Monday, October 3, 2011

" ဘယ်သူ ပိုပြီးစိတ်ချမ်းသာမလဲ…"


တစ်ခါတုန်းက

အဆောက်အဦးတစ်ခုကို ဆောက်လုပ်နေတာကို ငေးကြည့်ဖူးပါတယ်။

အလုပ်သမားတွေကအများကြီး။

အချို့က အုတ်သယ်နေကြတယ်။

အချို့ကအုတ်စီနေကြတယ်။

အချို့က ပန်းရံလုပ်နေကြတယ်။

အချို့က လက်သမားလုပ်နေကြတယ်။

အချို့က ဘိလပ်မြေဖျော်စပ်နေကြတယ်။

သူ့အလုပ်နဲ့သူရှုတ်နေကြတယ်။

အဲဒီအချိန်မှာပဲ စပ်စုချင်စိတ်ဖြစ်လာတယ်။

အုတ်စီနေတဲ့အလုပ်သမားတစ်ယောက်ဆီကိုသွားပြီး မေးဖြစ်တယ်။

“ ဘာလုပ်နေတာလဲ”

အလုပ်သမားက မကျေမနပ်ပြန်ကြည့်တယ်။

“အုတ်စီနေတာကို မတွေ့ဖူးလား၊”တဲ့။

ဘုတောတောလိုက်တာကို ခံလိုက်ရတယ်။

ဘာမှဆက်မပြောတော့ပါ။ ဆက်လျှောက်သွားတယ်။

အခြားအုတ်စီနေတဲ့အလုပ်သမားတစ်ယောက်ဆီကိုသွားတယ်။

“ ဘာလုပ်နေတာလဲ”လို့

တူညီတဲ့မေးခွန်းကိုပဲ ထပ်မေးကြည့်လိုက်တယ်။

သူ့နဖူးကချွေးကိုသုတ်လိုက်တယ်။

ပြီးတော့ အသက်ကိုပြင်းပြင်းရှုလိုက်တယ်။

“ စားဝတ်နေရေးအတွက် အလုပ်လုပ်နေတယ်”တဲ့။

အလုပ်ရဲ့ပင်ပန်းမှုဒဏ်ကိုရော၊ စိတ်ရဲ့ပင်ပန်းမှုဒဏ်ကိုပါ

နှစ်ခုစလုံးခံစားနေရတဲ့ပုံသဏ္ဍန်က ပေါ်လွင်နေတယ်။

ဆက်လျှောက်သွားပြန်တယ်။

နောက်တစ်ယောက်ကို ဒီမေးခွန်းကိုပဲထပ်မေးလိုက်ပါတယ်။

“ ဘာလုပ်နေတာလဲ”

အဲဒီလူက မော့ကြည့်တယ်။

နဖူးကချွေးကိုသုတ်လိုက်တယ်။

ပြီးတော့ ပြုံးလိုက်ပါတယ်။

သူ့အပြုံးဟာ နှစ်လိုဖွယ်ကောင်းလှပါတယ်။

“ တရားရိပ်သာတစ်ခုကိုဆောက်နေတာပါ”တဲ့။

+++++++++++++++++++++++++

တူညီတဲ့မေးခွန်းတစ်ခုကို မေးကြည့်လိုက်တဲ့အခါ

အဖြေသုံးမျိုးထွက်လာပါတယ်။

သဘောထားသုံးမျိုးကိုတွေ့လိုက်ရတယ်။

ပထမတစ်မျိုးက

လက်ရှိအလုပ်ကို မကျေနပ်ဘူး။

ရုန်းလည်းမထွက်နိုင်ဘူး။

ကြိတ်မှိတ်လုပ်နေရတဲ့ပုံစံမျိုးဖြစ်နေတယ်။

ဘာကိုလည်းမကျေနပ်ဘူး။

အလိုလိုနေရင်းကို စိတ်တိုနေတယ်။

ဘယ်သူ့ကိုဖြစ်ဖြစ် ဘုတောမယ်။

ရန်ဖြစ်ရမှာကိုလည်း ဝန်မလေးတဲ့ပုံစံ။

ဒုတိယတစ်မျိုးက

စား၊ဝတ်၊နေရေးအတွက် မလွှဲမရှောင်သာ

အလုပ်လုပ်နေရတယ်။ကျေနပ်တာလည်းမဟုတ်ဘူး။

မကျေနပ်တာလည်းမဟုတ်ဘူး။

သူ့အလုပ်သူလုပ်မယ်။

အချိန်တန်လခထုတ်မယ်။

မိသားစုရဲ့စား၊ဝတ်နေရေးပြဿနာကိုဖြေရှင်းမယ်။

ဒါပဲသိတယ်။ ဒါပဲလုပ်တယ်ဆိုတဲ့ပုံစံ။

တတိယတစ်မျိုးက

အလုပ်ကိုနှစ်သက်တယ်။

အလုပ်လုပ်ရတာကိုပျော်တယ်။

ပြီးတော့ အလုပ်ရဲ့နောက်ဆက်တွဲ အကျိုးကိုပါလိုလားတယ်။

ဒါလုပ်ရင် ငါဟာ ငွေကြေးရတဲ့အပြင် ကုသိုလ်ပါရနေပါလားဆိုတဲ့အတွေးနဲ့

လုပ်နေတဲ့ပုံစံ။

+++++++++++++++++++++++++

အလုပ်လုပ်နေချိန်မှာ

ဘယ်သူက ပိုပြီးစိတ်ချမ်းသာမလဲ…

+++++++++++++++++++++++++

ဘဝရဲ့အချိန်တော်တော်များများဟာ အလုပ်လုပ်ရင်း

ကုန်နေကြတယ်။

အလုပ်မှာမပျော်ရင်….

အကောင်းမြင်စိတ်မရှိရင်…

ဘဝဟာ ရှုံးပြီးရင်းရှုံးနေတော့မယ်။

အမြတ်မရတဲ့အပြင် အရင်းရှုံးတဲ့အလုပ်ကို လုပ်နေသင့်ပါသလား။


အလုပ်မှာပျော်ရွှင်ရင်….

အကောင်းမြင်စိတ်ရှိရင်…

ဘာအလုပ်ပဲလုပ်လုပ် အမြတ်ထွက်ပါတယ်။

ကုသိုလ်ဆိုတဲ့အမြတ်၊

ပညာဆိုတဲ့အမြတ်၊

ငွေကြေးဆိုတဲ့အမြတ်တွေထွက်လာနိုင်ပါတယ်။

အကောင်းမြင်စိတ်ရှိရင်လည်း အလုပ်မှာပျော်ရွှင်လာနိုင်ပါတယ်။

အကောင်းမြင်စိတ်ဆိုတာ မေတ္တာစိတ်ကိုပြောတာပါ။

++++++++++++++++++++

မှတ်ချက်။ ။မော်လမြိုင်နဲ့ မုဒုံကြားက ဖားအောက်တောရတရားစခမ်းက

အတွေ့အကြုံကို အခြေခံပြီး ခံစားတင်ပြလိုက်ခြင်းဖြစ်ပါတယ်။

++++++++++++++++++++


လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com