Sunday, January 27, 2013

"အမေ့ထံသို့ ပေးစာများ-၇၂..."




သို့
ချစ်တဲ့အမေ
သားသတိတရ စာရေးလိုက်ပါတယ်။
အမေများနေ့ဟာ တစ်နှစ်မှာ တစ်ရက်ပဲရှိတယ်။
ကျနော့်အတွက်တော့ အမေများနေ့ဟာ တစ်နှစ်လုံးရှိနေတယ်။
အမေ့ကို နေ့တိုင်း သတိရတယ်။
ဘာဘဲလုပ်လုပ် အမေ့စကားကို နေ့တိုင်းကြားတယ်။
ဘယ်ပဲသွားသွား အမေ့အားပေးစကားကြောင့် သွားရဲနေတာ။
ရှေ့တိုးဖို့ ကြုံလာတိုင်း အမေ့စကားကြောင့် ရှေ့တိုးဖြစ်နေတာ။
ဘာပဲစားစား အမေ့ကို သတိရတယ်။
အော်…သတိရတုန်း ပြောရဦးမယ်။
ချီကာဂို သွားတဲ့အကြောင်း။


ကမ္ဘာပေါ်မှာ အမြင့်ဆုံးစာရင်းဝင်တဲ့ ဝီလ်လစ်မျှော်စင်က ဆင်းလာတော့
ချီကာဂိုမှာ သွားသင့်တဲ့နေရာ ငါးခုပါတဲ့လက်မှတ် နှစ်စောင်ကို ကိုင်ပြီး
သွားစုံစမ်းတယ်။
“ဒီလက်မှတ်က တစ်နှစ်လုံး အသုံးပြုနိုင်တယ်။
ဒီနေ့အတွက်တော့ သွားဖို့အစီအစဉ်ကို မစီစဉ်ပေးဘူး။
သွားချင်ရင် ကိုယ့်အစီအစဉ်နဲ့ကိုယ်သွားရမယ်” တဲ့။
စီစဉ်ပေးတဲ့အချိန်တွေက ကိုယ်က ဒီမှာ မရှိတော့တဲ့အချိန်တွေ ဖြစ်နေတယ်။
လက်မှတ်ဝယ်ပြီးမှ ဒီအကြောင်းကို သိရတယ်။
မေးကြည့်တော့မှ သိရတယ်။ ကဲ…ဘာလုပ်မလဲ။
ဒီတစ်နှစ်အတွင်း ဒီနေရာကို ပြန်ရောက်ဖို့ဆိုတာ မသေချာဘူး။
ဒါကြောင့် အငှားယာဉ်ကို ငှားပြီး ဆက်သွားဖို့ဆုံးဖြတ်ရတော့တယ်။
လက်မှတ်အရ အရင်ဆုံးသွားဖြစ်တာက ပြတိုက်(The Field Museum)။
ပြတိုက်ဆိုတာ ဒီမြို့ရဲ့ထူးခြားတဲ့သမိုင်းကြောင်းကို ပြထားတာ များပါတယ်။
ကျနော်က ပြတိုက်ကို စိတ်ဝင်စားတယ်။
ပြတိုက်ထဲဝင်ကြည့်ရင် သမိုင်းစာအုပ်တစ်အုပ်ကို ဖတ်နေရသလို ခံစားမိတယ်။



နောက် တစ်နေရာက ငါးပြတိုက်(Shedd Aquarium)။
ငါးအမျိုးပေါင်း မြောက်များစွာကို ပြထားတယ်။
ထူးခြားတာက အာဖရိကက ငါးမျိုးကို ပြရင် အဲဒီအာဖရိကနေရာကို ရောက်နေသလို
အာဖရိက မြင်ကွင်း၊ ပတ်ဝန်ကျင် နေရာအနေအထား၊
ငါးများရှင်သန်နိုင်တဲ့ ရာသီဥတု။
အားလုံးကို အကုန်အကျခံပြီး စီစဉ်ပြထားတာကို မြင်ရတယ်။
ဒီပြတိုက်ထဲဝင်လိုက်တာနဲ့ ကမ္ဘာ့နေရာအနှံ့အပြားကို ရောက်သွားသလို ခံစားမိလာတယ်။
အချို့ ငါးမျိုးစုကို မမြင်ဖူးဖူး။
လာရောက်ကြည့်သူတွေကတော့ အများအပြားပါပဲ။
လူတွေက ရေအောက်ကမ္ဘာကိုရောက်နေသလို မှန်ထူထူအောက်က ကြည့်နေရတယ်။
ငါးတွေက အပေါ်မှာ ကူးခတ်နေလေရဲ့။



