Friday, July 27, 2012

"အမေ့ထံသို့ ပေးစာများ-၄၉..."



သို့
ချစ်တဲ့အမေ
သားသတိရစွာဖြင့် စာရေးလိုက်ပါတယ်။
အမေ ကျန်းမာတယ်ဆိုတာ သိရတော့ ဝမ်းသာရတယ်။
ဒီမှာတော့ နွေရာသီ ကာလပေါ့။
နေ့တာ ရှည်လိုက်တာ။
ည ၉-နာရီပတ်ဝန်ကျင်မှ နေဝင်တယ်။
ည ၉-နာရီခွဲအထိ နေရောင်ခြည်ကို တွေ့နေရတုန်းပါပဲ။
မြန်မာပြည်မှာဆိုရင် ညနေ ၆-နာရီလောက်ဆိုရင် နေဝင်ပြီ။
ည ၉-နာရီဆိုရင် အချို့ဆိုရင် အိပ်ရာဝင်ပြီ။
အချို့ဆိုရင် တစ်ရေးတောင် ရနေလောက်ပြီ။
ဒီမှာတော့ ည ၉-နာရီမှ အလုပ်သိမ်းတယ်။
တစ်ရံတစ်ခါ ဆိုရင် အိမ်ပြန်ရောက်မှ ညစာ စားရတယ်။
အဲဒီအချိန်ဆိုရင် ည၁၀-နာရီကျော်နေပြီ။
အလုပ်သိမ်းတာနဲ့ ချက်ချင်းပြန်ရတာတော့ မဟုတ်ပါဘူး။
ရှေ့ဖက် ဆိုဒ်(Site) ဆိုရင် ကွန်ပျူတာလုပ်ငန်းနဲ့ ငွေသိမ်းတဲ့အလုပ်ကို လုပ်ရတယ်။
အဓိက အလုပ်က အရောင်းဆိုတော့ ငွေကြေးရှင်းတမ်းကို လုပ်ပေးရတယ်။
အမှားအယွင်း မရှိအောင်လုပ်ရတယ်ဆိုတော့ ဂရုစိုက်လုပ်ရတယ်။
ပိုနေတဲ့အစားအသောက်တွေကိုတော့ လွှင့်ပစ်ရတယ်။
လုပ်သက်ရင့်နေတဲ့ ချင်းအမျိုးသား ဝန်ထမ်းတစ်ယောက်က ပြောဖူးတယ်။
တစ်နေ့တစ်နေ့ လွှင့်ပစ်ရတဲ့အစားအသောက်ရဲ့တန်ဖိုးကို ခန့်မှန်းကြည့်ရရင်
ဒေါ်လာ ၂၀၀-ဖိုးလောက်ရှိတယ်တဲ့။
နှမြောစရာတော့ ကောင်းတာပေါ့လေ။
ခက်တာက ဒီမှာက နောက်တစ်နေ့ ပြန်သုံးလို့မှ မရတာ။
ကျန်းမာရေး စစ်ဆေးသူတွေကလည်း ခွင့်မပြုဘူး။
စားသုံးသူကလည်း လူတွေပဲဟာ နောက်တစ်နေ့အကျန်ဆိုတာ သိနိုင်တာပေါ့။
ဒီတော့ သိသွားခဲ့ရင် နောက်ဘယ်လာတော့မလဲ။
ဒါကြောင့် လွှင့်ပစ်ရတာပေါ့။
အမေက ပြောဖူးတယ်။
“အစားအသောက်တစ်ခုခုဟာ
ကိုယ့်အတွက် အသုံးမဝင်တော့ပေမယ့် အခြားသူတွေအတွက်
အသုံးဝင်နိုင်တယ်။
ဒါကြောင့် အသုံးပြုနိုင်တဲ့အခြားသူတွေကို ရှာဖွေပြီး ပေးကမ်း စွန့်ကြဲဖို့
မမေ့ပါနဲ့”ဆိုတဲ့စကား။
အမေက ပြောသလို ကျနော် တို့ညီအကို မောင်နှမတွေကို လုပ်ပြခဲ့တယ်။
အမေရဲ့သွန်သင်မှုကြောင့် ကျနော်လည်း လုပ်ဖြစ်ခဲ့တယ်။
ကျနော် ဖါးကန့်မှာနေတုန်းက စားစရာတွေ ပိုလျှံနေတဲ့အခါ
အဲဒီစားစရာတွေကို သေသေချာချာ ထုတ်ပိုးပြီး
အိမ်တိုင်မှာဖြစ်ဖြစ်၊ သစ်ပင်တစ်ပင်ရဲ့အကိုင်းမှာဖြစ်ဖြစ်
ချိတ်ထားတတ်တယ်။
ဒီတော့ ဖိုးသမားတွေများလှတဲ့ဖါးကန့်မှာ အသုံးပြုနိုင်တဲ့ဖိုးသမားတွေအတွက်
အသုံးဝင်သွားတာပေါ့။
တာချီလိတ်မြို့မှာနေတော့ ပိုလျှံတဲ့အစားအသောက်တွေကို
ခွက်တစ်ခုခုမှာ ကောင်းကောင်းမွန်မွန်ထည့်ပြီး
ဘေးပတ်ဝန်ကျင်က ခွေးတွေ ကိုကျွေးတတ်တယ်။
