Friday, August 31, 2012

"အမေ့ထံသို့ ပေးစားများ-၅၂..."




သို့
ချစ်တဲ့အမေ
သား သတိရစွာဖြင့် စာရေးလိုက်ပါတယ်။
အမေ နေကောင်းလား။
ကျန်းမာရေးကို ဂရုစိုက်ပါအမေ။
ကျန်းမာခြင်းဟာ လာဒ်တစ်ပါးလို့ ဘုရားဟောခဲ့တယ်။
ငယ်ငယ်တုန်းကတော့ အဲဒီစကားရဲ့တန်ဖိုးကို နားမလည်ခဲ့ပါဘူး။
ငွေဟာ လာဒ်တစ်ပါးလို့ထင်ခဲ့တယ်။
ငွေနောက်ကိုလိုက်ရင်း လိုက်ရင်းနဲ့ ကျန်းမာခြင်းတွေ ဆုံးရှုံးလာတယ်။
ဆေးကျောင်းတက်တုန်းက သူငယ်ချင်းတွေက မျက်မှန်အထူကြီးတွေတပ်တော့
မင်းတို့တွေ ငယ်ငယ်နဲ့ ကန်းကြတယ်လို့ပြောခဲ့ဖူးတယ်။
ကျနော့် မျက်လုံးတွေ ကောင်းလိုက်တာလို့တွေးခဲ့တယ်။
ဆရာဝန်ဖြစ်တဲ့အထိ မျက်မှန်မတပ်ခဲ့ရတာကို ဂုဏ်ယူလို့မဆုံးခဲ့ဘူး။
အသက်လေးဆယ်ရောက်တော့ စာဖတ်တဲ့အခါ မှုန်သလိုလိုဖြစ်လာတော့
မျက်စိအထူးကုနဲ့သွားပြဖြစ်တယ်။
အဲဒီကတည်းက မျက်မှန်တပ်ခဲ့တာ အခုထိပါပဲ။
ညအိပ်တဲ့အခါမှပဲ မျက်မှန်ချွတ်ရတော့တယ်။
မှုန်တဲ့အခါ အဝေးရော အနီးရော မှုန်တော့တာပဲ။
ဆရာဝန်ဘဝတစ်လျှောက်လုံး နေ့စဉ် အားကစားမှန်မှန်လုပ်တော့
ကျန်းမာသလိုလို ဖြစ်နေတာကို ကိုယ့်ကိုယ်ကို ကျန်းမာလိုက်တာလို့ ယူဆခဲ့တယ်။
ဒီရောက်တော့ အချိန်မရှိတာနဲ့အားကစားလည်း မှန်မှန်မလုပ်ဖြစ်တော့ဘူး။
အချိန်တိုင်းနီးပါးကို အလုပ်လုပ်နေရတော့ အားကစားလုပ်ချိန်ကို မရှိတော့တာပါ။
ခန္ဓာကိုယ်ကလည်းဟိုကဖောက်ပြန်၊ ဒီကဖောက်ပြန်နဲ့။
ငွေရှာလို့ကောင်းချိန်ရောက်တော့မှ မကျန်းမာတော့ ကျန်းမာရေးတန်ဖိုးကို နားလည်လာတယ်။
ဒါကြောင့် ကျန်းမာရေးကို ဂရုစိုက်ပါလို့အမေကို ထပ်ခါတလဲလဲ ပြောနေမိတာပါ။

+++++++++++++++++++++++++++


ကျနော်နဲ့သိတဲ့ အမျိုးသမီးဝန်ထမ်းတစ်ဦးကပြောဖူးတယ်။
အလုပ်ကြိုးစားတာ ကောင်းပါတယ်။
အလုပ်အလွန်ကြိုးစားသူကို အလုပ်ရှင်က ကြိုက်တယ်။
ဒါပေမယ့် အလုပ်သမားအချင်းချင်းက မကြိုက်ကြဘူး။
ဘာကြောင့်လဲလို့မေးကြည့်တဲ့အခါ
“ကိုယ်လုပ်သလိုမျိုး သူတို့မလုပ်နိုင်ဘူးလို့ထင်တာပဲ။
ဒီက ဝန်ထမ်းတွေက အလုပ်ကို လျှော့လုပ်လို့မရကြတော့ ပိုလည်း မလုပ်ကြဘူး။
တစ်သက်လုံး လုပ်ရမယ့်အလုပ်ဖြစ်တော့ ကိုယ်ခန္ဓာကို ညှာလုပ်တာလည်း ဖြစ်နိုင်ပါတယ်။
အကြောင်းတစ်ခုက မကျန်းမာလာရင် ကျန်းမာရေးစရိတ်က ကြောက်ခမန်းလိလိ ကြီးတာကို
ကြောက်တာလည်း ဖြစ်နိုင်ပါတယ်။
ဝန်ထမ်းအသစ်ဆိုတာ တံမြက်စည်း အသစ်နဲ့တူတယ်။
တံမြက်စည်းအသစ်က အရမ်းလှည်းလို့ကောင်းတယ်။
ဟောင်းလာရင် လှည်းလို့မကောင်းတော့ဘူး။
အမှိုက်လည်း မပြောင်တော့ဘူး။
ဝန်ထမ်းအဟောင်းဆိုတာ ဒီလိုများ ဖြစ်နေမလား။
ကျမက ဝန်ထမ်းအသစ်လေ”တဲ့။

