Friday, March 16, 2012

"တန်ဖိုးရှိတဲ့နေ့တစ်နေ့…"



တစ်ခါတုန်းကပေါ့။

ကျနော်က ဖါးကန့်မှာ တာဝန်ထမ်းဆောင်တုန်းက

တာဝန်တစ်ခုနဲ့ရန်ကုန် ကိုဆင်းလာခဲ့တယ်။

ရန်ကုန်ကိုရောက်တော့ လုပ်စရာရှိတာကိုလုပ်ပြီး အချိန်ပိုနေတာနဲ့

သင်တန်းတစ်ခုကို သွားရောက်တက်ဖြစ်ခဲ့ပါတယ်။

သင်တန်းဆိုတာထက် ဝပ်ရှော့ (Workshop) တစ်ခုလို့ပြောရင်ပိုမှန်မယ်ထင်ပါတယ်။

သင်တန်းခန်းထဲရောက်တော့ စားပွဲပေါ်မှာ

ကျောက်ခဲတွေ၊ကျောက်စရစ်ခဲတွေ၊ သဲတွေကို

ပုံးတွေနဲ့ထည့်ထားတာကို တွေ့ရတယ်။

ဆရာဦးဝင်းသိန်းက သင်တန်းကိုလာကြတဲ့လူတွေကို

လေးလေးစားစားဖိတ်ခေါ်ပါတယ်။

ပုံးတစ်ခုထဲကို ကျောက်ခဲတွေ၊ ကျောက်စရစ်ခဲတွေ၊ သဲတွေကို

ဆန့်အောင်ထည့်ပေးဖို့ပြောပါတယ်။

သင်တန်းလာရောက်တက်သူတွေကလည်း တစ်ယောက်ပြီးတစ်ယောက်

သွားပြီးထည့်ကြပါတယ်။

ပုံးနဲ့မဆန့်ပါဘူး။

ကျနော်လည်း သွားရောက်ထည့်ကြည့်ပါတယ်။

အရင်ဆုံး ပုံးထဲကို သဲတွေ လောင်းထည့်လိုက်ပါတယ်။

ပြီးတော့ ကျောက်စရစ်ခဲတွေထည့်လိုက်ပါတယ်။

နောက်ဆုံးမှ ကျောက်ခဲအကြီးတွေကိုထည့်တော့

ကျောက်ခဲအကြီးတွေအများကြီး စားပွဲပေါ်မှာ ကျန်နေခဲ့ပါတယ်။

ဆရာပြောတာက အဲဒီပုံးထဲကို အားလုံးဝင်ဆန့်အောင် ထည့်ကြည့်ဖို့ပြောထားတော့

ကျနော်ရဲ့လုပ်ရပ်ကလည်း မမှန်သေးတဲ့သဘော ဖြစ်နေပါတယ်။

သင်တန်းတက်ရောက်လာသူတွေ အားလုံးနီးပါး လုပ်ကြည့်ပြီးတော့မှ

ဆရာဦးဝင်းသိန်းက

“စံနစ်တကျ ထည့်ရင်ဝင်ပါတယ်” လို့ပြောပြီး ပုံးထဲကို ထည့်ပြပါတယ်။

ဆရာက အရင်ဆုံး ကျောက်ခဲအကြီးတွေကို ပုံးထဲကို စံနစ်တကျထည့်လိုက်ပါတယ်။

နောက်တော့ ကျောက်စရစ်ခဲတွေကို ကျောက်ခဲအကြီးတွေ ကြားထဲကို ထည့်လိုက်ပါတယ်။

ကျောက်စရစ်ခဲတွေ အားလုံးဝင်သွားတော့မှ

သဲတွေကို တဖြည်းဖြည်းချင်းလောင်းထည့်ပါတယ်။

သဲတွေကို လောင်းထည့်လိုက်၊ ပုံးကိုလှုပ်ခါလိုက်နဲ့လုပ်ရင်းနဲ့ပင်

နောက်ဆုံးမှာ ဝင်မဆန့်ဘူးလို့ထင်တဲ့ ကျောက်ခဲကြီးတွေ၊ ကျောက်စရစ်ခဲတွေ၊

သဲတွေဟာ အဲဒီပုံးသေးသေးထဲကို အားလုံးဝင်သွားပါတယ်။

ဒီတော့မှ ဆရာကပြောပါတယ်။

“ကျနော်ပြောချင်တာက

ဒီပုံးလေးဟာ ကျနော်တို့လူတိုင်းပိုင်ဆိုင်တဲ့ တစ်နေ့တာ ၂၄-နာရီနဲ့တူပါတယ်။

ကျောက်ခဲအကြီးတွေက ကျနော်တို့အတွက် အလွန်အရေးကြီးတဲ့ အလုပ်တွေနဲ့တူပါတယ်။

ကျောက်စရစ်ခဲလေးတွေက ကျနော်တို့အတွက်

အသင့်တင့်အရေးကြီးတဲ့ အလုပ်တွေနဲ့တူပါတယ်။

သဲတွေကတော့ အရေးမကြီးတဲ့အလုပ်တွေနဲ့တူပါတယ်။

မရေးမကြီးပေမယ့် မလုပ်မဖြစ်လုပ်နေရတဲ့အလုပ်တွေနဲ့တူပါတယ်။

အဲဒီအလုပ်တွေကတော့ ကျနော်တို့ စိတ်အလိုလိုက်ပြီး လုပ်ချင်တဲ့အလုပ်တွေပါပဲ။

တစ်နေ့တာအတွက် အလုပ်ပြီးမြောက်ချင်တယ်ဆိုရင် ကျနော်တို့ဟာ

အရေးအကြီးဆုံးအလုပ်ကိုအရင်ဆုံးလုပ်ဖို့လိုအပ်ပါတယ်။

ပြီးမှ အသင့်အတင့်အရေးကြီးတဲ့အလုပ်ကို လုပ်ရပါမယ်။

နောက်ဆုံးမှ ကျနော်တို့ လုပ်ချင်တဲ့အလုပ်တွေကိုလုပ်ရင်

တစ်နေ့တာဟာ တန်ဖိုးရှိရှိ ပြီးဆုံးသွားနိုင်ပါတယ်။

ဒါကြောင့်

“အရေးကြီးတဲ့အလုပ်ကို အရင်လုပ်ပါ”

လို့ပြောချင်ပါတယ်။


လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com