Friday, May 6, 2011

" အမေထံသို့ပေးစာများ-၃..."




သို့….

ချစ်တဲ့ အမေ
သားသတိရစွာဖြင့်စာရေးလိုက်ပါတယ်။
အမေ သားကိုလေဆိပ်လိုက်ပို့မလားလို့မေးတော့
အမေက ကျန်းမာရေးကောင်းရင်လိုက်ပို့မှာပေါ့လို့ ပြန်ပြောပါတယ်။
အော် အမေ့အသက်ကို ကျနော်မေ့သွားတယ်။
အမေက အသက် ( ၈၈) နှစ်တောင်ရှိပါပေါ့လား။
အမေက သီလကောင်းတော့ အသက်ရှည်ရှည်နေရတယ်။
ကျနော် ဖားအောက်တရားမှာ ဒုလ္လဘ ဝတ်လေတိုင်း ဘယ်လောက်ကြာကြာ
အမေလိုက်ပြီး တရားအားထုတ်ဖြစ်တယ်။
ကျနော်တစ်လကျော်ဆိုလည်း အမေကလည်း တစ်လကျော်နေနိုင်တယ်။
တရားအားထုတ်ရတာကို အမေနှစ်သက်တယ်။
အဲဒါကြောင့်အမေကပြောဖူးတယ်။
ဖားအောက်တရားစခမ်းမှာ အေးအေးဆေးဆေးတရားအားထုတ်ရလေအောင်
ကျောင်းဆောင်တစ်ခုဆောက်လုပ်လှူဒါန်းရရင်ကောင်းမယ်လို့ခဏခဏပြောဖူးတယ်။
အဲဒီအမေရဲ့ဆန္ဒ အတိုင်းဖြစ်အောင် လုပ်ပေးဖို့
ကျနော်အမြဲတမ်း ကြံစည်ကြိုးစားအားထုတ်နေပါတယ်။
မြန်မာပြည်မှာတော့ အဲဒီဝင်ငွေကို ရအောင်လုပ်ခဲ့ပေမယ့်
မဖြစ်နိုင်မှန်း တဖြည်းဖြည်းသိလာပါတယ်။
အဲဒါကြောင့်လည်း နိုင်ငံခြားတိုင်းပြည်တစ်ခုခုကို ထွက်ဖို့ကြိုးစားဖြစ်သွားတယ်လေ။
ဟော…အစဉ်ပြေချင်တော့ အမေရိကားကိုထွက်ဖို့ဖြစ်လာတယ်။
တာချီလိတ်မြို့က ရန်ကုန်ကို ဆင်းပြီး အမေရိကန်သံရုံးကို အခေါက်ခေါက်အခါခါ
သွားရသလို အမေဆီကိုလည်း အကြိမ်ကြိမ်ရောက်တယ်။
အဲဒီတုန်းက အမေဆုံးမခဲ့တဲ့စကားတွေကိုလည်း သားမမေ့ပါဘူးအမေ။
အမေပြောခဲ့ဖူးတယ်လေ၊
“ သားသွားမယ့်နိုင်ငံက
အမေရိကန်နိုင်ငံဆိုတော့ အမေတို့နိုင်ငံနဲ့တိုးတက်မှုမတူဘူး။
ယဉ်ကျေးမှုမတူဘူး။
အစားအသောက်မတူဘူး။
စရိုက်တွေမတူဘူး။
ဒီတော့ တန်ဖိုးထားတာချင်းလည်းတူမှာမဟုတ်ဘူး။
ဒါကြောင့်သားကို မှာချင်တာက
အဲဒီနိုင်ငံကိုသွားတဲ့အခါ
တစ်အချက်က
ကိုယ့်အားကိုယ်ကိုးပါ။
ဘယ်သူ့ကိုမှ အားမကိုးနဲ့သား။
သူများကို အားကိုးမိတာနဲ့အမျှ သားစိတ်ညစ်ရလိမ့်မယ်။
နှစ်အချက်က
တန်ရာတန်ဖိုးမပေးဘဲနဲ့ ဘာကိုမှ မယူလေနဲ့။
တန်ရာတန်ဖိုးမပေးဘဲနဲ့ယူမိရင်လည်း ကိုယ်သတိမထားမိပေမယ့်
ပြန်ပေးလိုက်ရတာကတော့
တန်ဖိုးထက်ပိုပေးမိတတ်စမြဲပဲ။
နောက် သုံးအချက်က
စိတ်ချမ်းသာမှုကို ဘာနဲ့မှ မလဲလိုက်ပါနဲ့။
လဲလိုက်မိရင်လည်း နောက်တော့ မတန်မှန်းသိလာလိမ့်မယ်။
စိတ်ချမ်းသာနေရင် အဲဒါကုသိုလ်ပဲ။
စိတ်ဆင်းရဲနေရင်လည်း အဲဒီအချိန်မှာ အကုသိုလ်ဖြစ်နေတာပဲ။
စိတ်ချမ်းသာအောင်နေတတ်အောင်ကြိုးစားပါ ”တဲ့။
အမေရဲ့စကားကို သားဘယ်တော့မှ မမေ့ပါဘူး။
အဲဒီအတိုင်းလည်း သားလိုက်နာနိုင်အောင်ကြိုးစားနေပါတယ်အမေ။
အမေကျန်းမာရေးကို ဂရုစိုက်ပါနော်။
ဒီအချိန်မှာ ကျန်းမာရေးဟာ အရေးအကြီးဆုံးဖြစ်လာပြီအမေရေ့။
အမေရဲ့ဆန္ဒအတိုင်းအကောင်အထည်ပေါ်အောင်
သားကြိုးစားနေပါတယ်။
အမေလှူချင်တဲ့အလှူကိုလှူနိုင်ဖို့ဆိုတာ အမေကျန်းမာနေမှဖြစ်မှာနော်။

ချစ်တဲ့သား
အောင်ဝင်းဟိန်း
ဆန်ဟိုဆေး ( San Jose )
ကယ်လီဖိုးနီးယား ( California )
အမေရိကန် (U.S.A)
မေလ-၆ရက်-၂၀၁၁ (သောကြာနေ့)

( အမေများနေ့ကို ဂုဏ်ပြုပါတယ်။ )
လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com