မှန်တွေကလည်း ရေရဲ့အားကို ခံနိုင်ရည်ရှိအောင် ထူပေမယ့် မြင်ကွင်းက ကြည်လင်လှတယ်။
ရုပ်ရှင်တွေထဲမှာတော့ မြင်ဖူးပါရဲ့။
အခုတော့ ကိုယ်တိုင်ရောက်နေရတယ်။
မြင်ဖူးတာနဲ့ကိုယ်တိုင်တွေ့ထိတွေ့ခံစားရတာက အများကြီးကွာခြားပါတယ်။
လာကြည့်ကြတဲ့ကလေးလေးတွေကတော့ ပျော်လို့၊ရွှင်လို့။
ကလေးတွေမပြောပါနဲ့။ ကျနော်တို့တောင် ပျော်မိပါတယ်။
ပြီးတော့ နေရာအနှံ့အပြားမှာ ဓာတ်ပုံတွေ အများကြီးရိုက်လာခဲ့တယ်။
အဲဒီဓာတ်ပုံတွေကို အမေ့ဆီ ပို့ပေးလိုက်ပါ့မယ်။
ငါးပြတိုက်ကထွက်တော့ မိုးချုပ်နေပြီ။
ရာသီဥတုက အေးလိုက်တာလည်း မစ်ချီဂန်ထက်ပိုတယ်လို့ခံစားမိတယ်။
မစ်ချီဂန်မှာ ဝယ်ဝတ်တဲ့အနွေးထည်ကို ဖေါက်ထွင်းပြီးတော့ကို အေးတာအမေရေ့။
ကျနော်တို့ရဲ့ခေါင်းမှာလည်း အက်စကီးမိုးတွေဆောင်းတဲ့ခေါင်းဆောင်းနဲ့။
ဒါလည်း အေးစိမ့်နေတုန်းပဲ။
ဝင်ရိုးစွန်းဒေသကိုများရောက်နေသလားလို့အောက်မေ့မိတယ်။



ကျနော်တို့ကားထားတဲ့ ပါကင်ကိုသွားဖို့ အငှားယာဉ်(Taxi) ကိုငှားတော့
တန်းစီရတယ်။ကိုယ့်လို တန်းစီနေတဲ့လူတန်းကြီးက အရှည်ကြီးပဲ။
အမိုးအကာလည်း မရှိတော့ အေးလိုက်တာ။
အငှားယာဉ်ရပြန်တော့ သွားမယ့်နေရာကို ကောင်းကောင်းမမှတ်မိတော့ဘူး။
ထင်ရှားတဲ့ Holiday Inn ဟော်တယ်အနီးလို့သာ မှတ်မိတော့တယ်။
ကားဆရာကလည်း အဲဒီအနီးကိုပဲ ပို့ပေးတယ်။
အမှောင်ထဲမှာဆိုတော့ ကားပါကင်ကို ရှာရတာ ဖတ်ဖတ်ကိုမောသွားတာပဲ။
ဆောင်းရာသီမှာ စိတ်စောနေတဲ့အတွက် ဇောချွေးများတောင် ပြန်ချင်တယ်။
အဲဒီတုန်းက ကိုယ့်ကားကို ကိုယ်တွေ့တာလောက် ဝမ်းသာစရာကောင်းတာ
ရှိမယ်တောင် မထင်ဘူး။
ပြန်တွေ့ပေလို့ပေါ့၊ မတွေ့ခဲ့ရင် နောက်တစ်နေ့နံက်မှ ပြန်ရှာရမယ်။
အဲဒီညတော့ ဟော်တယ်မှာ အိပ်မယ်လို့တောင် တွေးထားတယ်။
ကားကို ပြန်တွေ့လည်း ဟော်တယ်မှာ အိပ်လို့ရပါတယ်လို့ ယုံယုံကိုပြောတော့
သူမက ကိုယ်တိုင်ငွေရှာခဲ့တော့ ငွေကြေးတန်ဖိုးကို သိတယ်။
မလိုအပ်ပဲ ငွေကုန်မခံချင်ဘူးလို့ပြောတာနဲ့ကျနော်တို့
ညတွင်းချင်း ကားမောင်းပြီးပြန်ခဲ့တယ်။
ကားလမ်းတွေလည်း ကောင်းတော့ နေ့နေ့ညည ကားမောင်းရတာ
အခက်အခဲမရှိလှပါဘူး။
ကားလမ်းတွေလည်း ကျယ်ဝန်းလှတယ်။
ယာဉ်စည်းကမ်း၊လမ်းစည်းကမ်းဆိုင်းပုဒ်တွေလည်း တစ်လမ်းလုံးမှာ
လိုအပ်သလို ဆိုက်ထူထားတော့ အစဉ်ပြေလှပါတယ်။
တစ်ညလုံးလည်း ကားတွေမပြတ်လှပါဘူး။
အသွားအပြန်ဆိုရင်တော့ မိုင်ပေါင်း ငါးရာ ပတ်ဝန်ကျင်လောက်ရှိတယ်။