+++++++++++++++++++++++++++++++++++++



မစ်ချီဂန်တက္ကသိုလ်ကတော့ ပြန်ဖွင့်ပြီ။
တရုပ်ကျောင်းသားတွေတော်တော် တွေ့ရတယ်။
ဒီမှာ ကျောင်းလာတက်တဲ့ တရုပ်တက္ကသိုလ်ကျောင်းသားတွေတွေ့တော့
ပြန်ငယ်ချင်လိုက်တာ။
အမေရိကန်တက္ကသိုလ်ကိုတော့ တက်ရရင်ကောင်းမှာပဲလို့ ခဏခဏတွေးဖြစ်တယ်။
တရုပ်ကျောင်းသား ကျောင်းသူတွေကတော့ တရုပ်အစားအစာကို ကြိုက်ကြတယ်။
ဆိုင်မှာ လာအားပေးကြတယ်။
ရောက်ကာစ ကျောင်းသားကျောင်းသူတွေဆိုတာ သိပ်သိသာတယ်။
အချို့က စားပြီးသား အစားအစာကို ဘာလုပ်ရမှန်းမသိလို့ လာမေးတယ်။
အမှိုက်ပုံးကို လက်ညှိုးထိုးပြီး ပစ်ဖို့ပြောလိုက်တော့ ဆိုင်က ပေးထားတဲ့ဘန်းကိုတောင်
အမှိုက်ပုံထဲကို ပစ်တာကိုတွေ့ရတယ်။
သန့်ရှင်းရေးလုပ်သားတွေကိုပြောပြီး ပြန်ကောက်ရတယ်။
သူတို့ကြည့်ရတာ မအူမလည်နဲ့။
ရောက်ခါစဆိုရင် လူတိုင်းဒီလိုချည်းပါပဲ။
လူမျိုးမတူဘူး။ အစားအစာမတူဘူး။ ဘာသာစကားမတူဘူး။
ယဉ်ကျေးမှုမတူဘူးဆိုတော့ အားလုံးလိုလို အူကြောင်ကြောင်ကို ဖြစ်နေတော့တာပဲ။
ဒီနိုင်ငံမှာက အစားအစာဝယ်တဲ့အခါ တန်းစီတာ အကျင့်ဖြစ်နေပြီ။
ကြားဖြတ်တာ မရှိဘူး။
အတင်းတိုးဝှေ့တာ မရှိဘူး။
V.I.P (အခွင့်ထူးခံလူတန်းစား) ရောဂါ မရှိဘူး။
စည်းကမ်းရှိကြတယ်။
အကြောင်းကြောင်းကြောင့် နောက်လူကို ကျော်ပြီးလုပ်ပေးတာမျိုးကိုလည်း လက်မခံဘူး။ မကြိုက်ဘူး။
သူတို့က မကြိုက်ရင် အားမနာတတ်ဘူး။ ပြောတယ်။
ပြီးတော့မဝယ်ပဲ ထွက်သွားရော။
အချို့က မပြောဘူး။ မဝယ်ပဲ ထွက်သွားပါရော။
နောက်ဘယ်တော့မှ မလာတတ်ကြဘူး။
ဈေးရောင်းရင် အရမ်းသတိထားရတဲ့ကိစ္စ။

