Monday, July 4, 2011

" အမေထံသို့ပေးစာ-၇..."




သို့
ချစ်တဲ့အမေ
သတိရတယ်။
အမေ့ရဲ့ကျန်းမာရေးက
ကောင်းသထက်ကောင်းလာတယ်လို့ကြားရတဲ့အတွက် ဝမ်းသာတယ်။
ကျန်းမာရေးကအရေးကြီးတယ်အမေ၊
ကျန်းမာရေးကို ဂရုစိုက်ပါလို့ ထပ်ခါတလဲလဲ မှာပါရစေ။
ပြောရအုန်းမယ်။
ကျနော်တို့ အမေရိကားရောက်စဆိုတော့ ပျော်တာပဲသိတယ်။
သူငယ်ချင်းကလည်းပြောတယ်။
“ ပျော်ပျော်နေ၊သူငယ်ချင်း၊
နောက်ဆိုရင် ပျော်ချိန်တောင် ရမှာမဟုတ်ဘူး။
ဘာဖြစ်လို့ဆိုတော့ အလုပ်လုပ်ရင်း အလုပ်ထဲမှာ နစ်မြှတ်နေလို့၊”
ဒီကောင်ကြီးနောက်နေတယ်လို့ထင်ခဲ့မိတယ်။
သူငယ်ချင်းက ကောင်းတယ်။ ဘာမှမခိုင်းပါဘူး။
စာဖတ်လိုက်၊ စာရေးလိုက်၊
စားလိုက်၊သောက်လိုက်၊
လည်လိုက်၊သွားလိုက်၊
အစဉ်ကိုပြေနေပါလား။
ရက်အနည်းငယ်ကြာတော့ သူက Social Security Department ဆိုတဲ့ ရုံးကိုခေါ်သွားတယ်။
ဆိုရှယ်ကဒ်လုပ်ဖို့လိုတယ်ဆိုပြီးခေါ်သွားတာ၊
ဖောင်တွေဖြည့်ရတာပေါ့၊ မေးတာတွေကိုလည်းဖြေရတာပေါ့။
ဝန်ထမ်းတွေက သဘောကောင်းကြတယ်။ ကူညီတယ်။
ဆိုရှယ်ကဒ်တွေဆိုတာ အမေရိကန်မှာနေသူအတွက် မရှိမဖြစ်လိုအပ်တဲ့ကဒ်မျိုးပါ။
မြန်မာပြည်မှာဆိုရင်တော့ သန်းကောင်စာရင်းနဲ့တူမယ်ထင်တယ်။
ကိုယ့်ရဲ့အကောင်းအဆိုးမှန်သမျှကို မှတ်တမ်းတင်ထားတဲ့ကဒ်မျိုးလည်းဖြစ်တယ်။
တာဝန်ကျဝန်ထမ်းက သုံးပတ်အတွင်း အိမ်ကိုစာတိုက်ကနေပို့ပေးမယ်လို့ပြောတော့
ယုံကြည်ဖို့ခက်နေတယ်။
စာတိုက်ကရော စိတ်ချရပါ့မလား။
အရေးကြီးတဲ့ကဒ်က ပျောက်သွားရင် ဘယ်လိုလုပ်မလဲ။
မြန်မာပြည်လို့ထင်ပြီး ဟိုတွေး၊ဒီတွေးနဲ့တွေးမိခဲ့ပါတယ်။
သူတို့ပြောတဲ့အတိုင်း ဆယ်ရက်အတွင်းမှာပဲ စာတိုက်က ဆိုရှယ်ကဒ်တွေရောက်လာပါတယ်။
အရေးကြီးတာက ကိုယ်ပိုင်ဆိုရှယ်နံပါတ်တွေရတာပါပဲ။
အမေ၊
ကာရိုးလိုင်းနား(မြောက်)မှာ ဘာလင်တန်မြို့ဟာအရမ်းလှပတဲ့မြို့လေးတစ်မြို့ပါပဲ။
ရောက်စဆိုတော့ အအေးဒဏ်ကို မခံနိုင်ပေမယ့် တဖြည်းဖြည်းကျင့်သားရလာပါတယ်။
အနွေးထည်ကတော့ အမြဲဝတ်ထားရတာပေါ့။
အိမ်မှာကတော့ အပူပေးစက်ရှိတယ်။