အမေပြောတဲ့စကား ပြန်ကြားယောင်မိပါတယ်။
“မသွားရင် ဘယ်မှရောက်မှာမဟုတ်ဘူး။
မမေးရင် ဘာမှ သိမှာမဟုတ်ဘူး။
ရှေ့ကို တစ်လှမ်းတောင်မတိုးရင်
ကိုယ်ရောက်နေတဲ့နေရာမှာပဲ ရပ်နေမယ်ဆိုတာ မမေ့နဲ့။
ဘာဘဲလုပ်လုပ် အခက်အခဲတွေတော့ ရှိမှာပဲ။
ရပ်နေရင်တောင် အနည်းဆုံး ခြေကျင်တဲ့အခက်အခဲတော့ ရှိနေမယ်။
ခြေကျင်တာထက်စာရင် သွားနေတဲ့အခက်အခဲက ပိုကောင်းပါတယ်။
ကိုယ့်ဘဝကို ကိုယ်ကျေနပ်ဖို့အတွက် ရှေ့တိုးပါ” လို့ အမေမှာချင်တယ်။
အမေပြောတဲ့အတိုင်း ရှေ့တိုးကြည့်တဲ့အတွက် ကျနော်ကျေနပ်မိပါတယ်။
ချီကာဂိုမြို့ကြီးတစ်မြို့ကို ကျနော်ရောက်ဖူးသွားပြီအမေ။
ပြီးတော့ အတွေ့အကြုံတွေလည်း အများကြီးရခဲ့ပါတယ်။
အမေ့ကို ကျေဇူးတင်တယ်ဆိုတဲ့စကားနဲ့မလုံလောက်မှန်း
သားသိပါတယ်။
ဘာဘဲဖြစ်ဖြစ် သား အမေ့ကို ကျေးဇူးတင်ပါတယ်။
ပြီးတော့ အဝေးက ဦးတင်ကတော့လိုက်ပါတယ်။

အမေ့ကို ချစ်တဲ့သား
အောင်ဝင်းဟိန်း
ကာရီမြို့၊
မြောက်ပိုင်းကာရိုးလိုင်းနားပြည်နယ်၊
အမေရိကန်ပြည်ထောင်စု။









Sunday, January 20, 2013

"ဘဝဆိုတာ အဖိုးတန်လွန်းလှပါတယ်၊ မဖျက်ဆီးလိုက်ပါနဲ့..."..."






