Saturday, May 11, 2013

"အမေ့ထံသို့ ပေးစာများ-၇၇..."





သို့
ချစ်တဲ့အမေ
သား သတိတရ စာရေးလိုက်ပါတယ်။
အမေ နေကောင်းသလား။
အမေ့ရဲ့မွေးနေ့နီးလာသလို အမေများနေ့ဟာလည်း နီးလာပြီ။
အမေ့ကို အရမ်းသတိရမိတယ်။
အမေ့ရဲ့မွေးနေ့မှာ အမေက မွေးနေ့အလှူ လုပ်နေကျမို့ ကျနော်လည်း
အဲဒီမွေးနေ့အလှူထဲမှာ ကုသိုလ်ပါဝင်ချင်ပါတယ်။
ဒါကြောင့် အမေ့ဆီကို ငွေပို့ချင်မိတယ်။
ခရီးက ဝေးလွန်းတာမို့ အခြားပစ္စည်းကို ပို့တာထက်
ငွေပို့တာက အစစအရာရာ အစဉ်ပြေမယ်လေ။
ဒါနဲ့ ငွေပို့ဖို့ ဘဏ်ကို စုံစမ်းတယ်။
ဘဏ်ချင်းချိတ်ဆက်ထားတာမျိုးမရှိဘူးလို့ သိရတယ်။
ဒါနဲ့ငွေလွှဲတဲ့ရုံးခန်းတစ်ခုကိုတွေ့တာနဲ့ ဝင်စုံစမ်းကြည့်ပြန်တယ်။
အဲဒီရုံးကလည်း မြန်မာပြည်ကို ဆက်သွယ်ကြည့်တယ်။
မရဘူး။
သူတို့ပြန်ပြောလိုက်တာက မြန်မာပြည်တော့ မရဘူး။
မြန်မာပြည်ကလွဲပြီး ကျန်တဲ့နိုင်ငံတွေကို ပို့နိုင်တယ်တဲ့။
အမေရေ…ဘာကြောင့်မှန်းမသိဘူး။ ခက်ခဲလိုက်တာ။
ဒါနဲ့ပဲ ကယ်လီဖိုးနီးယားမှာ နေခဲ့တုန်းက သိကျွမ်းခဲ့တဲ့မိတ်ဆွေတစ်ဦးကတစ်ဆင့်
ဟွန်ဒီလို့ခေါ်တဲ့ပုဂ္ဂလိက ငွေလွှဲတဲ့သူနဲ့ချိတ်ဆက်ကြည့်တော့မှ အစဉ်ပြေသွားတော့တယ်။
ဒီမှာက ငွေရှာတာ ခက်ခဲတယ်။
ပြီးတော့ ငွေကလည်း တန်ဖိုးရှိလှတယ်။
ဒါကြောင့် အဲဒီငွေကို အမေ့လက်ထဲ ဆိုက်ဆိုက်မြိုက်မြိုက် ရောက်စေချင်တယ်။
ဒါကြောင့် ခက်ခက်ခဲခဲ အဆက်အသွယ်ကို ရှာရတယ်။
ရလာပြန်တော့လည်း ဟွန်ဒီက ဘယ်လောက်စိတ်ချရသလဲဆိုတာ
မဆက်သွယ်ဖူးတော့ မသိဘူး။ အဲဒီအတွက် စိတ်ပင်ပန်းရပြန်တယ်။
အဲဒီငွေတွေ ရောက်၊မရောက် ကြောင့်ကြရပြန်တယ်။
အခုတော့ အမေ့ဆီငွေတွေရောက်ပြီဆိုတော့မှ စိတ်အေးရတော့တယ်။
ကူညီသူတွေ အားလုံးကို ကျေးဇူးတင်မိပါတယ်။
ကျနော်တို့ပို့လိုက်တဲ့ငွေတွေကို  အမေ့သဘောအတိုင်း
လှူချင်ရာ လှူပါ။
စားချင်ရာကို စားပါ။
လုပ်ချင်ရာကို လုပ်ပါ။
ကျနော်တို့လှူတာက ကျနော်တို့ရဲ့အလှူဖြစ်နေပါပြီ။
အမေလက်ထဲရောက်ပြီးမှ အမေလှူတာက အမေရဲ့အလှူပဲလေ။
အမေ ကြိုက်နှစ်သက်သလို စီမံခန့်ခွဲပါ။



