Wednesday, April 30, 2014

"အမေထံသို့ ပေးစာများ-၉၅..."




သို့
ချစ်တဲ့အမေ
သားသတိရစွာဖြင့် စာရေးလိုက်ပါတယ်။
အမေ နေကောင်းလား။
ခါးနာလို့ ဆေးခန်းသွားရတယ်လို့ အမေရဲ့မြေးကပြောတယ်။
အခု သက်သာသွားပြီးလား။
ကျနော်လည်း လူတော့ နေကောင်းပါရဲ့။
တစ်ခါတစ်ရံ စိတ်နေမကောင်းဘူး။
ဘယ်လွမ်းမှန်းမသိဘူး၊ မြန်မာပြည်ကိုလွမ်းတာလား။
အမေ့ကို လွမ်းတာလား။ရွှေတိဂုံဘုရားကိုလွမ်းတာလား။
ဘာကိုလွမ်းမှန်းမသိဘူး။
အဲဒီလိုအချိန်မှာ ဘယ်သွားချင်မှန်းမသိဘူး။
ဘာလုပ်ချင်မှန်းမသိဘူး။
ကျနော်ငယ်စဉ်တုန်းက အမေကြီးလို့ခေါ်တဲ့ အဖွားဒေါ်နှင်းသုန်အကြောင်းကို
တွေးမိတယ်။
အဖေကွယ်လွန်သွားတော့ အမေက ငယ်ငယ်ရွယ်ရွယ်နဲ့မုဆိုးမဖြစ်သွားတယ်။
ပြီးတော့ အမေက သမီးအကြီးဆုံး၊ ပြီးတော့ လင်ခေါ်ရာနောက်ကိုလိုက်ရင်း
အမေကြီးနဲ့အဝေးဆုံးဖြစ်တဲ့ရန်ကုန်မြို့ကို ရောက်နေတယ်။
အမေက ရန်ကုန်မှာ၊
အမေကြီးက ထင်းရူးကျေးရွာမှာ၊
သမီးကြီးကို စိတ်မချတဲ့အတွက် ထင်းရူးကျေးရွာက မော်လမြိုင်မြို့က်ိုမီးရထားစီးရတယ်။
တစ်နေကုန်စီးရတယ်။
မော်လမြိုင်မြို့ကနေ မုတ္တမကို သံလွင်မြစ်ကို ဖြတ်ဖို့ သဘောင်္စီးရတယ်။
စီးသူများလွန်းလို့ ကြောက်စရာကောင်းလှတယ်။
မုတ္တမဘူတာကနေ ရန်ကုန်ကို မီးရထားစီးရပြန်တယ်။
ဒါလည်း တစ်နေကုန်ပါပဲ။
ရန်ကုန်မြို့ကိုရောက်တော့ အငှားကားနဲ့သမီးကြီးအိမ်ကို သွားရတယ်။
အမေအိမ်ရောက်တော့ အမေကြီး ဖတ်ဖတ်ကိုမောနေပြီ။
အဲဒီအချိန်မှာ အမေကြီးက ကွမ်းကို ထောင်းပြီးစားတယ်။
အသက်အရွယ်ကြောင့် သွားတွေမကောင်းတော့ဘူးလေ။
သွားအစား ထောင်းဆုံက ကျေအောင် ထောင်းပေးတယ်။
ကြိုက်တော့လည်း နည်းလမ်းရှာတာပေါ့လေ။
ဖက်ဖူးဆေးလိပ်ကို ကိုယ့်ဘာသာကိုယ်လိပ်သောက်တယ်။
အဲဒါတွေက အမေကြီးရဲ့အမောပြေဆေးတွေပဲလေ။
လမ်းပြန်ဆက်သွယ်ရေးမကောင်းတဲ့အတွက် ဒီခရီးကို နှစ်ရက်၊သုံးရက်စီးလာရတော့
အမေကြီး ရန်ကုန်ရောက်ရင် ကိုယ်လက်တွေ နာနေပြီ။
အမေကြီးက ခြံထွက်ပစ္စည်းတွေ အများကြီးသယ်လာတာလည်း
နေမကောင်းဖြစ်စေရတဲ့အကြောင်းရင်းတစ်ခုဖြစ်နိုင်တယ်။
ရန်ကုန်မှာ သိပ်ကြာကြာမနေဖြစ်ပါဘူး။
နေမကောင်းဖြစ်ရင် အမေကြီး ရွာပြန်ပြီ။
အမေကြီးနေတဲ့ရွာက ထင်းရူးကျေးရွာ၊ သံဖြူဇရပ်မြို့နယ်မှာ။
ရန်ကုန်နဲ့ဆိုရင် အလွန်ဝေးတဲ့ခရီးတစ်ခုဖြစ်သလို အသက်အရွယ်ကြီးတဲ့အမေကြီးအတွက်
အဖေါ်မပါပဲ သွားလာဖို့ မလွယ်တဲ့ ခရီးတစ်ခုလည်း ဖြစ်တယ်။
ဒါပေမယ့် အမေကြီးက မမှုပါ။
ရန်ကုန်ကို လာချင်ရင် လာလိုက်၊ ရွာကိုပြန်ချင်ရင် ပြန်လိုက်နဲ့အလုပ်ရှုတ်နေတယ်။
အကြိမ်ကြိမ်အခါခါ ဖြစ်လာတော့ အမေကြီးကို မေးကြည့်ဖြစ်တယ်။
“ဘာဖြစ်လို့ ခဏခဏ ရန်ကုန်ကိုလာရတာလဲ အမေကြီး…”
အမေကြီးက…
“ငါ့သမီးကြီးဖြစ်တဲ့နင်တို့ရဲ့အမေကို သတိရလို့လာတာပါကွယ်။
နင့်တို့ရဲ့အမေက သားသမီးတွေ အများကြီးနဲ့၊
လင်ယောကျာ်းလည်း မရှိတော့ ငါသနားမိတယ်။
ဒါကြောင့်ငါနိုင်သလောက်ခြံထွက်ပစ္စည်းတွေယူပြီး လာကူညီတာလည်းပါတာပေါ့လေ”

