Friday, August 2, 2013

"အမေ့ထံသို့ ပေးစာများ-၈၁..."




သို့
ချစ်တဲ့အမေ
သားသတိတရ စာရေးလိုက်ပါတယ်။
အမေ နေကောင်းလား။
ကျနော်တို့လည်း နေကောင်းကြပါတယ်။
ကျနော်တို့ ရဲ့လုပ်ငန်းက အစဉ်ပြေပါတယ်။
ဒါပေမယ့် မထင်မှတ်တဲ့အခက်အခဲတွေတော့ ရှိနေပါတယ်။
ကျနော်တို့အလုပ်က ထမင်းရောင်းတဲ့အလုပ်လေ။
ထမင်းဖြစ်ဖို့ ဆန်ကိုနေ့တိုင်း ချက်ရတယ်။
ထမင်းကလည်း တစ်နေ့ထက်တစ်နေ့၊တစ်ပတ်ထက်တစ်ပတ် ပိုပိုချက်နေရတယ်။
တစ်နေ့မှာ ထမင်းချက်ရင်းနဲ့လုပ်ငန်းသုံးထမင်းအိုး လုံးဝ သုံးမရအောင် ဖြစ်သွားတယ်။
လျှပ်စစ် ထမင်းအိုးပါ။
ဖြစ်တဲအချိန်က ညနေခင်း။
ဖြစ်စဉ်ကို တာဝန်ကျမန်နေဂျာကို ပြောပြလိုက်တယ်။
မန်နေဂျာက လုပ်ငန်းသုံးလျှပ်စစ်ထမင်းအိုးရောင်းတဲ့ဆိုင်ကို စုံစမ်းပေးပါတယ်။
အစဉ်မပြေပါဘူး။
နောက်တစ်နေ့အတွက် နံက်ပိုင်းကို လုပ်ငန်းကို ရပ်ထားရမယ့်အခြေအနေဖြစ်နေတယ်။
ထမင်းအိုးကိစ္စဟာ ဒီလောက်အရေးကြီးမယ်လို့ တစ်ခါမှ မတွေးဖြစ်ခဲ့ဘူး။
နောက်ဆုံးတော့ အတွေ့အကြုံရှိမယ်ထင်တဲ့ ကုမ္ပဏီက သင်တန်းဆရာဆီကို
ဖုံးဆက်ဖြစ်တယ်။
အဲဒီဆရာက ပြောတယ်။
အဲဒီထမင်းအိုးကိစ္စက ကျနော်တို့လာပို့ပေးမယ်ဆိုရင် နေ့လည်ဖြစ်ဖြစ်၊ညနေဖြစ်ဖြစ်
အဲဒီအချိန်လောက်မှ ရောက်လာမှာ။
နံနက်ပိုင်း အလုပ်ပျက်မှာ သေချာတယ်။
အလုပ်မပျက်ချင်ရင်တော့ ကိုယ်တိုင်လာယူတာ အကောင်းဆုံးဖြစ်မယ်ထင်တယ်တဲ့။
နံနက်ပိုင်းလေးကို အချိန်မှီလုပ်ရတဲ့အလုပ်က နံနက်ပိုင်းမလုပ်ဖြစ်ဘူးဆိုတာနဲ့
တစ်နေ့လုံးအလုပ်ပျက်တာနဲ့အတူတူပါပဲ။
ဘယ်လိုလုပ်မလဲ။
ယုံယုံက တစ်နေ့တာ အလုပ်ပျက်မှာ မလိုလားဘူး။
အလုပ်ပျက်တာဟာ အရှိန်ပျက်သွားတာနဲ့အတူတူပဲတဲ့။
လာနေကျ ဖေါက်သည်တွေ လာပြီး စားနေကျဆူရှီးကို မတွေ့ရင်
ဖေါက်သည်ပျက်သွားတာနဲ့အတူတူပဲတဲ့။
အေးချမ်းတဲ့ယုံယုံဟာ အမေရိကားရောက်လာပြီးနောက်ပိုင်းမှာ လောဘယုံယုံဖြစ်နေပြီလို့
ပြောရမယ်ထင်တယ်။
လောဘရဲ့သဘောက ပူလောင်တယ်။
အပူဟပ်တော့ ပူတယ်။
ဘဲနဲ့လုပ်မလဲ။
ဒီလိုနဲ့နောက်ဆုံးမှာ ကုမ္ပဏီရှိရာ တောင်ပိုင်းကာရိုလိုင်းနားကို ကားမောင်းသွားရတာပေါ့။
ဂျော်ဂျီယာနဲ့တောင်ပိုင်းကာရိုလိုင်းနားဟာ မိုင်ပေါင်းတစ်ရာကျော်တယ်။
ကားမောင်းသွားရင် နှစ်နာရီပတ်ဝန်ကျင်လောက်မောင်းရတယ်။
ကျနော်တို့ကားဓာတ်ဆီဖြည့်ပြီး ထွက်တဲ့အချိန်ကို ကြည့်လိုက်တော့ ည၉း၀၀နာရီရှိနေပြီ။
ညဖက်ကို ကားမမောင်းချင်ပေမယ့် အရေးအကြောင်းဖြစ်လာတော့ မောင်းရတာပါပဲ။
ယုံယုံက ပျော်နေတယ်။
အကြောင်းက နှစ်ခုရှိတယ်။
အကြောင်းတစ်ခုက သူမ လိုချင်တဲ့လုပ်ငန်းသုံးထမင်းအိုး အသစ်ကို အလုပ်မပျက်ပဲ
ရမှာဖြစ်လို့။
နောက်တစ်ကြောင်းက ခရီးရှည်တစ်ခုကို ထွက်လာလို့။
ကျနော်တို့လည်း လေးငါးခြောက်လလောက်မှာ ဘယ်မှမသွားနိုင်ပဲ
အလုပ်က အိမ်၊
အိမ်က အလုပ်။
အလုပ်ပြီးအလုပ်၊
အိမ်ရောက်ရင် စား၊နား၊အိပ်။
အိပ်ယာကနိုးရင် အလုပ်။
ပိတ်ရက်မရှိ၊ နားရက်မရှိ။
ကြာလာတော့ ငြီးငွေ့သလို ခံစားလာရတယ်။
ဘယ်လိုလုပ်မလဲ။
ကိုယ်ရွေးချယ်တဲ့လမ်း ကိုယ်လျှောက်ရမယ့်တာဝန်က ရှိနေတယ်။