+++++++++++++++++++



စားသုံးသူတွေရဲ့တောင်းဆိုမှုကြောင့် အလုပ်က မနားမနေလုပ်ရတယ်။
မောလ်ထဲမှာလုပ်တော့ တစ်နေ့ကို အနည်းဆုံး (၁၁) နာရီလုပ်ရတယ်။
ပြောရရင် တစ်နေ့လုံးလိုလိုပါပဲ။ နံက် (၉)နာရီကျော်မှာ အိမ်ကထွက်ရတယ်။
ည (၉)နာရီကျော်မှ ပြန်ရောက်တော့ တစ်နေ့ (၁၂)နာရီ သုံးနေရတဲ့သဘောဖြစ်နေတယ်။
အလုပ်ချိန်ကလည်းများ။ နားရတဲ့အချိန်ကလည်း ရှားပါးလှတယ်။
ကြာလာတော့ လူကခံနိုင်ရည် နည်းလာတယ်။
သက်သက်သာသာနဲ့နေရတဲ့ ကိုယ့်တိုင်းပြည်ကိုလွမ်းလာတယ်။
အမေရိကန်မှာ အနေကြာတဲ့သူငယ်ချင်းတစ်ယောက်ကိုပြောပြတော့
သူကပြောတယ်။
“အမေရိကန်နိုင်ငံသားကဒ်ရပြီဆိုရင် နိုင်ငံအတော်များများကို ဗီဇာမလိုပဲ
သွားလို့ရတယ်။ တစ်ခါတုန်းက ထိုင်းနိုင်ငံကို ငါသွားလည်တယ်။
နယ်စပ်ကို သွားတဲ့ခရီးတစ်ခုမှာ နှစ်ထပ်ဘတ်စ်ကားကြီး စီးသွားတယ်။
ငါ့ဘေးနားမှာ မြန်မာတစ်ယောက်။
မြန်မာအချင်းချင်းတွေ့တော့ မြန်မာစကားကို ပြောဖြစ်ကြတာပေါ့လေ။
တစ်နေရာရောက်တော့ ကားရပ်သွားတယ်။
စစ်ဆေးရေးရဲတွေ တက်လာတယ်။
ငါ့နားက မြန်မာကိုစစ်တော့ မြန်မာမှန်းသိတော့ ခေါ်ချသွားတယ်။
အကြာကြီးမေးတယ်။ပြန်တက်လာတော့ သူ့မှာပါလာတဲ့ငွေတွေကို
အကုန်ယူလိုက်တယ်လို့ပြောတယ်။
မပေးရင်လည်း ဆက်သွားခွင့်မပေးဘူးဆိုတော့ သူလည်း မသွားမဖြစ်တော့ ပေးလိုက်ရတယ်။
ငါ့ကိုစစ်ဆေးတော့ အမေရိကန်နိုင်ငံသားကဒ်ထုတ်ပေးလိုက်တော့
အဲဒီအကောင်တွေက အလေးတွေပြုလို့။ ငါ့ရဲ့ပစ္စည်းတွေဆိုရင်
ဘာတစ်ခုမှ ထိတောင်မထိဘူး။
လူချင်းကတော့ အတူတူပါပဲ။
ခြားနားချက်ကတော့ နိုင်ငံသားပဲ။
မင်း နိုင်ငံတကာကို လွတ်လွတ်လပ်လပ် သွားလည်ချင်စိတ်ရှိရင်တော့
စဉ်းစားပေါ့” တဲ့။
သူ့စကားက စဉ်းစားစရာဖြစ်လာတယ်။
ကျနော်က ခရီးသွားရတာကို ဝါသနာပါတယ်လေ။
ဘယ်နေရာမှာဖြစ်ဖြစ် အကောင်းအဆိုးက ဒွန်တွဲနေတတ်ပါတယ်။
အကောင်းချည်း မရှိသလို အဆိုးချည်းလည်း မရှိပါဘူး။
အကောင်းကို လက်ခံချင်ရင် ဒွန်တွဲပါလာတဲ့ အဆိုးကိုလည်း လက်ခံရမှာပဲ။
ကဲ..အမေ စာလည်းရှည်သွားပြီ။
ကျနော်လည်း နားလိုက်ဦးမယ်။

အမေ့ကို ချစ်တဲ့သား
အောင်ဝင်းဟိန်း
လင်စင်းမြို့၊
မစ်ချီဂန်ပြည်နယ်၊
အမေရိကန်နိုင်ငံ။





Thursday, August 30, 2012

"တစ်ယောက်ထဲ ရှိတယ်..."




ဘယ်လို ဖြစ်ရင်တော့ စိတ်ချမ်းသာမှာပဲလို့ စိတ်ချမ်းသာစေမယ့်
အကြောင်းကို တွေးရင်းနဲ့ ဘယ်လိုကြောင့် စိတ်မချမ်းသာနိုင်သေးဘူး ဆိုတဲ့
အကြောင်းပြချက်တွေက များလာတယ်။
စိတ်ချမ်းသာဖို့ အကြောင်းပြချက် များများ လိုအပ်နေရင် စိတ်ချမ်းသာမှာ
မဟုတ်တော့ဘူး။စိတ်မချမ်းသာဖို့ အကြောင်းပြချက်တွေပဲ များများတွေ့နေမယ်။

++++++++++++++++++++++++++++++++++++

ဘာဖြစ်လို့လဲဆိုတော့ ဘဝဆိုတာ ဘယ်တော့မှ အလိုကျ မဖြစ်နိုင်လို့ပဲ။
ဘာဘဲဖြစ်ဖြစ် စိတ်ချမ်းသာအောင် နေတတ်တဲ့သူပဲ စိတ်ချမ်းသာနိုင်မယ်။
ကိုယ်မျှော်လင့်သလို ဖြစ်နေလို့ စိတ်ချမ်းသာနေတဲ့သူဟာ ခဏလေးပဲ
စောင့်လိုက်ပါ။ မကြာခင် အခြေအနေကပြောင်းလဲသွားမယ်။
ကိုယ်မကြိုက်တဲ့အခြေအနေ ရောက်လာမယ်။
အဲဒီအခါ သူ စိတ်မချမ်းသာတော့ဘူး။

