Sunday, January 15, 2012

" အမေ့ထံသို့ပေးစာများ-၂၇..."



သို့
ချစ်တဲ့အမေ
သားသတိရစွာဖြင့်စာရေးလိုက်ပါတယ်။
အမေနေကောင်းလား။
ကျနော်တို့မိသားစုနေကောင်းကြပါတယ်။
ကိုယ့်ခြေထောက်ပေါ်ကိုယ်ရပ်တည်နိုင်တာက ကောင်းတဲ့အခြေအနေလို့ပြောနိုင်ပါတယ်။
ဒီမှာနေရတာက လွတ်လပ်တဲ့အရသာကိုကောင်းကောင်းခံစားနိုင်ပါတယ်။
ဒီမှာက လူတစ်ဦးချင်းစီရဲ့လူ့အခွင့်အရေးကို တန်ဖိုးထားတယ်။
လူကိုလူလိုသဘောထားဆက်ဆံတာကိုခံစားရတယ်။
အဆင့်အတန်းအနိမ့်အမြင့်ပေါ်မူတည်ပြီး ခွဲခြားဆက်ဆံတာ မရှိသလောက်ပါပဲ။
သူ့အလုပ်သူလုပ်၊ကိုယ့်အလုပ်ကိုယ်လုပ်ကြတယ်။
ဘာလုပ်တာကအရေးမကြီးဘူး။
ကိုယ့်အလုပ်ကို ကိုယ်တန်ဖိုးထားပြီး ကောင်းအောင်လုပ်နေတာက ပိုပြီးအရေးကြီးတယ်။
အဲဒါကို သူတို့တန်ဖိုးထားတဲ့အရာဆိုတာကိုသိရတယ်။
ကျနော်နောက်အလုပ်တစ်ခုရပြန်တယ်အမေ။
အလုပ်က သက်ကြီးလူနာတစ်ဦးကို အိမ်မှာလိုက်ပြီးစောင့်ရှောက်ပေးရတဲ့အလုပ်ပါ။
လူနာက အသက်(၈၃)နှစ်ရှိတယ်။ အမျိုးသားအဖိုးကြီးလူနာပါ။
အင်းဇိုင်းမားဆိုတဲ့သူငယ်ပြန်တဲ့ရောဂါဖြစ်နေတယ်။
ဖြစ်တာကတော့ တဖြည်းဖြည်းချင်းဖြစ်တာပါ။
လွန်ခဲ့တဲ့နှစ်ပတ်က အဆုပ်အအေးမိပြီးဆေးရုံတက်လိုက်ရတယ်။
အဆုပ်အအေးမိတဲ့ရောဂါကတော့ ကောင်းလာပါတယ်။
ဒါပေမယ့် သူငယ်ပြန်၊သတိမေ့လျော့တဲ့ရောဂါက ပိုပိုဆိုးလာတယ်။
အခုဆိုရင် မေးတဲ့မေးခွန်းကိုကောင်းကောင်းနားမလည်တော့ဘူး။
ပြောချင်ရာရာကို ပြောနေတတ်တယ်။
သားသမီးတွေကိုလည်းကောင်းကောင်းမမှတ်မိတော့ဘူး။
သူ့မှာသားသမီးဆယ့်နှစ်ယောက်ရှိတယ်။
အဲဒီသားသမီးတွေအားလုံးမြန်မာပြည်မှာမွေးကြတယ်။
သူ့အမက စပွန်ဆာပေးတယ်လို့ပြောတာပဲ။
အဲဒီမိသားစု(၁၄)ယောက်ဟာ သုံးသုတ်ခွဲပြီးလာကြတယ်။
ဒီကိုရောက်တာ နှစ်သုံးဆယ်တောင်ကျော်ပြီးဆိုတော့ အားလုံးနိုင်ငံသားတွေဖြစ်နေကြပြီ။
အားလုံးအလုပ်ကိုယ်စီရှိကြတော့ အဖေကို တစ်ချိန်လုံးပြုစုဖို့အခက်အခဲရှိလာကြတယ်။
ဒီတော့ အစိုးရဆီမှာ သက်ကြီးလူနာစောင့်ရှောက်တဲ့အဖွဲ့အစည်းကို
အကြောင်းကြားပြီးအကူအညီတောင်းတယ်။