ဘဝဆိုတာ အခွင့်အလမ်းတစ်ခုဖြစ်တယ်။ အဲဒီထဲက အကျိုးအမြတ်ရအောင်လုပ်ပါ။
ဘဝဆိုတာ အလှတစ်ခုဖြစ်တယ်။ နှစ်သက်ပါ။
ဘဝဆိုတာ အိမ်မက်တစ်ခုဖြစ်တယ်။ လက်တွေ့အကောင်အထည် ဖော်ပါ။
ဘဝဆိုတာ စိန်ခေါ်မှုတစ်ခုဖြစ်တယ်။ တွေ့ဆုံလိုက်ပါ။
ဘဝဆိုတာ တာဝန်တစ်ရပ်လည်း ဖြစ်တယ်။ လက်စသတ်လိုက်ပါ။
ဘဝဆိုတာ ကစားပွဲတစ်ခုလည်း ဖြစ်တယ်။ ကစားလိုက်ပါ။
ဘဝဆိုတာ ကတိတစ်ခုလည်း ဖြစ်တယ်။ ဖြည့်ဆည်းလိုက်ပါ။
ဘဝဆိုတာ ဝမ်းနည်းမှုလည်း ဖြစ်တယ်။ ကျော်လွှားလိုက်ပါ။
ဘဝဆိုတာ သီချင်းတစ်ပုဒ်ဖြစ်တယ်။ သီဆိုလိုက်ပါ။
ဘဝဆိုတာ ရုန်းကန်မှုတစ်ခုဖြစ်တယ်။ လက်ခံလိုက်ပါ။
ဘဝဆိုတာ ကံဆိုးမိုးမှောင်ကျခြင်းလည်း ဖြစ်တယ်။ ရင်ဆိုင်တွေ့လိုက်ပါ။
ဘဝဆိုတာ စွန့်စားမှုတစ်ခုလည်း ဖြစ်တယ်။ ရဲရဲဝံ့ဝံ့ ရင်ဆိုင်လိုက်ပါ။
ဘဝဆိုတာ ကံကောင်းမှု ဖြစ်တယ်။ လုပ်လိုက်ပါ။
ဘဝဆိုတာ အလွန်အဖိုးတန်ပါတယ်။ မဖျက်ဆီးလိုက်ပါနဲ့။
ဘဝဆိုတာ ဘဝပါပဲ။ သူ့ကိုတိုက်ခိုက်လိုက်ပါ။
Mother Teresa

Saturday, January 19, 2013

"အမေ့ထံသို့ ပေးစာများ-၇၁..."




သို့
ချစ်တဲ့အမေ
သား သတိရစွာဖြင့် စာရေးလိုက်ပြန်ပြီ။
အမေ နေကောင်းလား။
သားတို့လည်း နေကောင်းပါတယ်။
၂၀၁၃-ခုနှစ်ကတော့ အစပြုပါပြီ။
ပျော်စရာကောင်းတဲ့ နှစ်သစ် ဖြစ်ပါစေ အမေ။
အမေရိကန်မှာတော့ နှစ်သစ်ကူးဟာ တော်တော် စည်းကားတာပဲ။
ကိုယ်တိုင်ကတော့ ပွဲလမ်းသဘင်ကို မကြိုက်လို့မသွားဖြစ်ပါဘူး။
စီအင်န်အင်န် ရုပ်မြင်သံကြားကနေ ကြည့်ဖြစ်တာပါ။
နှစ်သစ်စကူးတဲ့အချိန်ကနေပြီ တစ်ညလုံးပြနေတော့တာပဲ။
ကျနော်တို့လည်း လွတ်လပ်သွားပြီမို့ နှစ်သစ်မှာ အထူးပျော်ရွှင်မိပါတယ်။
နှစ်သစ်ကစပြီး အလုပ်မဆင်းရတော့ဘူးလေ။
အလုပ်ကနေ ကောင်းမွန်စွာ နှုတ်ထွက်လိုက်တယ်။
အလုပ်နဲ့ပတ်သက်တဲ့တင်းကြတ်မှုမှန်သမျှ ပြေလျှော့သွားတယ်။
ပေါ့ပါးလိုက်တာ မပြောပါနဲ့တော့။
နှစ်သစ်ကို ကြိုပြီး အိပ်ရေးဝအောင် အိပ်လိုက်တယ်။
လန်းဆန်းသွားတော့မှ အိပ်ယာကထပြီး ပစ္စည်းတွေ သိမ်းဆည်းတယ်။
စာကြည့်တိုက်က ငှားထားတဲ့စာအုပ်တွေ၊ ဒီဗွီဒီ၊ဗွီစီဒီတွေ ပြန်ပို့ဖို့ရှိတယ်။
ဘဏ်သွားဖို့လည်း ရှိတယ်။
ကားဆီထည့်ဖို့ရှိတယ်။
အင်ဂျင်ဆီပြောင်းဖို့ရှိတယ်။
ကားရေဆေးဖို့ရှိတယ်။
အဝတ်လျှော်ဖို့ရှိတယ်။
တကယ်တန်းသွားတော့ ဒီနေ့ရုံးပိတ်ရက်ဖြစ်နေတာကို သိလိုက်ရတယ်။
ပစ္စည်းတွေ သိမ်းဆည်းတဲ့အလုပ်နဲ့ အဝတ်လျှော်တဲ့အလုပ်နှစ်ခုပဲ လုပ်နိုင်တယ်။
ဒီနေ့မှာ ပြည့်ပြည့်ဝဝ နားလိုက်ရတာတော့ အမြတ်တစ်ခုပါပဲ။
တိုးတိုးတိုင်ပင်ဖော်ကလည်း အနားမှာရှိတော့ ပျင်းချိန်မရပါဘူး။
သူက ဒီမစ်ချီဂန်ပြည်နယ်မှာနေတုန်း သွားချင်တဲ့နေရာ နှစ်ခု ရှိတယ်။
တစ်ခုက မစ်ချီဂန်ရေကန်ကို သွားချင်တယ်။
နောက်တစ်ခုက မြို့တော် ချီကာဂိုကို သွားချင်တယ် တဲ့။
ခရီးရှည်မထွက်ခင် သူမသွားချင်တဲ့နေရာနှစ်ခုစလုံးကို ကျနော်လိုက်ပို့ချင်တယ်။
မိတ်ဆွေတွေကို တိုင်ပင်တော့ ချီကာဂိုက ကားလမ်းတွေ ရှုတ်ထွေးတာမို့
အကြောင်းထူးမရှိရင် မသွားစေချင်ဘူးလို့ တားမြစ်ကြတယ်။
ကိုယ့်ဘာသာကိုယ် သွားလိုက်ရင်ကောင်းသား၊
တိုင်ပင်လိုက်မိကာမှ စိတ်ပါရှုတ်ထွေးသွားရတယ်။