++++++++++++++++++++++++++++++++++++

လိုချင်တာ ရတဲ့အခါ ဆုံးရှုံးမှာ ကြောက်နေရလို့ စိတ်မချမ်းသာပြန်ဘူး။
အော်… လိုချင်တာ ရလည်း စိတ်လွတ်ကိုယ်လွတ် စိတ်မချမ်းသာနိုင်သေးပါလား။

++++++++++++++++++++++++++++++++++++

ဘယ်လိုအကြောင်းကြောင့် စိတ်ချမ်းသာပါတယ်လို့ အကြောင်းပြစရာ
ရှိတဲ့သူဟာ သူတို့ကတိကို ယုံပြီး ပျော်နေတဲ့သူလိုပဲ။
ကြုံဖူးပေါင်းလည်း များလှပြီ။
ယုံတုန်းပဲလား။

++++++++++++++++++++++++++++++++++++


ကိုယ်ပြောင်းလဲနိုင်တာကို ပြောင်းလဲလိုက်ပါ။
ဒါပေမယ့် ကိုယ်မပြောင်းနိုင်တဲ့ကိစ္စက ကိုယ့်ကို စိတ်ဆင်းရဲအောင်
လုပ်ခွင့်ကိုတော့ မပေးလိုက်ပါနဲ့။

++++++++++++++++++++++++++++++++++++

ကြုံတွေ့ရတဲ့အခြေအနေက ကိုယ့်ကို အဆုံးအဖြတ်ပေးနိုင်အောင်
ကိုယ်က ခွင့်ပြုထားရင် စ်ိတ်ချမ်းသာမှုကို ဆုံးရှုံးရလိမ့်မယ်။

++++++++++++++++++++++++++++++++++++

ကိုယ့်ကို စိတ်ဆင်းရဲအောင် လုပ်နိုင်တဲ့သူဟာ ကိုယ့်ကို နိုင်လို့ရတဲ့သူ
ဖြစ်နေပြီ။ အဲဒါကို ခွင့်မပြုပါနဲ့။ အနိုင်ယူခွင့် မပေးပါနဲ့။
ဒါလောက်ကြီးမားတဲ့ အာဏာကို မပေးလိုက်ပါနဲ့။

++++++++++++++++++++++++++++++++++++

လောကကြီးမှာ ကိုယ့်စကားကို တကယ် နားထောင်မယ့်သူတစ်ယောက်ပဲ
ရှိတယ်။ အဲဒီလူကတော့ ကိုယ်ပဲ။
အဲဒီတစ်ယောက်ကိုပဲ သေသေချာချာ နားလည်အောင် ပြောပါ။
အဲဒီတစ်ယောက်ကိုပဲ စိတ်ချမ်းသာအောင် နေတတ်ဖို့ သင်ပါ။

++++++++++++++++++++++++++++++++++++

စိတ်ချမ်းသာအောင်နေဖို့ အခွင့်အရေးရှိသလို တာဝန်လည်း ရှိပါတယ်။
အဲဒီအခွင့်အရေးနဲ့တာဝန်ကို လျှော့မတွက်လိုက်ပါနဲ့။
ကိုယ့်ကို တစ်ယောက်ယောက်က စိတ်ချမ်းသာအောင်လုပ်ပေးရမယ်လို့
မျှော်လင့်နေတာဟာ အကြီးမားဆုံးအမှားပဲ။
ကိုယ့်စိတ်ကိုတောင် ကိုယ် ချမ်းသာအောင် မထားနိုင်တဲ့သူတွေက
သူများကို စိတ်ချမ်းသာမှုပေးနိုင်မယ် ဆိုတာ ယုံသလား။

++++++++++++++++++++++++++++++++++++

သူများက ကိုယ့်ကို စိတ်ချမ်းသာအောင် လုပ်ပေးရမယ်လို့ မျှော်လင့်တာ
တောင်းဆိုတာဟာ ကိုယ့်တာဝန်ကို ကိုယ် မယူချင်တဲ့သူတွေရဲ့ မျှော်လင့်ချက်နဲ့တောင်းဆိုမှုပဲ။
ဘယ်လောက်ပဲ မျှော်လင့် မျှော်လင့်၊
ဘယ်လောက်ပဲ တောင်းဆို တောင်းဆို၊ ရမှာ မဟုတ်လို့ စိတ်ပျက်ရတာနဲ့ပဲ
ပွဲသိမ်းရလိမ့်မယ်။
ကိုယ့်ကို စိတ်ချမ်းသာအောင် လုပ်ပေးနိုင်တာ တစ်ယောက်ပဲ ရှိတယ်။
ဘယ်သူလဲ။
ကိုယ်ပဲ။
ကိုယ်မှ မလုပ်နိုင်ရင် ရမှာမဟုတ်ဘူး။
မပေးနိုင်တဲ့သူဆီက မမျှော်လင့်ပါနဲ့တော့။

