောင်ပါ။
ဘုရားကြိုက်အောင်နေဖို့ကအရေးအကြီးဆုံးပဲဆိုတာလေ”
အဲဒီကာလတုန်းက နောက်ကြောင်းပြန်လှည့်ပြေးချင်စိတ်အကြိမ်ကြိမ်ဖြစ်ပေါ်လာခဲ့တယ်။
ဒါကို ကျနော်ဝန်ခံပါတယ်။
ဒါပေမယ့် အမေ့စကားကြောင့် နောက်ကြောင်းပြန်မပြေးဖြစ်ခဲ့ပါဘူး။
တစ်ခါတုန်းက ကျနော့်ဘဝနဲ့ပတ်သက်ပြီး ရှေ့တိုးရမလား၊နောက်ဆုတ်ရမလားဆိုတာ
မသဲကွဲတော့ အမေ့ကိုမေးဖူးခဲ့တယ်လေ။
အမေက
“ ဘဝမှာ ရှေ့တိုးရမလား၊ နောက်ဆုတ်ရမလားဆိုတာ မသဲကွဲတဲ့အခါတိုင်း
သားမှတ်ထား၊
အမြဲတမ်းရှေ့ကိုတိုး၊
ရှေ့ကိုတိုးတဲ့အခါ နှစ်ခုတွေ့နိုင်တယ်။
တစ်ခုက အောင်မြင်မှု၊
အောင်မြင်တဲ့ဘဝကို ရနိုင်တယ်ဆိုတာ ရှေ့တိုးတဲ့သူတွေပဲ ရနိုင်တဲ့ရလာဒ်ပဲသား၊
နောက်တစ်ခုက သင်ခန်းစာ၊
ဆုံးရှုံးမှုတွေ့ရတဲ့တိုင်အောင် အရှုံးကနေ သင်ခန်းစာတွေအများကြီးရနိုင်တယ်
အဲ နောက်ကိုဆုတ်လာတဲ့အခါမှာတော့
ကိုယ့်ဘဝကို ကိုယ်မကျေနပ်တဲ့စိတ်ဓာတ်ဆုံးရှုံးမှုကပိုကြောက်စရာကောင်းတယ်။
နောက်ပြီးနောက်ဆုတ်တာဟာ အကျင့်ပါတတ်တယ်။
အဲဒီအကျင့်က အကျင့်ဆိုးဖြစ်တယ်။

နောက်တစ်ခုက
ဘယ်ဘက်လမ်းကိုသွားရမလား၊
ညာဘက်လမ်းကိုသွားရမလားဆိုတာ ဝေခွဲမရတိုင်း
ခက်ခဲတဲ့လမ်းကိုရွေးချယ်ပါသား၊
ခက်ခဲတဲ့လမ်းမှာ အခွင့်အလမ်းတွေအများကြီးရှိနိုင်တယ်။
ဘာကြောင့်ဆိုတော့ လူတကာ မသွားတဲ့အတွက်ကြောင့်ဖြစ်တယ်။
လွယ်တဲ့လမ်းက လူတကာလျှောက်နေကျလမ်းလေ ”
အမေ့စကားကြောင့် သားနောက်မဆုတ်ပါဘူးအမေ။
စိတ်ချပါ။
သားရွေးချယ်တဲ့လမ်းဟာ ခက်တဲ့လမ်းဖြစ်ကောင်းဖြစ်နိုင်တယ်။
အခက်အခဲတွေအများကြီးတွေ့နေရလို့လေ။
သားရှေ့ကိုတစ်လှမ်းချင်းတိုးသွားမယ်။
နှေးကောင်းနှေးနေရင်တောင်မှ သားရပ်မနေပါဘူး။
တစ်လှမ်းချင်းတစ်လှမ်းချင်း ရှေ့ကိုတိုးသွားနေမယ်လို့
အမေ့ကို ထပ်ပြီးကတိပေးပါတယ်။
အဆိုးတွေကြားကကောင်းတာတွေကတော့ အများကြီးပါအမေ။
တစ်ခုက ကားမောင်းကျွမ်းကျင်လာတယ်။
ကားအမျိုးမျိုးကိုမောင်းခွင့်ရလာတယ်။
ဘာသာစကားကျွမ်းကျင်လာတယ်။
လူအများနဲ့ဆက်ဆံခွင့်ရလာလို့လေ။
နောက်တစ်ခုက ကိုယ့်ကိုယ်ကိုယ် ယုံကြည်မှုပိုတိုးလာတယ်။
နောက်တစ်ခုက ချွေးနဲ့သွေးနဲ့အမေ့ကိုလုပ်ကျွေးခွင့်ရလာပါပဲ။
သွေးဆိုတာက…
အမေရေ..လုပ်ငန်းကမကျွမ်းကျင်တော့
ခဏခဏထိခိုက် ဒဏ်ရာတွေရလို့လေ။
ကျနော့်လက်မှာ အမြဲတမ်း ဒဏ်ရာတွေနဲ့။
အမေကျန်းမာရေးကိုဂရုစိုက်နော်။
ချစ်တဲ့သား
အောင်ဝင်းဟိန်း
ဆန်ဟိုဆေးမြို့(San Jose)
ကယ်လီဖိုးနီးယားပြည်နယ်(California)
အမေရိကန်ပြည်ထောင်စု(USA)
၁၀-၁၁-၂၀၁၁

လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com