Thursday, December 11, 2014

"အမေ့ထံသို့ ပေးစာများ-၁၀၂..."



သို့
ချစ်တဲ့အမေ
သတိရစွာဖြင့် စာရေးလိုက်ပါတယ်။
မဖြစ်မနေ သွားရတဲ့ခရီးဟာ လေးရက်ကြာပါတယ်။
အနားမရတာ ကြာလှပြီမို့ ခုလို ခရီးသွားလိုက်တာဟာ
နားရက်ခရီးရှည်ထွက်သလို ခံစားရပါတယ်။
စိတ်လည်း ပေါ့ပါးလန်းဆန်းသွားပါတယ်။
လုပ်ငန်းခွင်ပြန်ဝင်တော့ အတော်လေးပေါ့ပါးနေပါတယ်။ 
ထူးခြားတဲ့အချက်တစ်ခုက စတိုးမန်နေဂျာ အပြောင်းအလဲဖြစ်နေပါတယ်။ 
စတိုးမန်နေဂျာအဟောင်းက အရပ်ရှည်ရှည်၊ထောင်ထောင်မောင်းမောင်း၊
အခုရောက်လာတဲ့စတိုးမန်နေဂျာအသစ်က အရပ်ပုပု၊ဂင်တိုတို။
တူညီတဲ့အချက်က နှစ်ယောက်စလုံး အသားဖြူတဲ့အမေရိကန်တွေဖြစ်ကြတယ်။
ပြီးတော့ ယောကျာ်းတွေဖြစ်ကြတယ်။
စတိုးမန်နေဂျာအဟောင်းက စိတ်ကောင်းမရှိတဲ့ အပြုအမူတွေ အများကြီးကို တွေ့ကြုံခဲ့ရတယ်။
ပြောရရင်တော့ အများကြီးပါပဲ။
သူနဲ့အတူတူ အလုပ်လုပ်ခဲ့ရတဲ့ကာလဟာ မရှည်ကြာပေမယ့်
တော်တော်စိတ်အနှောင့်အယှက် ဖြစ်ခဲ့ရပါတယ်။
သူ့ရဲ့စိတ်ဓာတ်က သူ့ကို အကျိုးဖြစ်စေတယ်လို့ပြောရမလားပဲ။
အလုပ်ကပြောင်းသွားရတာ မဟုတ်ပဲ အလုပ်က ပြုတ်သွားတယ်လေ။
ဖြစ်ပုံက ဒီလို။
သူလည်း ဂျော်ဂျီယာပြည်နယ်ကနေ ပြောင်းလာခဲ့တာလို့ ကြားမိတယ်။
ဒီရောက်တော့ ထုံစံအတိုင်း နေစရာ အခန်းရှာရတယ်။
ကျနော်တို့နေတဲ့ကွန်ဒိုကိုတောင် လာပြီးစုံစမ်းတယ်။
ဈေးကြီးတယ်လို့ပြောကြောင်း အခန်းငှား ဝန်ထမ်းအမျိုးသမီးတစ်ဦးကပြန်ပြောလို့ သိရတယ်။
နောက်တော့ အခြားတစ်နေရာမှာ အခန်းငှားဖြစ်သွားတယ်။
အခန်းခဈေးကြီးတဲ့အတွက် အခန်းတစ်ခန်းကို နှစ်ယောက်ငှားတယ်လို့ကြားရတယ်။
နောက်တစ်ယောက်ကတော့ ကျနော်တို့မတ်ကက်ထဲက အပျိုမတစ်ယောက်နဲ့ပေါင်းငှားတယ်။
အသက်ငါးဆယ်ကျော် စတိုးမန်နေဂျာ ယောကျာ်းနဲ့ အသက်အစိတ်လောက်ရှိတဲ့ဒုမန်နေဂျာ
အဆင့်ရှိတဲ့မိန်းမတို့ဟာ  အခန်းခ သက်သာအောင် တစ်ခန်းထဲနေကြတယ်လို့ ကြားရ တော့
အံသြမိတာပေါ့။ 
သူတို့တွေဟာ လင်မယားလည်းမဟုတ်ဘူး။ 
သမီးရီးစားလည်း မဟုတ်ပဲနဲ့အတူတူနေကြတယ်ဆိုတော့ မအံသြပဲ မနေနိုင်ဘူးလေ။