အေသင်မြို့ဟာ ကျနော်တို့အတွက် ပတ်ဝန်ကျင်အသစ်ဖြစ်နေတယ်။
တစ်ခါမှ မရောက်ဖူးဖူးလေ။
နေရာသစ်ကို လူသစ်အနေနဲ့ရောက်လာတော့
မထင်မှတ်တဲ့အခက်အခဲတွေက အများကြီးပါပဲ။
အရင်ဆုံးတွေ့ရတဲ့အခက်အခဲက အိမ်ခန်းရှာရတဲ့အခက်အခဲ။
ကုမ္ပဏီကို ဖုန်းလှမ်းဆက်တော့ အလုပ်နဲ့နီးတဲ့နေရာတစ်ခုရဲ့လိပ်စာကို ပေးတယ်။
တက္ကသိုလ်ကျောင်းသူ/ကျောင်းသားများ နေတဲ့အဆောင်လို့ပြောရမယ်ထင်တယ်။
University Garden Apartments တဲ့။
ဂျော်ဂျီယာတက္ကသိုလ်နဲ့နီးတယ်။
အလုပ်နဲ့လည်း နီးတယ်။
အခန်းခကလည်း သင့်တော်တယ်။
အိပ်ခန်းတစ်ခန်းပါတယ်။ရေချိုးခန်း၊အိမ်သာကတစ်ခန်း။
မီးဖိုဆောင်က တစ်ခန်း။
ဘုရားခန်းက တစ်ခန်း။
အခန်းကိုကြည့်ပြီး တော်တော်သဘောကျမိတယ်။
ဒါပေမယ့် တရားဝင်စာရွက်စာတမ်းတွေ အားလုံးတောင်းတယ်။
နောက်ကြောင်းရာဇာဝင်ကိုလေ့လာဖို့ အချိန်နှစ်ရက်ယူမယ်တဲ့။
နောက်ကြောင်းရာဇာဝင်ဆိုတာက အိမ်လခကို မှန်မှန်ပေးနိုင်တဲ့
အခြေအနေရှိ၊မရှိ အဓိကဖြစ်မယ်ထင်ပါတယ်။
ပြီးတော့ ငွေကြေးဆိုင်ရာ ပြဿနာရှိခဲ့ဖူးလား။
ရာဇာဝတ်မှု ဖြစ်ခဲ့ဖူးလား။
ဆိုတာတွေကို လေ့လာကြတယ်လို့ သိရပါတယ်။
ကားထဲမှာ ပစ္စည်းတွေကို ထိုးသိပ်ခဲ့ပြီး ကတိုက်ကရိုက်လာခဲ့တော့
အဲဒီနှစ်ရက်ကို ဘယ်မှာ သွားနေရမှာလဲ။
နောက်ဆုံးတော့ ဟော်တယ်မှာ တည်းဖို့ဖြစ်လာတယ်။
ဟော်တယ်ခကလည်းဈေးကြီးလိုက်တာ။
တစ်ညကို မြန်မာငွေနဲ့ တစ်သိန်းနီးပါးလောက်ပေးရတယ်။
ဒါတောင်မှ အခန်းတွေနည်းနည်းပဲ ကျန်တော့တယ်ဆိုပါလား။
ဟော်တယ်မှာတည်းတာလည်း အစဉ်ပြေလှတယ်မဟုတ်ပါဘူး။
မိုးတွေက အဆက်မပြတ်ရွာနေတော့ ကားထဲက ပစ္စည်းတွေ ထုတ်ဖို့မလွယ်ဘူး။
အဝတ်အစားတွေကလည်း ကားရဲ့အတွင်းပိုင်းရောက်နေတယ်။
ထင်မှတ်မထားတော့ ပစ္စည်းတွေကို ကြိုတင်ပြင်ဆင်ထားတာ မရှိခဲ့ဘူး။
ထုတ်လို့လွယ်ဦးတော့ ပြန်ထည့်ရင် ခက်ခဲမယ့်အခြေအနေကိုလည်း
တွက်ချက်မိတော့ ဟော်တယ်မှာလည်း ဖြစ်သလိုပဲ အိပ်ခဲ့ရတယ်။
နှစ်ရက်ဆိုတဲ့အတိုင်းပါပဲ။
နှစ်ရက်ပြီးတော့ အခန်းကရပါတယ်။
အခန်းအတွက် စာချုပ်စာတမ်းကို လက်မှတ်ထိုးရတာလည်း