အဲဒီအဖွဲ့အစည်းက တစ်နေ့ကိုလေးနာရီအတွက် စောင့်ရှောက်ခငွေကြေးကိုထုတ်ပေးတယ်။
သူတို့က နောက်ထပ်လေးနာရီစိုက်ထုတ်ပြီး
ကျနော့်ကိုတစ်နေ့ရှစ်နာရီနှုန်းလစာပေးပြီးငှားတယ်ဆိုပါတော့။
ကျနော့်အဖို့လူနာကိုစောင့်ရှောက်တဲ့အလုပ်က
နှစ်ပေါင်းသုံးဆယ်နီးပါးလုပ်ခဲ့တဲ့အလုပ်ဆိုတော့ ဘာအခက်အခဲမှ မရှိပါဘူး။
ဒီမှာလူနာတစ်ယောက်ကိုကြည့်ရတဲ့ငွေကြေးက မြန်မာပြည်မှာဆိုရင်
လူနာလေး-ငါးဆယ်လောက်ကြည့်ရတဲ့ငွေကြေးထက်တောင်များနေသေးတယ်။
ဒါပေမယ့်သွားရတဲ့ခရီးကတော့ဝေးတယ်။
တစ်နေ့ကိုအသွား၊အပြန်မိုင် တစ်ရာ လောက်ကားမောင်းရတယ်။
အသွားခရီးပဲဆိုရင် ရန်ကုန်-ပဲခူးလောက်ဝေးတာပေါ့။
ဘတ်စ်ကားကလည်း မစီးတတ်သေးဘူး။
ရထားလည်းမစီးတတ်သေးတော့ အိမ်ကကားကိုမောင်းပြီးသွားရတယ်။
ကားကအဟောင်း၊မောင်းသူကအသစ်ဆိုတော့ ကြောက်ကြောက်နဲ့မောင်းနေရတယ်။
တကယ်မောင်းရင် အသွားခရီးဆိုရင် တစ်နာရီးနီးပါးမောင်းရတဲ့ခရီးပါ။
ဒါပေမယ့် အလုပ်ချိန်အတွင်းမောင်းရတယ်ဆိုတော့ အလုပ်လုပ်သူတွေများတော့
တစ်နာရီခွဲ-နှစ်နာရီလောက်မောင်းချိန်ပေးနေရတယ်။
ရှစ်နာရီအလုပ်ဆင်းဖို့အတွက် နံနက် ငါးနာရီကထဲက အိပ်ယာကထရတယ်။
အိမ်ကနေ နံနက်၆-နာရီပတ်ဝန်ကျင်းလောက်ထွက်မှ အချိန်မီရောက်နိုင်တယ်။
ကားလမ်းတွေကကောင်းလိုက်တာ။ လမ်းတွေကလည်းများလိုက်တာ။
GPS ထဲကိုသွားချင်တဲ့နေရာကို ရိုက်ထည့်လိုက်ရင်
အဲဒီအတိုင်းသာမောင်းသွားရင် သွားချင်တဲ့နေရာရောက်တာပါပဲ။
အရေးကြီးတာက လိပ်စာမှန်ဖို့ပါပဲ။
လမ်းမှားသွားလို့လည်းကြောက်စရာမလိုပါဘူး။
ဆက်သွားမောင်းသွားလိုက်ရင်
အဲဒီနေရာကိုရောက်နိုင်တဲ့နောက်တစ်လမ်းကိုပြန်ပြနေလိမ့်မယ်။
သွားချင်တဲ့နေရာတစ်ခုအတွက် သွားနိုင်တဲ့လမ်းတွေအများကြီးရှိတယ်ဆိုတာကို
သဘောပေါက်လာတယ်။
ငါးလမ်းသွား၊ခြောက်လမ်းသွားကားလမ်းတွေကိုအထပ်ထပ်ဖောက်ထားပေမယ့်
လမ်းတိုင်းမှာ ကားတွေနဲ့ပြည့်ကြပ်နေတယ်။
များလိုက်တဲ့ကားတွေ၊ ကားတွေကလည်းအမျိုးမျိုး။
ကားထုတ်လုပ်တဲ့နိုင်ငံကလည်းအမျိုးမျိုး။