ကြာလာတော့ ဒါဟာ သူတို့ရဲ့ယဉ်ကျေးမှုဖြစ်မှာပါလေလို့တွေးပြီးမေ့မေ့ပျောက်ပျောက်နေခဲ့တယ်။
ဒါနဲ့ပြောရဦးမယ်။ ကမ္ဘာကျော်ရုပ်ရှင်မင်းသားဖြစ်တဲ့ဘရပစ်(Brad Pitt)နဲ့
ကမ္ဘာကျော်ရုပ်ရှင်မင်းသမီးဖြစ်တဲ့ အင်ဂျလီနာဂျိုလီ(Angelina Jolie)တို့ဟာ သားသမီးခြောက်ယောက်ရပြီးမှ မင်္ဂလာဆောင်ကြသတဲ့။
အဲဒီသားသမီးခြောက်ယောက်ထဲမှာ သားသမီးအရင်းအချာတွေပါသလို
မွေးစားထားတဲ့ သားသမီးတွေလည်း ပါတယ်။
ဘာဘဲဖြစ်ဖြစ် ကျနော်တို့ယဉ်ကျေးမှုနဲ့ဆိုရင် နားလည်ရခက်ခဲတဲ့ကိစ္စတစ်ခုဖြစ်ပေမယ့်
ဒီမှာတော့ ဖြစ်လေ့ဖြစ်ထကိစ္စတစ်ခုဖြစ်နေပြီလေ။
အဖေမရှိပဲ ကလေးမွေးတာဟာ ကျနော်တို့ဆီမှာ အတင်းပြောလို့ အလွန်ကောင်းတဲဖြစ်ရပ်တစ်ခုပေါ့။ဒီမှာတော့ ဖြစ်နေကျဖြစ်ရပ်တစ်ခုလိုမျိုး
ဘယ်သူမှ စိတ်မဝင်စားဘူး။ဘယ်သူမှ အရေးအရာလုပ်ပြီးမပြောဘူး။
ယဉ်ကျေးမှုမတူတာတွေပေါ့။
အဲ…ဒါနဲ့ဆက်ပြောရရင် တစ်နေ့မှာ အဲဒီ ဒု မန်နေဂျာမလေးနဲ့
အခြားဌာနက မန်နေဂျာတစ်ယောက်တို့ဟာ အလုပ်ကိစ္စနဲ့ စကားများကြတယ်။
အမေရိကန်ယောကျာ်းတစ်ယောက်နဲ့ အမေရိကန်မိန်းမတစ်ယောက်တို့စကားများ၊
ရန်ဖြစ်နေတာကို ဒီတစ်ခါပဲ နီးနီးကပ်ကပ်မြင်ဖူးတယ်။ကိုယ် ထိလက်ရောက်တော့ မဖြစ်ကြပါဘူး။
အသံကျယ်ကျယ်နဲ့ပြောကြ၊ဆဲကြတာနဲ့ပြီးသွားတယ်။နောက်ဆက်တွဲကမပြီးဘူး။
သိပ်မကြာခင်မှာပဲ စစ်ဆေးရေးတွေ ဝင်စစ်တယ်။
နောက်ဆက်တွဲက ဒုမန်နေဂျာမလေး အလုပ်ပြောင်းသွားတာကို ကြားရတယ်။
နောက်မှသိရတာက အလုပ်ပြောင်းသွားတာဟာ အခြားမတ်ကက်တစ်ခုကို ပြောင်းသွားတာလို့ သိရတယ်။ဒီအလုပ်ကတော့ ပြုတ်သွားတာ။
သိပ်မကြာခင်မှာပဲ ကျနော်တို့လှိုဝှက်နာမည်ပေးထားတဲ့ဆင်ပေါက်ကြီးခေါ်တဲ့စတိုးမန်နေဂျာလည်း
အလုပ်ပြုတ်သွားကြောင်း ထပ်မံကြားသိရတယ်။ကိုယ့်အပေါ် စိတ်စေတနာမကောင်းတဲ့သူ အလုပ်ပြုတ်သွားလို့ ဝမ်းသာသလားလို့ ကိုယ့်ကိုယ်ကို ပြန်မေးကြည့်မိတယ်။
ဝမ်းမသာမိပါဘူး။ ဘာဖြစ်လို့လဲဆိုတော့ အလုပ်ပြုတ်တာဟာ
ဘယ်သူပဲဖြစ်ဖြစ် ဝမ်းသာစရာမှ မဟုတ်ပဲ။