တာချီလိတ်မှာက ခွေးတွေ ပိုပေါတယ်။
ဒီတော့ ကိုယ့်အတွက် အသုံးမဝင်တော့ပေမယ့် ခွေးတွေအတွက် အသုံးဝင်သွားတာပေါ့။
ဒီလိုပဲ လုပ်ခဲ့တာဟာ ရောက်တဲ့နေရာတိုင်းမှာ လိုလိုပါပဲ။
ခက်တာက ဒီမှာက လမ်းဘေးခွေးတွေ မရှိဘူး။
ခွေးတိုင်းမှာ ပိုင်ရှင်တွေ ရှိတယ်။
ပိုင်ရှင်မဲ့တဲ့ခွေး မရှိတော့ ပိုလျှံတဲ့စားစရာတွေကို ကျွေးဖို့ဆိုတာ မဖြစ်နိုင်ဘူး။
"ဆင်းရဲတဲ့လူတွေကို ကျွေးပါလား" လို့ အမေက မေးခဲ့ရင်
ဒီမှာက စားစရာ မရှိလောက်အောင် ဆင်းရဲသူတွေ မရှိသလိုပဲ။
အလုပ်လုပ်တဲ့ လူတိုင်း စားနိုင်၊သောက်နိုင်ကြတယ်။
အလုပ်မရှိရင် အစိုးရက ထောက်ပံ့တယ်။
စားစရိတ်ကလည်း မကြီးဘူး။
လိုအပ်ရင် အစိုးရက ထောက်ပံ့တော့ လူတိုင်းစားနိုင်သောက်နိုင်သလိုဖြစ်နေတာပေါ့။
တစ်နေ့တော့ သန့်ရှင်းလုပ်နေတဲ့ဝန်ထမ်း တရုပ်အဖိုးကြီးတစ်ယောက်ကိုတွေ့တယ်။
ခင်မင်လာတော့ သူ့ကို ကျနော်အလုပ်လုပ်နေတဲ့တရုပ်အစားအစာတွေကို
"ယူမလား" လို့မေးမိတယ်။
တရုပ်အဖိုးကြီးဆိုတော့ တရုပ်အစားအစာကို ကြိုက်မှာပေါ့။
ကျနော်တို့တောင် လက်ဖက်သုတ်၊ မုန့်ဟင်းခါးကို ကြိုက်လွန်းလို့
ဒေါ်လာနဲ့တောင် အကုန်အကျခံပြီး ဝယ်စားသေးတာပဲ။
ဒါနဲ့ပဲ ည ၉-နာရီကျော်တော့ သွန်ပစ်မယ့်အစားအစာတွေကို
တရုပ်အဖိုးကြီးကို ပေးဖြစ်သွားတယ်။
တရုပ်အဖိုးကြီးကလည်း တန်ဖိုးထားပြီး ယူတယ်။ စားတယ်။
ဒီတော့ ပေးဖြစ်တယ်ဆိုပါတော့။
ကိုယ်လုပ်နိုင်တဲ့အလှူတစ်ခုဖြစ်လို့ ပီတိဖြစ်လို့မဆုံးသေးပါဘူး။
နောက်ဆိုဒ်မှာ အလုပ်လုပ်တဲ့ ပဲ (မစ်စီကန်)နှစ်ကောင်က ပေးတာကိုမကြိုက်ဘူး။
(မစ်စီကန်တွေက ပဲကို သိပ်စားကြတော့ ပဲလို့ခေါ်ကြတယ်)
သူတို့ပြန်ချိန် နှစ်မိနစ်၊သုံးမိနစ်နောက်ကျတာကိုလည်း မကြိုက်တာလား။
ဒါမှမဟုတ် သဒ္ဓါတရားပဲ နည်းတာလား မပြောတတ်ပါဘူး။
အဲဒီကိစ္စကို ပုံကြီးချဲ့ပြီး ပိုင်ရှင်ကို တိုင်တယ်။
နောက်ဆုံးတော့လည်း ပိုလျှံတဲ့အစားအစာဟာ အမှိုက်ပုံးထဲရောက်သွားတာပေါ့
အမေ။
ချမ်းသာတဲ့နိုင်ငံကျတော့လည်း
ပိုလျှံတာကို လွှင့်ပစ်တာကို သဘောကျနေရော့သလား။
ကျနော်တို့နိုင်ငံမှာဆိုရင် နေ့စဉ်နေ့တိုင်း အလှူဖြစ်နိုင်တဲ့ကိစ္စမျိုး။
တစ်ခါတစ်လေကျတော့လည်း နားမလည်နိုင်ဘူး။
ယဉ်ကျေးမှုမတူတဲ့လူတွေနဲ့ဆက်ဆံရတာ တစ်ခါတစ်လေ
စိတ်ပျက်စရာ ကောင်းလှတယ်။
အရာရာကို ငွေကြေးနဲ့တိုင်းတာတယ်။
ငွေကြေးတစ်စုံတစ်ရာ မရရင် ဘာမှ အပိုမလုပ်ချင်ကြဘူး။
သွန်ပစ်မယ့် အစားအစာကို အခြားသူတွေကို ပေးတာ
သူတို့ဘာနစ်နာတာမှတ်လို့။