စောစောပိုင်းတုန်းကတော့ မနားတတ်ဘူး။မစားတတ်ဘူး။
တော်တော် ဒုက္ခရောက်တယ်။
တစ်နေ့ကို ဆယ့်နှစ်နာရီကျော်ကျော်အလုပ် လုပ်ရတယ်။
ဘယ်သူမှ မောင်းနေတာမဟုတ်ဘူး။
လောဘက မောင်းနေတာလေ။
ရောင်းရလေ၊ လုပ်လေ။
လုပ်လေ ရောင်းရလေ ဖြစ်နေတော့
ဂျာအေး သူ့အမေရိုက်သလို ခြာလပတ်လည်နေတယ်။
အလုပ်ချိန်မှာတော့ ထိုင်ရတယ်မရှိပါဘူး။
ထိုင်ပြီးလုပ်ရတဲ့အလုပ်မဟုတ်တော့ မထိုင်ရဘူး။
အလုပ်ချိန်မှာတော့ တောက်လျှောက် မတ်တတ်ပါပဲ။
နားချိန်မှာ ထိုင်ရရင် ဘယ်လိုအရသာရှိမှန်း မပြောတတ်အောင်ပါပဲ။
ထိုင်ပြီးရင်လည်း မထချင်တော့ဘူး။
အတွေ့အကြုံက သင်လာတော့ တတ်လာတာ တစ်ခုက
ထိုင်လို့ရတဲ့နေရာမှာ ထမနေတော့ဘူး။
အိပ်လို့ရတဲ့နေရာမှာလည် ထိုင်မနေတော့ဘူး။
နားတတ်တော့ အစဉ်ပြေလာတယ်။
စားချိန်ကတော့ နေ့လည်စာကို နေ့လည် ၂း၀၀နာရီနောက်ပိုင်းမှ စားရတာများတယ်။
နောက်ပိုင်းတော့ ၃း၀၀နာရီကျော်မှ စားရတယ်။
အခုဆိုရင် ညနေ ၄း၀၀နာရီကျော်မှ စားရတာများတယ်။
စောစောပိုင်းကတော့ ကျနော်အလုပ်မကျွမ်းကျင်လို့ နောက်ကျတာပါ။
နောက်တော့ စားသုံးသူတွေ များလာလို့။
အချို့စားသုံးသူတွေကလည်း ရှိနေတဲ့ဆူရှီးတွေကို မယူပဲ အော်ဒါမှာ စားကြတယ်။
အကျင့်လုပ်လိုက်မိတော့ အကျင့်ဖြစ်သွားရော။
ထမင်းစားတော့မယ်လုပ်ရင် အော်ဒါလာမှာနေတာနဲ့နောက်ကျသွားလိုက်တာ
အချို့နေ့များမှာဆိုရင် ညနေ၆း၀၀နာရီကျော်တဲ့အထိ နေ့လည်စာကို မစားရသေးဘူး။
ဒါလည်း အတွေ့အကြုံက သင်ပေးတော့ စားတတ်လာတယ်။
စားသုံးသူတွေအတွက် Sample လုပ်ရင်း အဲဒီ Sample ကို စားရင်းနဲ့ ဗိုက်ပြည့်သွားတဲ့နေ့ပေါင်းများစွာ။
စားသုံးသူက Sample တစ်ခုလောက်သာ စားတာ။
ကျနော်က Sample လုပ်ရတဲ့သူဆိုတော့ Sample အခုပေါင်းများစွာ။
အခု စားတတ်၊နားတတ်တော့ ကိုယ်အလေးချိန်တွေ တက်လာတာလည်း သိသိသာသာ။
အခုနေများ အမေ ကျနော်ကိုတွေ့ရင် မှတ်မိမယ်တောင် မထင်ဘူး။
မြန်မာပြည်မှာတုန်းက တစ်ခါမှ အဲဒီလောက် မဝဖူးဖူး။