လက်တညောင်းပါပဲ။
သူတို့ဆီမှာ ဥပဒေဆိုင်ရာ အချက်အလက်တွေက များလွန်းလှတယ်။
စာရင်းချုပ်လိုက်ရင် သူ့တို့ဖက်က လွတ်ကွက်ဟာကွက်မရှိအောင်
အိမ်ခန်းငှားသူကို စာရွက်စာတမ်းနဲ့ တုတ်နှောင်လိုက်တာပါပဲ။
ဥပဒေနဲ့အညီနေသူအဖို့ ဘယ်လောက်တုတ်တုတ်ပါ။
မှုစရာ မရှိလောက်ပါဘူး။
မိုးကအဆက်မပြတ်ရွာနေတော့ အခန်းရလို့ဝမ်းမသာနိုင်သေးဘူး။
အဲဒီပစ္စည်းတွေကို ချဖို့တစ်ပတ်လောက်ကို ကြာတယ်။
နည်းနည်းချင်း ရွေ့နေရလို့လေ။
တစ်ပတ်ကြာတော့မှပဲ ပစ္စည်းတွေ အိမ်ခန်းထဲ
အကုန်ရောက်တော့တယ်။
အိမ်ခန်းလေးက ဟော်တယ်ကအခန်းလိုပါပဲ။
တော်တော်လေး ပြည့်ပြည့်စုံစုံထားပေးပါတယ်။
ယုံယုံက ပစ္စည်းတွေကို နေရာတကျ ထားလိုက်တော့
အိမ်ခန်းလေးဟာ သီရီဂေဟာလေးဖြစ်သွားပါတယ်။
တစ်နေ့မှာ အိမ်ခန်းသော့က မကောင်းတဲ့အကြောင်းကို ထမင်းစားချိန်မှာ
အလုပ်ခွင်နေ အိမ်ခန်းငှားရုံးခန်းကို
ဖုံးနဲ့ပြောပြလိုက်ပါတယ်။
ရုံးခန်းက ဝန်ထမ်းက အိမ်ခန်းသော့ကို ပြင်ပါတယ်။
ပြင်ကြောင်းကိုလည်း ဖုံးပြန်မဆက်ပါဘူး။
သော့အသစ်ကိုလည်း မပေးပဲ ဝန်ထမ်းတွေက ရုံးဆင်းသွားပါတယ်။
အလုပ်ပြီးလို့အိမ်ပြန်လာတော့ အိမ်ခန်းထဲဝင်မရတဲ့အဖြစ်ကို
ကြုံရပါတယ်။
ဘယ်မှလည်း ဆက်သွယ်မရပါဘူး။
ဝန်ထမ်းတွေက ရုံးချိန်ပြင်ပဆိုရင် ဘာမှ မလုပ်တဲ့သဘောပဲ။
အဲဒီညမှာ ဟော်တယ်မှာ တစ်ည ထပ်အိပ်ရပြန်ပါတယ်။
ဒီတစ်ခါတော့ မိုးလည်း မရွာဘူး။
ကားမှာလည်း ဘာပစ္စည်းမှ မရှိတော့ပါ။
အဝတ်တစ်ထည်၊ကိုယ်တစ်ခုနဲ့ဟော်တယ်မှာ အိပ်ရပြန်တယ်။
အဲဒီလိုမျိုးအခက်အခဲအသေးလေးတွေကတော့ အများကြီးပါပဲ အမေ။
အခုနေတဲ့အိမ်ခန်းက အလုပ်နဲ့နီးတယ်။
တစ်မိုင်တောင် မပြည့်ဘူး။
ကားမောင်းသွားရင် သုံးမိနစ်လောက်ပဲကြာတယ်။
အိမ်နဲ့အလုပ်ခွင် နီးတော့ ဓာတ်ဆီကုန်သက်သာတယ်။
အချိန်ကုန်သက်သာတယ်။
ကျနော်တို့နေတဲ့အခန်းရဲ့မျက်နှာချင်းဆိုင်မှာ ရေကူးကန်ရှိတယ်။
ရေကူးကန်ရဲ့ထောင့်တစ်ခုမှာ ချယ်ရီပင်ကြီးတစ်ပင်ရှိတယ်။
ချယ်ရီပွင့်ချိန်မှာ တစ်ပင်လုံးကိုဝေဝေဆာဆာပွင့်တာ
လှလိုက်တာအမေရယ်။