“ရန်ကုန်မှာ ခဏလေးနေပြီး နေမကောင်းတဲ့အခါတိုင်း ရွာကိုပြန်တာက
ဘာဖြစ်လို့လဲ”
အမေကြီးက ချက်ချင်းမဖြေပါ။
တွေတွေငေးငေးဖြစ်သွားတယ်။ ပြီးတော့မှ လေးလေးပင်ပင်ဖြေပါတယ်။
"ငါ သေရမှာ မကြောက်ပါဘူး။
ဒါပေမယ့် ရန်ကုန်မှာတော့ မသေချင်ဘူး။
ရွာမှာပဲ ပြန်သေချင်တယ်"

"သေတာပဲ အမေကြီးရယ်…
ရန်ကုန်နဲ့ရွာက ဘာများကွာလို့လဲ"

"အေး…အခြားသူတွေအတွက် မကွာပေမယ့်
ငါ့အတွက်တော့ ကွာခြားပါတယ်။
ရွာမှာက ငါချစ်တဲ့ယောကျာ်းခေါင်းချသွားတဲ့နေရာလေ။
သူသေသွားတဲ့နေရာနားမှာပဲ ငါသေချင်တယ်"

"အမေကြီးရဲ့ယောကျာ်းကို အမေကြီး တော်တော်ချစ်လား"