သူငယ်ချင်းအိမ်က ကိုယ်ပိုင်အိမ်ပါ။
 ပန်းခြံနဲ့အိမ်ဆိုတော့ လှပတဲ့အိမ်တစ်အိမ်ပါပဲ။
သူဆီမှာ ကိုယ်ပိုင်ကားက သုံးစီးရှိတယ်။
အကောင်းစားတွေပါပဲ။
မိသားစုသုံးယောက်ကားသုံးစီး။
သူငယ်ချင်းတော်တော်ကြိုးစားအားထုတ်ထားတယ်ဆိုတာ ခန့်မှန်းမိပါတယ်။
တစ်စီးက သူ့အလုပ်သွားရင်မောင်းဖို့ကား၊
နောက်တစ်စီးက သမီး တက္ကသိုလ်ကိုကျောင်းတက်ရင်မောင်းဖို့ကား၊
နောက်တစ်စီးကတော့ အကြောင်းကြောင်းကြောင့် ကားပျက်ခဲ့ရင် အရန်အဖြစ်သုံးဖို့ကား၊
သူငယ်ချင်းရဲ့အမျိုးသမီးက ကျန်းမာရေးကြောင့်ကားမမောင်းတတ်ပေလို့ပေါ့။
နို့မဟုတ်ရင် ကားလေးစီးရှိနိုင်တယ်။
ကားကလည်း မရှိမဖြစ်ပစ္စည်းတစ်ခုဖြစ်နေတယ်။
ဒီမြို့လေးမှာ လိုင်းကားကို မတွေ့မိဘူး။
လမ်းလျှောက်သူလည်း မရှိသလိုပါပဲ။
ကျန်းမာရေးကြောင့် လေ့ကျင့်ခန်းအဖြစ်ပြေးသူ၊လမ်းလျှောက်သူလောက်ပဲရှိတယ်။
Taxi (အငှားကား)လည်းမတွေ့မိဘူး။
ဒါပေမယ့် ဖုံးဆက်ရင်တော့ လာတယ်။ငှားလို့ရတယ်လို့ပြောတယ်။
တောသားမြို့ရောက်လာသလိုပါပဲ။ အရာရာထူးဆန်းနေတယ်။
မသိလို့မေးတိုင်း ထူးဆန်းတဲ့သတ္တဝါကိုကြည့်သလိုအကြည့်ခံရတယ်။
ဘယ်လိုကြည့်ကြည့်၊မတတ်နိုင်ဘူး။ မသိရင်တော့ မေးရမှာပဲ။
ကြိုက်သလိုလည်း ထင်နိုင်တယ်။
ကျနော်တို့ အမေရိကန်ကို အရင်ဆုံးဝင်တဲ့လေဆိပ်က
ဒယ်ထရိုက်လေဆိပ်(Deltroid Airport)ကိုဝင်တယ်။
အသေအချာစစ်ဆေးမှုလုပ်တယ်။
အမေရိကန်သံရုံးကပေးလိုက်တဲ့ စာရွက်စာတမ်းတွေကို အပ်လိုက်ရတယ်။
ပြီးတော့ အမြဲတမ်းနေထိုင်ခွင့်လက်မှတ်(Green Card) ကို
သုံးလအတွင်းစာတိုက်ကပို့လိုက်မည်ဖြစ်ကြောင်းပြောတယ်။
မြန်မာပြည်မှာဆိုရင် စာတိုက်အပေါ်ထားတဲ့ယုံကြည်မှုအနေအထားက အလွန်ပင် အားနည်းလှပါတယ်။
ဟုတ်ပါ့မလားလို့တွေးလိုက်မိပါသေးတယ်။
တကယ်တန်းတော့ သုံးပတ်အတွင်းမှာပင် စာတိုက်က Green Card ရောက်ရှိလာပါတယ်။
အလွန်အရေးကြီးတဲ့စာရွက်စာတမ်းတွေအတွက်
စာတိုက်ကယုံကြည်ရပါလားလို့တွေးမိသေးတယ်။
အရေးကြီးတဲ့စာရွက်စာတမ်းနှစ်ခုတော့ရပြီ။