ကားကို သတိနဲ့မောင်းရင်းနဲ့ည ၁၁း၀၀ကျော်တော့ တောင်ပိုင်းကာရိုလိုင်းနားမှာ ရှိတဲ့ကုမ္ပဏီကို ရောက်လာတယ်။
ည၁၁း၀၀ဆိုတာ သူသူငါငါ အိပ်ချိန်ပါပဲ။
သင်တန်းဆရာလည်း စောင့်ပေးရှာပါတယ်။
လိုအပ်တဲ့ပစ္စည်းတွေကို ဂိုဒေါင်မှာ သူနဲ့အတူသွားယူကြတယ်။
ညည့်နက်နေပြီမို့ သူ့ရဲ့အိမ်မှာပဲ အိပ်ဖို့ပြောပါတယ်။
နောက်တစ်နေ့နံနက်မှ စောစောထွက်သွားဖို့။
နံက်ခြောက်နာရီအလုပ်ခွင်ဝင်ဖို့ဆိုတာ အိပ်တာထက် မောင်းပြီးပြန်တာက
ပိုစိတ်ချရမှာမို့ သင်တန်းဆရာရဲ့ဖိတ်ခေါ်ချက်ကို ငြင်းလိုက်ရပါတယ်။
ညဥ့်နက်ချိန် ၁၂း၀၀နာရီကျော်တော့ ကိစ္စတွေလည်း ပြီးစီးပြီမို့
ကားမောင်းပြီး ပြန်ခဲ့ပါတယ်။
အပြန်လမ်းမှာတော့ တစ်နေ့လုံးပင်ပန်းထားတဲ့ယုံယုံက အိပ်ပြီးလိုက်လာပါတယ်။
ကျနော်ကတော့ ကားမောင်းနေရတာမို့ အိပ်လို့မဖြစ်ဘူးလေ။
နံက် ၂း၀၀နာရီကျော်မှ နေထိုင်ရာ အိမ်ကိုပြန်ရောက်ပါတယ်။
လုပ်ချင်တဲ့ကိစ္စပြီးမြောက်သွားတာမို့ ပင်ပန်းပေမယ့် ကျေနပ်မိပါတယ်။