ဒီမှာက နိုင်ငံအစွဲအလန်းတွေ၊ကားအစွဲအလန်းတွေ သိပ်ရှိကြပုံမရပါဘူး။
ကောင်းမယ်ထင်တဲ့ကားတွေကို ကြိုက်ဈေးရတာဖြစ်ဖြစ်၊
အကြွေးရတာဖြစ်ဖြစ် ဝယ်လိုက်ကြတာပဲ။
စီးလို့ရိုးအီသွားရင်လည်း လျော့ဈေးနဲ့ပြန်ရောင်းလိုက်တာပဲ။
နောက်ဆုံးပေါ်ကားတွေကို တတ်နိုင်သူတွေက အထည်တွေကိုဝယ်ဝတ်သလို
ဝယ်နေတာကိုလည်းတွေ့ရတယ်။
တစ်အိမ်မှာ အနည်းဆုံးကားသုံးစီးလောက်ကို ရှိကြတယ်။
မိသားစုများရင် များသလောက် ကားအရည်အတွက်ကတက်သွားတယ်။
တကယ်ပြောရရင် လူတစ်ယောက် ကားတစ်နူန်းဖြစ်နေတယ်။
ကားလမ်းတွေကအမြန်မောင်းလမ်း(Free Way)တွေကသွားရတယ်။
တစ်နာရီမိုင် ၆၅-မိုင်နှုန်းမောင်းရတဲ့လမ်းတွေလေ။
မြန်လွန်းရင်လည်း မရဘူး။ ပုလိပ်တွေနဲ့တိုးပြီး တိကတ်(Ticket)အပေးခံနေရလိမ့်မယ်။
တိကတ်(Ticket)ဆိုရင် ဒဏ်ကြေးကများတော့ ကားမောင်းသူတိုင်းကြောက်ကြပုံရတယ်။
စည်းကမ်းနဲ့မောင်းကြတာကိုတွေ့ရတယ်။
တိကတ်(Ticket)ကိုကြောက်ပြီးအနှေးမောင်းလို့လည်းမရဘူး။
ယာဉ်ကြောအတိုင်းအလိုက်သင့်မောင်းနေရတယ်။
အဲ…ယာဉ်ကြောမိလို့ကတော့ ကားကိုတစ်ဘီးချင်းလိမ့်နေရတော့တာပဲ။
အမြန်မောင်းလို့သတိထားရသလို တစ်ဘီးချင်းလိမ့်ရင်လည်းအထူးသတိထားမောင်းရတယ်။
ဘာကြောင့်ဆိုတော့ ရှေ့ကားက ဘယ်နေရာရပ်မယ်ဆိုတာကိုမသိတော့
သူ့ရဲ့ဘရိတ်မီးအနီကိုကြည့်ပြီးမောင်းနေရတယ်။
သတိမထားမိရင် သူ့ရဲ့နောက်ကိုတိုက်မိကာမှ ရတဲ့လခတွေဝေါကနဲထွက်သွားဖို့ရှိတယ်။
အဲဒီအလုံးအရင်းနဲ့ထွက်တာမျိုးကိုကာကွယ်နိုင်တဲ့နည်းလမ်းကတော့
ကားအာမခံလုပ်ထားတာပါပဲ။
ကားအာမခံကလည်းဈေးကြီးပါတယ်။ လစဉ်လတိုင်းပေးရတယ်။
အတိုက်အခိုက်မရှိရင်လည်း ခြောက်လ၊တစ်နှစ်ဆိုရင်
အာမခံကြေးတွေကိုနည်းနည်း လျော့ပေးတယ်။
အဲ…အတိုက်အခိုက်ရှိရင်တော့ အာမခံကြေးတွေ အလိုလိုခုန်တက်သွားတော့တာပဲ။
ဖြေရှင်းရတာလည်းအလုပ်ရှုတ်တော့ ဘယ်သူမှ မဖြစ်ချင်ကြပါဘူး။
အကောင်းဆုံးကတော့ သတိထားပြီးကားမောင်းဖို့ပါပဲ။
အလုပ်ချိန်ကရှစ်နာရီဆိုပေမယ့် နေ့လည်ထမင်းစားချိန်တစ်နာရီကိုပေါင်းလိုက်ရင်