++++++++++++++++++++++++++++++++++++


ငါ ကံဆိုးတယ်လို့ တွေးရင် ဝမ်းနည်းမယ်။
ငါ့ကို ဂရုမစိုက်ကြဘူးလို့ တွေးရင် စိတ်ဆိုးမယ်။ ဝမ်းနည်းမယ်။
ငါ့ကို မပေးဘူးလို့တွေးရင်လည်း ဝမ်းနည်းမယ်။ နာကြည်းမယ်။
ဒီခံစားချက်တွေ ဒီလို ဝမ်းနည်းတာတွေ၊ စိတ်ဆိုးတာတွေ နာကြည်းတာတွေကိ သေသေချာချာ
ကြည့်ရင် ကိုယ့်အကြောင်းကို ကိုယ် တွေးတာ များလို့ ဖြစ်ရတာကို တွေ့ရမယ်။
ကိုယ်က လိုချင်တာနဲ့ ကိုယ်ရတာနဲ့ကွာနေလို့၊ ကိုယ်ရတာ နည်းနေတယ်လို့ ထင်လို့၊
ဝမ်းနည်းတာ စိတ်ဆိုးတာ၊ နာကြည်းတာပါ။
ငါ ရသင့်သလောက်မရဘူးလို့ ထင်နေလို့ မကျေနပ်တာ။

++++++++++++++++++++++++++++++++++++

ဘယ်သူ့ဆီကမှ ဘာမှ မမျှော်လင့်ရင် မကျေမနပ်ဖြစ်စရာ မလိုတော့ဘူး။
စိတ်ချမ်းသာချင်ရင် သူများဆီက ရဖို့ မျှော်လင့်တာကို လျှော့ပါ။
ကိုယ်တတ်နိုင်တာကို လုပ်ပါ။

++++++++++++++++++++++++++++++++++++

စိတ်ချမ်းသာဖို့ အကြောင်းပြချက်တွေ များလေလေ စိတ်ချမ်းသာဖို့ ခက်လေလေပဲ။
ဘာအကြောင်းပြချက်မှမရှိပဲ စိတ်ချမ်းသာအောင် နေနိုင်ရင် အမြဲ စိတ်ချမ်းသာမယ်။
စိတ်ချမ်းသာမှုအစစ်ဟာ အကြောင်းပြချက်မရှိဘူးဆိုတာ ကို နားလည်ဖို့ သိပ်အရေးကြီးပါတယ်။
လိုချင်တာ ရရင် စိတ်ချမ်းသာမယ်လို့ ထင်ကြတယ်။
ရှာရင်းနဲ့မောနေပြီ။
လိုချင်တာက များများလာတယ်။
လိုချင်တာရလေ လိုချင်တာ ပိုများလေ ဖြစ်လာတယ်။

++++++++++++++++++++++++++++++++++++

ဘာအကြောင်ပြချက်မှ မရှိပဲ စိတ်ချမ်းသာနေတဲ့သူဟာ စိတ်ဓာတ်အင်အားကြီးတဲ့သူပဲ။
သူ့ကို ဘယ်သူကမှ စိတ်ဆင်းရဲအောင် လုပ်လို့မရရင်
သူ့ကို ဘယ်သူကမှ လွှမ်းမိုးလို့ မရတော့ဘူး။

++++++++++++++++++++++++++++++++++++

စိတ်ချမ်းသာချင်ရင် လိုချင် ဘယ်လိုကိစ္စပေါ်မှာမှ မမှီပါနဲ့။
ကိုယ် မှီထားတဲ့အရာက လှုပ်ရင် ကိုယ်ပါ လှုပ်နေမယ်။

++++++++++++++++++++++++++++++++++++

စိတ်ချမ်းသာမှုဟာ ဘဝနေနည်းပါ (ဆရာတော်ဦးဇောတိက) စာအုပ်မှ
ကောက်နှုတ်ဖော်ပြပါတယ်။

++++++++++++++++++++++++++++++++++++

ကိုယ်ကိုယ်တိုင် ဖတ်ဖို့-၁၀၆…


Sunday, August 26, 2012

"အမေ့ထံသို့ ပေးစာများ-၅၁..."