ငယ်သူငယ်ချင်းကပြောပါတယ်။
“ကားလမ်းတွေ ရှုတ်ထွေးတာဆိုတော့ သတိနဲ့သွားချင်ရင်သွားပေါ့။
အမေရိကန်နိုင်ငံက ကျယ်ဝန်းလွန်းတာကြောင့် နောက်ဒီနေရာကို ပြန်ရောက်မယ်လို့
ပြောရခက်တယ်။ နောက်တစ်ခုက အလုပ်ခွင်ထဲဝင်သွားပြီးရင်
အချိန်မရှိတော့လို့ ဘယ်နေရာမှ ရောက်ဖို့မလွယ်တော့ဘူး”
တိုးတိုးတိုင်ပင်ဖော်ကို လှမ်းကြည့်တော့ သူကတော့ ဘာဘဲဖြစ်ဖြစ်
သွားမယ်လို့ ဆုံးဖြတ်ထားတဲ့ပုံနဲ့ပြန်ကြည့်တယ်။
မရောက်ဖူးတဲ့နေရာတစ်ခု၊ ပြီးတော့ ကိုယ့်ဘာသာကိုယ်ကားမောင်းသွားရမယ်။
အခက်အခဲကို ပုံကြီးချဲ့ပြီး တွေးလိုက်မိတယ်။
ကြောက်ရင် ရှေ့တိုးဖို့ခက်တယ်။
နောက်ဆုတ်ချင်တယ်။
နောက်ဆုတ်ဖို့ အကြောင်းပြချက်တွေ ရှာချင်တယ်။
အမေပြောတဲ့စကားကို ပြန်ကြားမိတယ်။
“လူတစ်ယောက်ရဲ့အဖိုးအတန်ဆုံးပိုင်ဆိုင်မှုဟာ သူ့ရဲ့သတ္တိပါသားရယ်။
သတ္တိသာရှိခဲ့မယ်ဆိုရင် အခြေအနေတွေ ဘယ်လောက်မဲမှောင်နေပါလေ့စေ။
အဲဒီအမှောင်ကို ခွင်းပြီး လင်းစေနိုင်ပါတယ်”
ဒါနဲ့ပဲ နောက်တစ်နေ့နံနက် ဇန္နဝါရီလ ၂-ရက်နေ့မှာ
လင်မယားနှစ်ယောက် ကားမောင်းထွက်ခဲ့တယ်။
လေးနာရီကျော်ကျော်လောက် ကားမောင်းရတယ်။
အလုပ်ခွင်မှာ ပင်ပန်းခဲ့တာနဲ့အမျှ ခရီးထွက်တော့ ပေါ့ပါးလန်းဆန်းသွားခဲ့ရတယ်။
ပျော်စရာ ကောင်းလိုက်တာ အမေရယ်။