အမေကြီးရဲ့မျက်လုံးဟာ ရီဝေသွားတယ်။
နှုတ်ခမ်းဒေါင့်လေးမှာ အပြုံးလေးတစ်ချက်ဝင့်သွားတယ်။
"မငြားခင်တုန်းကတော့ မချစ်ခဲ့ပါဘူး။
မိဘတွေပေးစားတော့ ငိုလိုက်ရတာ ၇-ရက်တောင်ကြာတယ်။
မိဘတွေကို မလွန်ဆန်နိုင်လို့ နောက်ဆုံးမှာ ယူလိုက်ရတယ်။
နောက်တော့ ….သူ(နင့်တို့ရဲ့အဖိုး) လယ်တောက ပြန်ချိန်မှာ အိမ်ပြန်မရောက်ရင်
မျှော်ရတာ အမောပါပဲ။
အဲဒါကို အချစ်လို့ပြောရင် နင့်တို့အဖိုးကို ငါချစ်သွားတယ်ပေါ့ကွယ်…"
ပြီးတော့ အမေကြီးဆက်ပြောတာက...
"အဲဒီအချစ်ကြောင့်လို့ထင်ပါတယ်။
သူသေသွားတဲ့နေရာလေးမှာ ငါခေါင်းချဖို့ဆုံးဖြတ်ဖြစ်ခဲ့တယ်"

+++++++++++++++++++++++++++++

အမေကြီးပြောခဲ့တာကြာပါပြီ။
အမေကြီးကွယ်လွန်သွားတာတောင် နှစ်ပေါင်းနှစ်ဆယ်ကျော်လာခဲ့ပြီ။
အမေကြီးဟာ သူ ဖြစ်ချင်တဲ့ဆန္ဒ အတိုင်းပါပဲ။
အဖိုးကွယ်လွန်တဲ့နေရာမှာပဲ ကွယ်လွန်သွားခဲ့တယ်။

++++++++++++++++++++++++

အမေကြီး ကို အခုမှပဲ နားလည်လာမိတယ်။
အမေကြီးကိုလည်း ကိုယ်ချင်းစာလာမိပါတယ်။
အမေကြီး နေမကောင်းဖြစ်တော့ ရွာမပြန်စေချင်တာနဲ့ အမေကြီး
ကလည်း ခဏခဏနေမကောင်းဖြစ်နေတာပဲလို့ပြောတော့
အမေကြီး
က အေးအေးဆေးဆေးပြန်ပြောတယ်။
"အေး အဲဒီရောဂါတွေကို ငါ ယူမသွားပါဘူး။
နင်တို့အတွက် ထားခဲ့မှာပါ" တဲ့။