သို့
ချစ်တဲ့အမေ
သား သတိတရ စာရေးလိုက်ပါတယ်။
အမေဆီကို သားစာမရေးဖြစ်တာတောင် အတော်ကြာသွားပြီ။
အမေဆီကို စာရေးချင်စိတ်က ဖြစ်နေတာ ခဏခဏပါပဲ။
ဒါပေမယ့် အလုပ်က တစ်နေ့လုံးလိုလို ဖြစ်နေတာမို့ မရေးဖြစ်ဘူး။
အိမ်ပြန်ရောက်တော့လည်း ပင်ပန်းတာကြောင့် စိတ်ကူးတွေကို ပြန်ဖမ်းမရတာကြောင့်
မရေးဖြစ်ပြန်ဘူး။
တစ်ပတ်တစ်ရက် ပိတ်ရက်ရပြန်တော့လည်း တစ်ပတ်လုံးလုံး ပင်ပန်းမှုကြောင့်
မရေးဖြစ်ပြန်ပါဘူး။
အခု မရေးရင် နောင်ဘယ်တော့မှ ရေးနိုင်တော့မှာ မဟုတ်ဘူးဆိုတဲ့အတွေး
ပေါ်လာတော့မှ ရေးဖြစ်အောင် ကြိုးစားပြီးရေးလိုက်ပါတယ်။
ဟုတ်တယ်အမေ။
ခံစားချက်ဆိုတာ ပေါ်လာတုန်း ဖမ်းဆုပ်နိုင်ရင် ဖမ်း။
မဖမ်းဆုပ်နိုင်ရင် ပျောက်ကွယ်သွားတဲ့အရာပဲလေ။
ဘာမြဲတာ ရှိလို့လဲဆိုတဲ့ အမေရဲ့စကားအတိုင်းပါပဲ။
နောင်တွေးပြီး ရေးဦးတော့ အကြောင်းကိုသာ ဖမ်းဆုပ်နိုင်မယ်။
ခံစားချက်ကိုတော့ ဖမ်းနိုင်ဖို့ မဖြစ်နိုင်တော့ဘူး။
အမေ့ကို ရင်ဖွင့်ရဦးမယ်။
အခုလုပ်နေတဲ့ စားသောက်ဆိုင်လုပ်ငန်းကိုလုပ်နေတာ (၆)တောင် ကျော်ပြီ။
လုပ်ငန်းကိုတော့ ကျွမ်းကျင်လာပါတယ်။
စားသုံးသူ တွေရဲ့သဘောလည်း သိလာပါတယ်။
တတ်သိနားလည်မှုတွေလည်း သိသိသာသာ တိုးလာပါတယ်။
ဒါပေမယ့် ကျန်းမာရေးကတော့ ကျ ကျလာတယ်။
အရင်ဆုံးဖြစ်တာက နှာခေါင်းထဲကသွေးစသွေးနတွေ မကြာမကြာ ထွက်တယ်။
ဆရာဝန်ဖြစ်ခဲ့ဖူးတော့ အတွေးက အဆုံးအစမရှိ တွေးဖြစ်တယ်။
အသိက အဆိုးဆုံးတွေကို သိနေတော့ ကြောက်တဲ့စိတ် ဖြစ်လာတယ်။
မီးဖိုချောင်မှာ လုပ်ရတော့ အနံ့အသက်ပေါင်းစုံနဲ့တွေ့ထိနေရတယ်။
အဆိုးဆုံးက ဓာတုဆေးတွေပဲ။
အဲဒီအနံ့အသက်ရရင် အသက်ရှုရကြတ်လာတယ်။
အအေးခန်းထဲဝင်ပြီး အသက်ကို ဝဝလင်လင်ရှုရတာလည်း ခဏခဏပါပဲ။
နောက်တစ်ခုက အဆစ်အမြစ်တွေ ကိုက်ခဲလာတာပါပဲ။
အခုလောလောဆယ်ဖြစ်နေတာကတော့ ဘယ်ဖက်လက်ကောက်အဆစ်ကိုက်ခဲနေတာပဲ။
သုံးပတ်လောက်ရှိတော့မယ်။
လူစားမရှိတော့ နားလို့လဲ မရဘူး။
အလေးအပင်တွေကလည်း အများကြီးမ, နေရတယ်။
နာနာနဲ့ လုပ်နေရတာပေါ့။
ဆိုင်ကလည်း တစ်နေ့ထက် တစ်နေ့ ရောင်းကောင်းလာတော့ အလုပ်ကလည်း များများလာတယ်။
စားသုံးသူတွေရဲ့တောင်းဆိုချက်ကြောင့် အလုပ်ကို လျော့လုပ်လို့မရဘူး။
ညှာလုပ်လို့မရဘူး။
နားလုပ်လို့ မရဘူး။
အလေးအပင်တွေကလည်း မမ, လို့မရဘူး။
အလေးအပင်တွေ မ တဲ့အခါ နှလုံးက မောလာတယ်။
အသက်အရွယ်ကြောင့် နှလုံးက မခံနိုင်တော့တဲ့ သဘောလားလို့တွေးဖြစ်တယ်။
မကြာခဏလည်း မူးလာတယ်။
ဖြစ်သမျှတွေကို အားလုံးပြောရင် အမေစိတ်ရှုတ်တော့မယ်။
အမေထက်တောင် ရောဂါတွေ များနေပြီးလားတောင် မသိပါဘူးအမေရယ်။
ဒီလိုဆိုရင် ဒီအလုပ်ကို "မလုပ်နဲ့တော့" လို့ အမေပြောလာမယ်ဆိုတာ သိပါတယ်။
ငွေနဲ့ကျန်းမာရေးလဲလှယ်ရတာ မတန်မှန်းလည်း သား သိပါတယ်။
ဒါပေမယ့် အခုလောလောဆယ် အမေရိကန်မှာက အလုပ်တွေ ရှားပါးနေတယ်။
အလုပ်တစ်ခုက ထွက်သွားပြီး နောက်အလုပ်တစ်ခု ရဖို့ဆိုတာ ခက်ခဲမှန်း
ကာလီဖိုးနီးယားမှာ ကတည်းက အတွေ့အကြုံအရ သိနေပါပြီ။
မိန်းမကတော့ သူ လုပ်ကျွေးမယ်။ အလုပ်က ထွက်ဖို့ပြောရှာပါတယ်။
ကျနော်တို့မှာလည်း ရည်မှန်းချက်က ရှိနေတယ်။
ငွေစုပြီး လုပ်ငန်းတစ်ခုလုပ်ဖို့။
ဒီတော့ တစ်ယောက်အားနဲ့လုပ်တာထက် နှစ်ယောက်အားနဲ့လုပ်တာက
ပိုမြန်နိုင်တာမို့ အလုပ်ကို ကြိတ်မှိတ်လုပ်နေရတာပါ။
ဒီမှာက အလုပ်ရှိမှ ငွေရှိတယ်။
အလုပ်က ငွေဖြစ်နေတဲ့နေရာ။
ငွေဟာ အရာရာကို အဆုံးအဖြတ်ပေးနေတဲ့နေရာဖြစ်နေတာမို့
ရွေးချယ်လမ်းက များများစားစားမရှိလှဘူး။
မလုပ်ချင်လည်း လုပ်။
မလုပ်နိုင်လည်း လုပ်။
ငွေလိုချင်ရင် လုပ်ဆိုသလို ဖြစ်နေတယ်။
ကဲ…အမှန်အတိုင်းပြောလို့ အမေ စိတ်ညစ်နေမှာ စိုးလို့မပြောခဲ့တာတောင်
လပေါင်းများစွာ ကြာခဲ့ပြီ။
သိအောင် ပြောပြတာပါ။ ခံစားရအောင် ပြောတာမဟုတ်ပါဘူး။
ဒီရောက်ရင် ဒီလိုဖြစ်တာ ကျနော်တစ်ယောက်ထဲမဟုတ်ပါဘူး။
ပညာနဲ့လုပ်စားခွင့်မရရင် ကျနော်လိုပဲ ကြုံနိုင်ပါတယ်။
ငယ်ရွယ်ရင်တော့ ခံနိုင်တာပေါ့။
ကျနော့်အသိမိတ်ဆွေထဲမှာ ဒီနိုင်ငံက ဒေါက်တာဘွဲ့(PhD) ရပြီးတော့ သင့်တော်တဲ့အလုပ်
မရလို့ အလုပ်လက်မဲ့ဖြစ်နေသူတောင် ရှိတယ်။
သူ့မိသားစုက ကြောထောက်နောက်ခံလုပ်ပေးနိုင်တော့ ခံသာတာပေါ့။
အဲဒါတွေကိုတွေ့ထားတော့ အလုပ်ထွက်ဖို့ တော်တော်ခက်သွားတယ်။