အမေရိကန်ရောက်ပြီးနောက်ပိုင်း
ဒဿဂီရိလို ခေါင်းဆယ်လုံးမလိုချင်ဘူးအမေ၊
ခေါင်း သုံးရတဲ့အလုပ်က သိပ်မရှိတော့ ခေါင်းဆယ်လုံးဟာ
မလိုအပ်ဘူးလေ။
ဒါပေမယ့် လက်ခ်ျမီးမယ်တော်လို
လက်ဆယ်ဖက်တော့ လိုချင်တယ်။
လုပ်စရာက များလွန်းနေတော့ လက်နှစ်ဖက်နဲ့အလုပ်လုပ်ရတာ မလုံလောက်သလို
ဖြစ်နေတယ်။
အလုပ်ခွင်ထဲရောက်ရင် ဘေးပတ်ပတ်လည်မှာ အလုပ်တွေက ဝိုင်းနေတယ်။
ဆယ်ဆက်သလို ဆက်တိုက်လုပ်တာတောင်
ဈေးကြီး ပိတ်ချိန်မှာ အလုပ်က မပြီးချင်ဘူးလေ။
တစ်ခါတစ်လေ အလုပ်တွေကို
အိမ်ယူပြီးလုပ်ရတာမျိုးတောင် ရှိနေတယ်။
အလုပ်ကို အိမ်ယူလုပ်တာမျိုးဟာ လုပ်နည်းလုပ်ဟန် မှားနေသလို ခံစားမိတယ်။
မလုပ်ရင်လည်း နောက်တစ်နေ့ ကသောင်းကနင်းဖြစ်ကုန်ရော။
တစ်ခုခုများ မှားနေသလားလို့ တွေးမိတယ် အမေ။
ဒီလိုတွေးမိတော့ အမေပြောပြဖူးတဲ့ပုံပြင်တစ်ပုဒ်ကို ပြန်သတိရမိတယ်။
တစ်ခါတုန်းကပေါ့။
တောရွာလေးတစ်ခုမှာ ဝီရိယကောင်းလှတဲ့ သစ်ခုတ်သမားတစ်ယောက်ရှိလေရဲ့။
အဲဒီသစ်ခုတ်သမားဟာ အလုပ်လုပ်တဲ့နေရာမှာ ဇွဲလည်း ကောင်းလှတယ်။
နံနက်စောစော နွားလှည်းကိုမောင်းပြီး တောထဲကို ထွက်သွားတယ်။
ပြီးတော့ သစ်တွေ ခုတ်တာပေါ့။
တစ်နေ့ကို သစ်တွေ လှည်းအစီးပေါင်း နှစ်ဆယ်လောက် ရတယ်။
ရက်နည်းနည်းကြာလာတော့ အစီးပေါင်း ဆယ့်ရှစ်စီးလောက်ပဲရတယ်။
အဲဒီသစ်ခုတ်သမားဟာ မကျေနပ်တော့ နံနက်စောသထက်စောစော
အိမ်ကထွက်ပြီးသစ်သွားခုတ်တယ်။
ဒါပေမယ့် သစ်အရည်အတွက်ဟာ တိုးမလာပဲနဲ့လျော့သထက်
လျော့လာတယ်။
တစ်နေ့ကို လှည်းအစီးပေါင်း ဆယ်စီးလောက်ပဲရတဲ့အချိန်မှာ
သစ်ခုတ်သမားဟာ တော်တော်စိတ်ညစ်လာတယ်။
အကြောင်းရင်းကိုလည်း ရှာမရဘူးဖြစ်နေတယ်။
နောက်ဆုံးတော့ ရွာက ပညာရှိလို့သတ်မှတ်ထားတဲ့အဖိုးအိုတစ်ယောက်ကို
သွားမေးကြည့်တယ်။
“တစ်နေ့ထက်တစ်နေ့ စောသထက်စောစော သွားပြီး သစ်ခုတ်ပေမယ့်
အစီအရည်အတွက်က တိုးမလာပဲ ကျသထက်ကျလာတယ်။
အဲဒါ ဘာကြောင့်ဖြစ်သလဲ” လို့မေးတော့
အဖိုးအိုက “မင်း ပေါက်ဆိန်ကို မသွေးတာ ဘယ်လောက်ကြာပြီလဲ”
သစ်ခုတ်သမားဟာ “တစ်နေကုန်တစ်နေခန်းအလုပ်လုပ်နေရလို့
ပေါက်ဆိန်ကို မသွေးဖြစ်တာတောင် တော်တော်ကြာသွားပြီအဖိုး”
“အေး…ပေါက်ဆိန်ကိုနေ့တိုင်းသွေးပေးပါ။
ပေါက်ဆိန် သွေးချိန်ဟာ ခဏသာကြာပေမယ့်
သစ်အရည်အတွက် အများကြီးတိုးတက်လာတာကို
အံသြစရာကောင်းလောက်အောင် မင်းတွေ့ရလိမ့်မယ်”
လို့အဖိုးအိုကပြောလိုက်တယ်။



အခုကျနော်တွေ့နေရတဲ့အခက်အခဲက ပေါက်ဆိန်သွေးချိန်မရှိတာပဲ။
အချိန်တွေအများကြီးပေးပြီး ခုတ်နေပေမယ့် ပေါက်ဆိန်သွေးချိန်မရှိတာကို
စိတ်ရှုတ်လှတယ်အမေ။
စာလည်း ရှည်သွားပြီ။
နောက်မှပဲ ရေးပါတော့မယ်။
အမေရေ…ကျန်းမာရေးကို ဂရုစိုက်ပါ။

အမေ့ကိုချစ်တဲ့သား
အောင်ဝင်းဟိန်း
အေသင်မြို့၊
ဂျော်ဂျီယာပြည်နယ်၊
အမေရိကန်ပြည်ထောင်စု။
၈-၂-၂၀၁၃



လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com