+++++++++++++++++++++++++++ 


ကျနော့်ကွန်ပျူတာကလည်း အသက်ကြီးလာလို့လားမသိပါဘူး။
နည်းမျိုးစုံ ဒုက္ခပေးလာတယ်။
ပိတ်ရက်မှာ အားခဲပြီး စားရေးမယ်။စာဖတ်မယ်။ဘလော့တင်မယ်
လုပ်တိုင်း လုပ်လို့မရအောင် တစ်နည်းမဟုတ်တစ်နည်း
ဒုက္ခပေးတယ်။
ကွန်ပျူတာပြင်နေရတာနဲ့ ဘာမှမလုပ်ဖြစ်တာများတယ်။
ပြင်လို့မရပြန်တော့ ပြင်တတ်တဲ့သူဆီသွားရတာလည်း အဝေးကြီးပါပဲ။
ဝေးလည်း မတတ်နိုင်ပါဘူး။ သွားရတာပဲ။
ကွန်ပျူတာက နေ့စဉ်ဘဝမှာ
မရှိမဖြစ် လိုအပ်တဲ့အရာဝတ္ထုတစ်ခုဖြစ်မှန်းမသိဖြစ်လာတယ်။
အသစ်တစ်လုံးဝယ်ဖို့ချိန်ဆနေတာလည်း ကြာလှပြီ။
အခြားအရေးကြီးတာတွေ ဦးစားပေးနေရတာနဲ့ မဝယ်ဖြစ်ဘူး။
အဟောင်းကိုပဲ လှည့်ပတ်သုံးနေရတယ်။
ကွန်ပျူတာဈေးနှုန်းက မကြီးပါဘူး။
မချိန်ဆဘူးဆိုရင် ဝယ်ဖြစ်တာ ကြာလှပြီ။
နောက်ပေါ်လာတဲ့ကွန်ပျူတာတွေဟာ လှမှလှ၊
ကောင်းမှကောင်း၊
ပါးမှပါး၊
ပေါ့မှပေါ့၊
မြန်မှမြန်၊
လိုချင်တိုင်းသာ ဝယ်နေမယ်ဆိုရင်လည်း ကျွန်ခံလို့ဆုံးနိုင်တော့မှာ မဟုတ်ဘူး။
ဟုတ်တယ်လေ။
ဝန်ထမ်းဆိုတာ သူတစ်ပါးရဲ့ကျွန်။
စားချင်တိုင်းလည်း မစားရ၊
အိပ်ချင်တိုင်းလည်း မအိပ်ရ၊
နားချင်တိုင်း မနားရ တာဟာ ကျွန်မဟုတ်လို့ ဘာလဲ။
ဒီနိုင်ငံမှာ နားထောင်လို့ကောင်းတာတစ်ခုတော့ ရှိတယ်။
"သမ္မတဆိုတာ ပြည်သူရဲ့ကျွန်" တဲ့ အမေရဲ့။
သူတို့ပြောသလို သမ္မတဟာ ပြည်သူတွေရဲ့လိုအပ်ချက်ကို အတတ်နိုင်ဆုံး
သိအောင်လုပ်ပြီးကြိုးစားပြီးဖြည့်ဆည်းပေးနေတာကိုလည်း တွေ့ရတယ်။
အမေ တို့ဆီမှာရောဟင်!
ဒီနေ့တော့ ဒီလောက်ပါပဲ။
အမေ ကျန်းမာရေးကို ဂရုစိုက်ပါနော်။
အမေ့ကိုချစ်တဲ့သား
အောင်ဝင်းဟိန်း
လန်ဆင်းမြို့(Lansing)
မစ်ချီဂန်ပြည်နယ်(Michigan)
အမေရိကန်ပြည်ထောင်စု(USA)။
၇-၂၇-၂၀၁၂





လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com