အမေ မစ်ချီဂန်က ရာသီတွေ ပြောင်းစ ပြုနေပြီ။
နွေရာသီကုန်တော့မယ် ထင်တယ်။
မိုးတွေ မကြာမကြာ ရွာနေတယ်။
မိုးရွာပြီးရင် အေးလာတယ်။
မိုးရွာတော့ သစ်ပင်တွေလည်း စိမ်းလန်းစိုပြေနေတာပေါ့။
အခုချိန်ထိတော့ နေလို့ကောင်းတုန်းပါပဲ။
ဆောင်းကာလကတော့ တဖြည်းဖြည်း နီးလာပြီ။
ကျနော်တို့နေတဲ့နေရာဆိုရင် ဆီးနှင်းကျချိန်ဆိုရင် (၃၀)လက္မ အထိ ကျတတ်တယ်ဆိုပါလား။
ကြားရုံနဲ့တောင် ကျောချမ်းလာတယ်။
ကျနော်တို့က မစ်ချီဂန်ရဲ့မြိုတော် လင်စင်းမှာ နေနေတာပါ။
အဲဒါက တောင်ပိုင်းအခြမ်းထဲမှာပါတယ်။
မြောက်ပိုင်းမှာဆိုရင် ဆောင်းတွင်းမှာ ဆီးနှင်းတွေ ကျလာပြီဆိုရင်
(၁၆၀)လက္မ အထိ ကျတယ်လို့ မစ်ချီဂန်ဆိုတဲ့စာအုပ်မှာ ဖတ်လိုက်ရတယ်။
ငှက်တွေဆိုရင်တော့ ဆောင်းခိုတဲ့အနေနဲ့ သင့်တော်တဲ့နေရာကို
ပျံသန်းသွားကြပေမယ့် တောင်ပံမပါတဲ့ကျနော်တို့အဖို့
သင့်တော်တဲ့နေရာကို ဘယ်မှာသွား
 ဆောင်းခိုနိုင်ပါ့မလဲ။
ဘာဘဲဖြစ်ဖြစ် အတွေ့အကြုံသစ်တွေတော့ ရနိုင်တယ်လို့
အကောင်းဖက်က တွေးရတော့မှာပဲ။
ဒီမှာတော့ ဘာသာစကားက အရမ်းကို အရေးကြီးတယ်ဆိုတာ ထပ်ပြောလိုက်ဦးမယ်။
အမေ့ရဲ့မြေးတွေကို ဘာသာစကားတွေ သင်ကြားဖို့နဲ့ လေ့ကျင့်ဖို့
ထပ်ပြောလိုက်ပါအုန်း။
ဒီမှာက ဘာသာစကားကျွမ်းကျင်ရင် ပညာများများစားစားမတတ်ရင်တောင်
အလုပ်က လွယ်သေးတယ်။
ပညာဆိုတာလည်း အခြားနိုင်ငံက တတ်တဲ့ပညာကို သူတို့က 
အသိအမှတ်ပြုတာ မဟုတ်ပါဘူး။