ကိုးနာရီဖြစ်နေပြီ။
ကားမောင်းချိန်က အသွားအမြန်ဆိုရင် သုံးနာရီကျော်၊လေးနာရီလောက်ရှိတယ်။
တစ်နေ့ကို ဆယ့်နှစ်နာရီကျော်ကျော်အလုပ်ချိန်ပေးရတဲ့သဘောဖြစ်နေတယ်။
အလုပ်ချိန်ကြပြန်တော့ အပြည့်ပေးရတယ်။
ငွေပေးရတဲ့သူက သူပေးရတဲ့ငွေနဲ့တန်အောင်ခိုင်းချင်တာ သဘာဝပါပဲ။
အမေပြောတဲ့တန်ရာတန်ကြေးပေးမှ တန်ရာတန်ကြေးပြန်ရတယ်ဆိုတာ သိပ်မှန်တာပါပဲ။
အမေကမေးမယ်။နီးတဲ့အလုပ်တွေမရှိဘူးလားလို့။
ကျနော်အလုပ်တွေကိုပြောင်းတာလေးကြိမ်မြောက်တောင်ရှိသွားပြီး။
ပထမအလုပ်က
ကားသန့်ရှင်းရေးအလုပ်(Car Wash)မှာ နှစ်လခွဲကျော်ကျော်လုပ်ခဲ့တယ်။
အချိန်ပိုင်းပဲ လုပ်ရတော့ လခနည်းတယ်။ နေပူထဲလုပ်ရတော့ ပင်ပန်းတယ်။
တစ်နေ့ကို အသွားအပြန် တစ်နာရီကားမောင်းရတယ်။
တစ်နာရီ ၄၅-မိုင်နှုန်းမောင်းရတဲ့အမြန်မောင်းလမ်း(Express Way)ကသွားရတယ်။
မြန်မာဖြစ်တဲ့မန်နေဂျာက ဆက်ဆံရေးဆိုးလိုက်တာ။
ဘယ်လိုပြောရမလဲ။ မိုက်ရိုင်းတယ်လို့ပြောရင်ပိုကောင်းမယ်ထင်တယ်။
ကျနော်ကလည်း မြန်မာပြည်ကပါလာတဲ့မာနနဲ့ဆိုတော့ စကားများစရာဖြစ်လာတယ်။
စကားများတော့ သူကပညာပိုပြလာတယ်။
အလုပ်ချိန်တွေကိုလျော့တယ်။ ပိုခိုင်းလာတယ်။
ပိုဆူလာတယ်။ စားချိန်ကိုနောက်ကျမှပေးတယ်။
ပိုပိုပြီးမိုက်ရိုင်းလာတယ်။
သီးမခံနိုင်တော့ အလုပ်ကထွက်လိုက်တယ်။
သူက အဲဒီလို အလုပ်ကထွက်အောင်ကိုလုပ်တာပါ။
လူကြီးတွေပြောတဲ့စကားကိုအမှတ်ရမိတယ်။
အလုပ်တစ်ခုမှာ မြန်မာနှစ်ယောက်ရှိရင် မတည့်ကြဖို့များတယ်တဲ့။
အဲဒီအလုပ်မှာ မက်စီကန်တွေအများကြီး။
တစ်ယောက်နဲ့တစ်ယောက်ကူညီကြတယ်။ မသိရင် သင်ပေးတယ်။
လူတစ်ယောက်အလုပ်ကထွက်ရင် သူတို့မက်စီကန်တွေအလုပ်ရအောင်ကြိုးစားကြတယ်။
ညီညွတ်ကြတယ်လို့ပြောရမယ်။
မြန်မာတွေကနှစ်ယောက်ထဲရှိတယ်။မတည့်ကြဘူး။
နောက်ဒုတိယ အလုပ်က ပုံနှိပ်လုပ်ငန်းဖြစ်တယ်။
လခပိုကောင်းလာတယ်။အလုပ်ချိန်ကလည်းပိုများလာတယ်။
တစ်နာရီနီးပါးကားမောင်းရတဲ့နေရာကိုသွားရတယ်။
မဝေးလွန်း၊မနီးလွန်းတဲ့နေရာလို့ပြောရမယ်။