တိုးတိုးတိုင်ပင်ဖက်(ယုံယုံ)ပျော်တာက သူမ သွားချင်တဲ့နေရာကို သွားရလို့။
ကျနော်ပျော်တာက လုပ်ဖို့ကြောက်နေတဲ့အလုပ်တစ်ခုကို ရှေ့တိုးလုပ်ရလို့။
ဟုတ်တယ်အမေရဲ့။ ချီကာဂိုမြို့တော်က ကားတွေကလည်း များ၊
လူတွေကလည်း ရှုတ်၊
ဒီကြားထဲ ကားရပ်မယ့်နေရာက ရှား၊
ဒါနဲ့ပိုက်ဆံပေးရတဲ့ကားပါ့ကင်နေရာတစ်ခုကို ရှာပြီး ကားရပ်လိုက်တယ်။
ကိုယ်သွားမယ့်နေရာနဲ့တော်တော်လှမ်းနေလို့ လမ်းလျှောက်သွားရသေးတယ်။
ကျနော်တို့နေတဲ့ မစ်ချီဂန်ထက်တောင် အအေးပိုနေသလိုပဲ။
ဒီမှာနေတဲ့လူတွေ ဝတ်တဲ့အနွေးထည်တွေက အများအားဖြင့် လောင်းကုတ်လို့ခေါ်တဲ့
အမွှေးပွ အနွေးထည် အရှည်တွေဆိုတာ သတိထားမိလိုက်တယ်။
ကျနော်တို့ ပါလာတာက အနွေးထည် အကျီအတိုတွေ၊
ချမ်းလိုက်တာ မပြောပါနဲ့တော့။ ခိုက်ခိုက်ကို တုန်နေတာပဲ။
မျက်နှာလည်စပ်နေတာပဲ။မှန်ထဲကြည့်တော့ နီရဲနေတယ်။
ပါးအို့နီနီလေးတွေ ဖြစ်လို့ပါလား။
အရင်ဆုံးသွားတာက ဝီလ်လစ်တာဝါ(Willis Tower)ကိုသွားတယ်။
ဗိုက်ဆာလာတာနဲ့ တာဝါနားက မက်ဒေါ်နားစားသောက်ဆိုင်ကို ဝင်စားလိုက်တယ်။
တာဝါက စပြီးဖွင့်စဉ်ကာလ(1973)မှာတော့ ကမ္ဘာပေါ်မှာ အမြင့်ဆုံးအဆောက်အဦးလေ။
အမြင့်ပေပေါင်း ၁၇၃၀- ပေ ရှိတယ်။
မြေအောက်ထပ် အပါအဝင်ဆိုရင်တော့ ၁၁၀-ထပ်ရှိတယ်။
ကျနော်တို့တက်ခဲ့တဲ့အထပ်(မြေညီထပ်)က စပြီးရေတွက်ရင်တော့ ၁၀၃-ထပ်ရှိတယ်။
တစ်ယောက်ကို ၁၈-ဒေါ်လာပေးရတယ်။
အဲဒီမှာ ရေးထားတဲ့စာက ထင်ရှားတဲ့နေရာ ၅-ခုကို သွားရင်
နှစ်ယောက်ပေါင်း နောက်ထပ်တစ်ရာကျော်ထပ်ပေးရတယ်။
ရောက်တုန်းရောက်ခိုက် သွားမယ်ဆိုပြီး ဝယ်လိုက်တယ်။
လုံခြုံရေးအတွက် အထပ်ထပ်စီစစ်နေတာလည်း
နယူးရောက်က ရုပ်ထုသွားတုန်းက
အတိုင်းပါပဲ။
လူတွေများလွန်းလို့ အကြာကြီး တန်းစီရတယ်။
ဓာတ်လှေးခါးနဲ့တက်တာ ခဏလေးလိုပဲ။
မြင့်သွားတာနဲ့အမျှ လေယာဉ်စီးရသလို နားထဲကလေထွက်လာတယ်။
ဓာတ်လှေခါးထဲမှာ တာဝါနဲ့ပတ်သက်တဲ့ သိသင့်တဲ့အချက်အလက်တွေကို
ရုပ်မြင်သံကြားနဲ့ ရှင်းပြတယ်။
အပေါ်ဆုံးထပ်ကိုရောက်တော့ အပေါ်မှာလည်း လူတွေ အများကြီးပါလား။
တစ်မြို့လုံးကို အပေါ်စီးက မြင်ရတယ်။
မြင်ကွင်းက လှလိုက်တာ။
မစ်ချီဂန်ရေကန်ကိုလည်း မြင်ရတယ်။
ရေကန်လို့သာပြောတာ ၁၀၃-ထပ်ကကြည့်တာတောင် ဟိုဖက်ကမ်းကို မမြင်ရဘူး။
ပင်လယ်ကြီးလို ဖြစ်နေတယ်။ ကျယ်ဝန်းလိုက်တာ။
အမေရိကန်မှာတော့ အကြီးဆုံးရေကန်ကြီးပါပဲ။
အင်းလေးကန်ထက် အများကြီးကျယ်တာပေါ့။
ကျနော်တို့ တစ်ချက်ခုတ်၊ နှစ်ချက်ပြတ်ပဲ။
ချီကာဂိုလည်းရောက်တယ်။
        မစ်ချီဂန်ရေကန်လည်းရောက်တယ်။    