ဒီနိုင်ငံက ရတဲ့ပညာမှ သူတို့က အသိအမှတ်ပြုတော့ ပညာသင်ကာလမှာ
ဒီနိုင်ငံရောက်တဲ့လူငယ်တွေအဖို့တော့ သိပ်ကံကောင်းတယ်လို့ ဆိုရမယ်။
ဘာကြောင့်ဆိုတော့ ဒီနိုင်ငံမှာ ကောင်းကောင်းစားရတယ်။
စားသောက်စရိတ်တွေက ဈေးပေါတယ်လေ။
ပြားစေ့(Cent) တွေနဲ့ ဈေးဝယ်လို့ရတုန်းပဲလေ။
တန်ဖိုးလည်း ရှိတယ်။
ကောင်းကောင်းဝတ်ရတယ်။
အဝတ်အစားတွေလည်း ဈေးပေါတာပဲ။
တစ်ရာသီလောက်နောက်ကျသွားတဲ့အဝတ်အစားဆိုရင်
အလကားနီးပါးလောက်ဈေးနဲ့ဝယ်လို့ရတယ်။
ကောင်းကောင်းနေရတယ်။
ဒါလည်း လူတိုင်းလူတန်းစေ့အောင် နေဖို့စီမံထားတဲ့စီမံကိန်းကြောင့်လား
မပြောတတ်ပါဘူး။
အကြွေးနဲ့ဝယ်ခွင့်ရရင် အိမ်ဝယ်စရိတ်နဲ့ အိမ်ငှားစရိတ်က
သိပ်မကွာတော့ဘူး။ အကြွေးသာ မှန်မှန်ဆပ်သွားရင် တစ်ချိန်ကျရင် အိမ်ပိုင်ဖြစ်ရော။
အိမ်တိုင်းလိုလိုကလည်း ဟော်တယ်လိုပါပဲ။
ဒါကြောင့် ငယ်ငယ်ရွယ်ရွယ်နဲ့ရောက်လာတဲ့လူငယ်တွေအတွက်
လောကနိဗ္ဗာန်ပါပဲ။
ရောက်လာတဲ့ ဘယ်လူငယ်မှ မပြန်ချင်ကြဘူး။
ဒါပေမယ့် လူကြီးတိုင်းက ပြန်ချင်ကြတယ်။
အဲဒါ အမေရိကန်နိုင်ငံလို့ခေါ်ပါတယ်။
အမေ ကျန်းမာရေးကို ဂရုစိုက်ပါနော်။
အမေနဲ့မိသားစုတွေအားလုံးနဲ့
မြန်မာနိုင်ငံသူ နိုင်ငံသားအားလုံးကို
သတိရနေတယ်။
ချစ်တဲ့အမေရဲ့သား
အောင်ဝင်းဟိန်း
လန်ဆင်းမြို့(Lansing)
မစ်ချီဂန်ပြည်နယ်(Michigan)
အမေရိကန်ပြည်ထောင်စု(USA)။
၈-၂၆-၂၀၁၂

လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com