အလုပ်ရှင်က နှစ်နှစ်အလုပ်လုပ်ရမယ်လို့တောင်းဆိုတယ်။
သူ့အလုပ် က ကိုယ်နဲ့ကိုက်ညီမှုရှိ၊မရှိလဲမသိရသေးဘူး။
ရေရှည်လုပ်သင့်တဲ့အလုပ်ဟုတ်၊မဟုတ်လည်း မသိရသေးဘူး။
ဒီတော့ လွယ်လွယ်ကူကူ ကတိမပေးချင်တာနဲ့ စဉ်းစားအုန်းမယ်လို့ပြောလိုက်တယ်။
ဒီတော့ သုံးရက်အလုပ်လုပ်ပြီးတာနဲ့လခထုတ်ပေးလိုက်တယ်။
အလုပ်ဖြုတ်လိုက်တဲ့သဘောဖြစ်သွားတယ်။
သူ့ဖက်ကအကြောင်းပြတာက သူကပညာတွေသင်ပေးပြီးခြောက်လ၊တစ်နှစ်လောက်အတွင်း
အလုပ်ထွက်ရင် သူ့အတွက် တွက်ခြေမကိုက်ဘူးလို့ပြောတယ်။
နောက်အလုပ်တစ်ခုက လုံခြုံရေးအလုပ်ပါ။
နေ့လည် တစ်နာရီက ည၉-နာရီအထိအလုပ်ဆင်းရတယ်။
ယာယီအလုပ်ခန့်သဘောပါပဲ။
သကြားလုံးနဲ့ချောကလက်စက်ရုံတစ်ခုမှာလုပ်ရတာပါ။
ဖြစ်ပုံကအလုပ်ရှင်က အလုပ်သမားတွေရဲ့ ဆေးကုသမှုငွေကြေးကို
ရုတ်တရက်ဖြစ်တောက်လိုက်တယ်။
အလုပ်သမားတွေက သီးမခံနိုင်လို့သပိတ်မှောက်တယ်။
အလုပ်သမားတွေအကြမ်းဖက်မှာစိုးလို့ လုံခြုံရေးတိုးမြှင့်ခန့်တယ်။
ကျနော်ကအစမ်းခန့်ထဲပါသွားတယ်။
လုံခြုံရေးအသိအမှတ်ပြု စာမေးပွဲ(Certificate )လက်မှတ်ရှိရင်တော့
ယာယီကနေ အမြဲတမ်းဖြစ်နိုင်တယ်လို့ပြောတယ်။
ခက်တာက အဲဒီလုံခြုံရေးအသိအမှတ်ပြု စာမေးပွဲ(Certificate )လက်မှတ် ကျနော့်မှာကမရှိဘူး။
ဘယ်မှာဖြေရမယ်။ဘယ်လိုဖြေရမယ်။ ဘယ်လောက်ကုန်ကျစရိတ်ရှိတယ်ဆိုတာကို မသိခဲ့ဘူး။
အဲဒီအလုပ်မှာလည်း နှစ်ရက်ပဲလုပ်ဖြစ်လိုက်တယ်။
ယာယီဆိုတော့ ပြုတ်ပြန်တယ်။
အလုပ်ပြုတ်တာ သုံးကြိမ်တောင်ရှိသွားပြီ။
တစ်နှစ်အတွင်းသုံးကြိမ်ဆိုတော့ ရိုးသလိုတောင်ဖြစ်လာတယ်။
တစ်ခုကောင်းတာက အလုပ်တစ်ခုမှာ အနည်းဆုံးပညာတစ်ခုတော့ရလိုက်တာပါပဲ။
ငွေလည်းရ ပညာလည်းရတယ်ဆိုတော့ ကောင်းတာပေါ့။
ကဲ…စာလည်းရှည်သွားပြီ။
အမေပင်ပန်းမှာစိုးလို့ပါ။
အမေနားလိုက်ပါအုန်း။
အမေ့ကိုချစ်တဲ့သား
အောင်ဝင်းဟိန်း
ဆန်ဟိုဆေးမြို့(San Jose)၊
ကယ်လီဖိုးနီးယားပြည်နယ်(California)၊
အမေရိကန်ပြည်ထောင်စု (USA)၊
၁-၁၅-၂၀၁၂
လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com