     
တာဝါရဲ့ ထူးခြားတာတစ်ခု မှန်ပေါ်တက်ပြီးဓာတ်ပုံရိုက်ရတာပဲ။
လူတွေ တန်းစီနေလို့ဘာများလဲလို့ တန်းစီလိုက်တယ်။
တာဝါရဲ့အစွန်းတစ်နေရာမှာ ပတ်ပတ်လည် မှန်ထူထူနဲ့ကာရံထားတယ်။
အောက်ခြေနင်းကိုလည်း ဖေါက်ပြီးမြင်ရတဲ့ မှန်ချပ်အထူနဲ့လုပ်ထားတယ်။
အဲဒီပေါ်တက်ပြီးအောက်ကို ငုံ့ကြည့်တဲ့လူတိုင်းလိုလို ပြန်ပြေးလာတယ်။
မှန်ကိုဖောက်ပြီးကြည့်လိုက်ရင် လူတွေ၊ကားတွေက သေးသေးလေးတွေဖြစ်နေတယ်။
သိပ်မကြာဘူး။ ကြောက်စိတ်ဝင်လာပြီးမူးလာတယ်။ ဒူးတွေလည်း တုန်လာတယ်။
ဒီလောက်မြင့်တဲ့နေရာက တစ်ခါမှ အောက်ကို ငုံ့မကြည့်ဖူးဖူးလေ။
ကိုယ့်ခြေထောက်အောက်မှာလည်း ဟာလာဟင်းလင်းပြင်ကြီးဖြစ်နေတယ်။
အတွေ့အကြုံသစ်တော့ရပါရဲ့။
စိတ်လှုပ်ရှားစရာကောင်းလွန်းတဲ့ အတွေ့အကြုံမျိုးဖြစ်နေတယ်။



တာဝါရဲ့အပေါ်ဆုံးထပ်မှာ တစ်နာရီကျော်လောက်နေဖြစ်တယ်။
ချီကာဂို အမှတ်တရပစ္စည်းတွေ ဝယ်ဖြစ်တယ်။
ပြီးတော့ အမှတ်တရ ဓာတ်ပုံရိုက်ဖြစ်တယ်။
ပြီးတော့ အောက်ကိုပြန်ဆင်းခဲ့တယ်။
အသွားလည်း တန်းစီရသလို အပြန်တော့လည်း ဓာတ်လှေခါးစီးဖို့
တန်းစီရပြန်တယ်။
ကြားရက်တောင် ဒီလောက် ကြိတ်ကြိတ်တိုးနေရင်
ရုံးပိတ်ရက်ဆိုရင်…၊
ဆောက်လုပ်တဲ့အင်ဂျင်နီယာတွေကိုလည်း ချီးကျူးမိပါတယ်။
ပြီးတော့ ဒီလိုအများပြည်သူပြည်သားတွေကို ပြသဖို့ စိတ်ကူးရသူတွေကိုလည်း
ကျေးဇူးတင်မိပါတယ်။
ဒီလိုနေရာကိုလည်ပတ်မိတော့ အမေ့နဲ့အမေ့ဆွေမျိုးတွေကိုလည်း
ခေါ်ပြချင်လိုက်တာအမေရယ်။
ဒါပဲနော်။
နောက်မှ ဆက်ရေးလိုက်ပါဦးမယ်။

အမေ့ကိုချစ်တဲ့သား
အောင်ဝင်းဟိန်း
CARY (ကယ်ရီမြို့)၊
North Carolina (မြောက်ပိုင်းကာရိုးလိုင်းနားပြည်နယ်)၊
America (အမေရိကန်နိုင်ငံ)။
၁-၁၉-၂၀၁၃


လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com