ကျနော်တို့နေတဲ့ပတ်ဝန်ကျင်မှာတော့ စိမ်းလန်းနေတဲ့ သစ်ပင်ကြီးတွေနဲ့။
တကယ့်ဥယျာဉ်တစ်ခုလိုဖြစ်နေပါတယ်။
နံနက်စောစော အ်ိပ်ယာကထချိန်မှာ ငှက်တွေရဲ့တေးဆိုသံနဲ့အိပ်ယာထရတာကို
သဘောကျမိတယ်။
ကျနော်အခန်းက လှမ်းကြည့်ရင် ဒီမြို့နယ်ရဲ့အကြီးဆုံးဆိုတဲ့ စာကြည့်တိုက်ကြီးရှိတယ်။
တက္ကသိုလ်ကျောင်းသူ/ကျောင်းသားတွေ အများစုလာကြတယ်။
စာကြည့်တိုက် ကဒ်ပြားလည်း လုပ်ထားလိုက်တယ်။
စာကြည့်တိုက်က အိမ်နဲ့နီးလေတော့မှ အလုပ်တွေများပြီး
စာကြည့်တိုက်ကို မှန်မှန်မရောက်ဖြစ်တော့ဘူး။
ရှားရှားပါးပါး ရောက်လေတိုင်းလည်း ပျော်မိပါတယ်။
လိုရင်ကြံဆ၊နည်းလမ်းရသတဲ့ လို့အမေပြောဖူးတယ်။
နေ့တိုင်းမရောက်နိုင်ပေမယ့် တစ်ပတ်တစ်ခါရောက်အောင်တော့
နည်းလမ်းရှာရမယ်။
စာကြည့်တိုက်ကို ဘာဖြစ်လို့ဒီလောက်တောင် သွားချင်ရသလဲလို့ မိန်းမက
မေးတော့ ကျနော်ကပြန်ပြောလိုက်တယ်။
“ဗိုက်ပူပြီးဦးနှောက်သေးတဲ့သူ မဖြစ်ချင်လို့ပေါ့” လို့ပြန်ဖြေလိုက်တယ်။
ဟုတ်တယ်လေအမေရဲ့။
နေ့တိုင်းအစားစားတယ်။အစားဟာ ရုပ်ခန္ဓာအတွက် လိုအပ်ပါတယ်။
ဒါပေမယ့် အစားများတော့ ဗိုက်ပူသထက်ပူလာတယ်။
ဒီလိုပဲ စိတ်အတွက်လည်း အစားစားဖို့လိုတယ်လေ။
စာကြည့်တိုက်ထဲမှာ စိတ်အတွက် အစားအစာတွေ အမြောက်အများရှိတယ်။
အဲဒီအစားအစာကို မမှီဝဲရင် 
တစ်နေ့ထက်တစ်နေ့ ဦးနှောက် သေးသထက်သေးလာဖို့ သေချာတယ်။
အဲဒါကြောင့် ရုပ်အတွက်သာ အစားအစာတွေစားပြီး
စိတ်အတွက် အစားအစာမဖြည့်ရင်
ဗိုက်ပူပြီး ဦးနှောက်သေးသူဖြစ်လာလိမ့်မယ်လို့
အမေပြောခဲ့ဖူးတဲ့စကားကို ပြန်ပြောလိုက်တော့
မိန်းမက အော်….ဒါကြောင့်ကိုး တဲ့။
နောက်တော့လည်း ကျနော်စာကြည့်တိုက်သွားတိုင်း
သူမ လိုက်လာတတ်တယ်။
                                                        အမေရေ…
ကျန်းမာရေးကို ဂရုစိုက်ပါ။
အမေပို့သတဲ့မေတ္တာကို ခံယူပါတယ်အမေ။

ချစ်တဲ့သား
အောင်ဝင်းဟိန်း
အေသင်မြို့၊
ဂျော်ဂျီယာပြည်နယ်၊
အမေရိကန်ပြည်ထောင်စု။
၅-၁၁-၂၀၁၃



လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com