နောက်အရေးကြီးတဲ့စာရွက်စာတမ်းတစ်ခုကတော့ ကားမောင်းလိုင်စင်ဖြစ်တယ်လို့ သူငယ်ချင်းကပြောတယ်။
မြန်မာပြည်ကတော့ သက်တမ်း၉-နှစ်ရှိပြီဖြစ်တဲ့ကားမောင်းလိုင်စင်ပါလာပါတယ်။
အမေရိကန်က အခြားနိုင်ငံရဲ့စာရွက်စာတမ်းကို အသိအမှတ်မပြုပါ။
အမေရိကန်နိုင်ငံရဲ့ပြည်နယ်တစ်ခုကရထားတဲ့ကားမောင်းလိုင်စင်ကိုတောင်မှ
အခြားပြည်နယ်ပြောင်းသွားရင်စာမေးပွဲပြန်ဖြေရပါတယ်။
ဆိုရှယ်ကဒ်ရထားပြီးဖြစ်တဲ့အတွက် ကားမောင်းလိုင်စင်စာမေးပွဲကိုဖြေခွင့်ရပါတယ်။
အရင်ဆုံးရေးဖြေစာမေးပွဲဖြေရပါတယ်။
ပထမအကြိမ်မှာ ကျပါတယ်။၅၆%သာရပါတယ်။
ဒုတိယအကြိမ်မှာ အောင်တယ်။၈၀%မှအောင်ပါတယ်။
တစ်ပတ်ခြားပြီး Road Test လို့ခေါ်တဲ့ လက်တွေ့ကားမောင်းစာမေးပွဲကိုဖြေပါတယ်။
တစ်ကြိမ်ထဲနဲ့အောင်မြင်သွားပါတယ်။
ကားမောင်းလိုင်စင်ကဒ်လည်းစာတိုက်ကဆယ်ရက်အတွင်းရောက်လာပြန်ပါတယ်။
အမေရိကန်မှာတော့ ကားမောင်းလိုင်စင်ကဒ်ပြားဟာ I.Dကဒ်ပြားပါပဲ။
နေရာတကာကိုယူသွားရတယ်။
မြန်မာပြည်မှာတော့ အမျိုးသားမှတ်ပုံတင်ကဒ်ပြားနဲ့တူပါတယ်။
အရေးကြီးတဲ့စာရွက်စာတမ်းသုံးခုဟာ စာတိုက်ကရောက်ရှိလာပါတယ်။
အပိုငွေ(အောက်ဆိုဒ်ငွေ)လည်းမပေးရပါ။
စာတိုက်ဟာ ယုံကြည်အားကိုးထိုက်တဲ့အစိုးရဌာနတစ်ခုဖြစ်ကြောင်းကိုတော့ အသိအမှတ်ပြုမိပါတယ်။
အစိုးရဌာနတွေဟာလည်း သူတို့ရက်ချိန်းပေးတဲ့ရက်အတွင်းမှာပင်
ပြီးစီးအောင်မြင်အောင်ပို့ပေးနိုင်တဲ့အတွက် တကယ်ပင်အလုပ်လုပ်ကြကြောင်းထင်ရှားတယ်အမေ။
အော်…ဒါဟာလည်း တိုးတက်မှုအတွက်တကယ်အရေးကြီးတဲ့ကိစ္စတွေပဲပေါ့။
အမေရိကန်ဟာ ဒါကြောင့်တိုးတက်တာပဲကိုးလို့တွေးမိတယ်အမေ။
စာလည်းရှည်သွားပြီ။
အမေလည်းဖတ်ရတာညောင်းရောပေါ့။
နောက်တော့မှ အမေရိကန်အတွေ့အကြုံကိုထပ်ရေးပါဦးမယ်။
အခုတော့ ဒါလောက်နဲ့တော်သေးပြီ။
အမေ ကျန်းမာရေးကိုဂရုစိုက်ပါ။

ချစ်တဲ့အမေရဲ့သား
အောင်ဝင်းဟိန်း
 ဘာလင်တန်မြို့ ၊(Burlington)
ကာရိုလိုင်းနား(မြောက်)ပြည်နယ်၊(North Carolina)
အမေရိကန်ပြည်ထောင်စု၊(USA)


လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com