++++++++++++++++++

အခုတော့ အမေကြီးပြောတဲ့အတိုင်းပါပဲ။
အမေကြီးဖြစ်ခဲ့တဲ့ရောဂါတွေဟာ ကျနော်တို့အတွက်အမွေအဖြစ်
ကျန်ခဲ့ပါတယ်။
အမေကြီး ကွယ်လွန်ပြီးနောက် ယူမသွားတဲ့ရောဂါတွေဟာ
ကျနော်တို့ဆီမှာ ဆက်ဖြစ်နေပါတယ်။
အခုလောလောဆယ်ဖြစ်နေတဲ့ဝေဒနာကတော့ သွားကိုက်တဲ့ဝေဒနာ။
အခံရခက်လိုက်တာ။
သွားကိုက်တော့ ခေါင်းပါကိုက်လာတယ်။
နောက် နားလည်းကိုက်လာတယ်။ညာဖက်အောက်ဖက်က အံဆုံမှာဖြစ်တာ။
မြန်မာပြည်မှာနေတုန်းက အဲဒီသွားမှာ အပေါက်ဖြစ်တော့ သွားဆရာဝန်ကိုသွားပြတယ်။
ဆရာဝန်က အဲဒီသွားကို ဖါပေးလိုက်တယ်။
အခုတော့ အဲဒီဖါထားတဲ့အဖါရာအောက်မှာ လှိုင်ခေါင်းဖြစ်နေတယ်။
အစာစားလိုက်တိုင်း အဲဒီအထဲကို အစာတွေဝင်တယ်။
အစာစားပြီးတိုင်း သွားသန့်ရှင်းရေးလုပ်ရတယ်။
အရင်ဆုံးတော့ floss ဆွဲရတယ်။
လုပ်ငန်းခွင်မှာ ဖလော့ဆွဲဖို့အဆင်မပြေရင်တော့ သွားကြားထိုးတံသုံးရတယ်။
နောက် သွားတိုက်ရတယ်။ နောက် Listerine cool Mint ကို အသုံးပြုရတယ်။
ရံဖန်ရံခါ မြန်မာဆန်ဆန် ဆားရည် ငုံတာမျိုးလည်း လုပ်ဖြစ်သေးတယ်။
ဘယ်လောက်ပဲ ဂရုစိုက်စိုက်ပါ။ နာချိန်တန်လာတော့လည်း နာလာတော့တာပဲ။
ကိုက်ချိန်တန်တော့လည်း ကိုက်လာတော့တာပဲ။
အခု သွားကိုက်တာ တစ်လကျော်ပြီ။
ဆရာဝန်ပြဖို့ စဉ်းစားဖြစ်ပါတယ်။ဒါပေမယ့်….အဖြစ်အပျက်တစ်ခုက ခြောက်လှန့်နေတယ်။
ကာလီဖိုးနီးယားမှာနေတုန်းက …ကျနော်တို့က အဖိုးလို့ခေါ်တဲ့အသိအကျွမ်းတစ်ဦးရှိတယ်။
သွားကိုက်တော့ သွားဆရာဝန်တစ်ဦးကို သွားပြတယ်။ အဲဒီဆရာဝန်က မြန်မာပြည်ကရောက်လာတဲ့သွားဆရာဝန်ပါ။
ကိုက်နေတဲ့သွားကို နှုတ်လိုက်တယ်။ နောက် သွားစိုက်တယ်။
ကျသင့်ငွေပြေစာပေးတော့ ဒေါ်လာ နှစ်ထောင်ငါးရာကျတယ်တဲ့။
မြန်မာအချင်းချင်းမို့လျှော့ပေးတာပါလို့လည်း ပြောလိုက်သေးတယ်။
အဖိုးကပြောတယ်။
" ပြေစာကိုတွေ့တော့ သွားကိုက်တာထက် ခေါင်းကိုက်တာက
ပိုဆိုးပါတယ်" တဲ့။
အဲဒီအဖြစ်အပျက်ကြောင့် သွားကိုက်တဲ့ဝေဒနာကို ကြိတ်ခံနေတာ တစ်လကျော်သွားပြီအမေရေ့။

+++++++++++++++++

အေပယ်လ်(April)မှာတော့ နှင်းမကျတော့ဘူးအမေ။
မိုးရွာမယ့်ရက်ကို ၁၃-ရက်လို့ဖေါ်ပြထားတယ်။
လတစ်ဝက်လောက် ရွာမယ်ဆိုတဲ့သဘောပဲ။
အခုမိုးရွာနေတာပဲ သုံးရက်ဆက်တိုက်ဖြစ်နေပြီ။
အချို့အဝေးပြေးလမ်းမတွေမှာ ရေတွေကြီးနေတယ်လို့ ဈေးလာဝယ်တဲ့စားသုံးသူတွေပြောလို့သိရတယ်။
မိုးအရမ်းသည်းထန်ပြန်တော့လည်း စားသုံးသူတွေနည်းသွားတယ်။

ဒီနေ့တော့ ဒီလောက်ပါပဲ။
အမေလည်း ကျန်းမာရေးကို ဂရုစိုက်ပါလို့ထပ်မှာလိုက်ပါရစေ။
ချစ်တဲ့သား
အောင်ဝင်းဟိန်း
အက်ရ်ှဗန်းမြို့၊
ဗားဂျီးနီးယားပြည်နယ်၊
အမေရိကန်ပြည်ထောင်စု။
လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com