သူ့အတွက် ယာယီအခက်အခဲတော့ ဖြစ်မှာ အမှန်ပဲ။အခန့်မသင့်ရင် ဘဝတစ်ဆစ်ချိုးတောင်
ပြောင်းသွားနိုင်တယ်။သူများအခက်အခဲဖြစ်တာဟာ ဝမ်းသာစရာ မဟုတ်ဘူးလေ။
ဒါပေမယ့် ဝမ်းနည်းမိသလားလို့ဆိုရင် ဝမ်းမနည်းမိတာ အမှန်ပဲ။
အသစ်ရောက်လာတဲ့စတိုးမန်နေဂျာက ခေါင်းတစ်ခုလုံးဖြူနေတာမို့ ကျနော်တို့က
သူ့ကို လျှို့ဝှက်နာမည်ပေးလိုက်တယ်။ “ခေါင်းဖြူကြီး” လို့။
ရောက်ရောက်ချင်းပဲ သူက သူ့ကိုယ်သူ လာမိတ်ဆက်တယ်။
ပြီးတော့ မေးတယ်။
"ဆူရှီးက ဒီစတိုးကို ရာခိုင်နှုန်း ဘယ်လောက်ပေးရသလဲ" တဲ့။
ယုံယုံက " နှစ်ဆယ့်ရှစ်ရာခိုင်နှုန်း"  ပြန်ဖြေတယ်။
"ဟ…တော်တော်ပေးရတာပဲ" လို့ပြောသွားတယ်။
ဒီလိုအရေးတယူမေးဖေါ်၊ပြောဖေါ်တဲ့အတွက် ကျေးဇူးတင်မိပါတယ်။
အရင်လူက အပြစ်ပဲ ရှာနေသလို ခံစားရတယ်။အဆိုးမြင်စိတ် များနေတယ်။
သူ့ကိုဝန်ထမ်းတွေရဲ့အတင်းစကားကို အများကြီးကြားရတယ်။
အခုစတိုးမန်နေဂျာအသစ်ကိုတော့ စောင့်ကြည့်ရဦးမယ်လေ။
စတိုးမန်နေဂျာအသစ်က ရှင်းလင်းရေး၊ပြောင်းရွေ့ရေးအလုပ်တွေကို အရင်ဆုံးလုပ်တယ်။
အဲဒီတုန်းကတော့ ဗြောင်ဆန်နေတာပဲ။

အမေ့ရဲ့သားမက် ကိုမြသီ(စစ်မှုထမ်းဟောင်း)ပြောတဲ့စကားကို သတိရမိတယ်။
“တပ်ရင်းမှူးအသစ်ပြောင်းတိုင်း အရင်တပ်ရင်းမှူးလုပ်တဲ့အလုပ်တွေကို ပါ ပြောင်းပစ်တာ ထုံးစံဖြစ်နေပါပြီ။အရင်တပ်ရင်းမှူးက သစ်ပင်စိုက်တယ်။ နောက်တပ်ရင်းမှူးက ရှုတ်တယ်ဆိုပြီး
အဲဒီသစ်ပင်တွေအားလုံးကို ခုတ်ပစ်တယ်။
အရင်တပ်ရင်းမှူးက ရေကန်တူးတယ်။ နောက်တပ်ရင်းမှူးလာပြီဆိုရင် အဲဒီရေကန်ကို ဖို့ပစ်တယ်။
တစ်ခါတစ်ရံကျတော့ သူတို့တွေလုပ်နေတာဟာက အကျိုးအကြောင်းဆီလျှော်မှုမရှိတော့
ကလေးဆန်နေသလို ဖြစ်နေတယ်ဗျာ” တဲ့။
အခုလည်း အဲဒီလိုမျိုး ဖြစ်နေလေရော့သလား အောင်းမေ့ရတယ်။

++++++++++++++++++++++++++++++
စတိုးမန်နေဂျာအသစ်က…
သိပ်မကြာပါဘူး။ ဆူရှီးတွေ ရောင်းကောင်းတယ်ဆိုပြီး ဆူရှီးကုန်ကြမ်းတွေ တင်ရောင်းတာကို
တွေ့ရတယ်။ ဆူရှီးကုန်ကြမ်းတွေဆိုတာက ဆူရှီးဆန်(Sushi Rice) ၊
ဗင်နီကာဆိုတဲ့အချဉ်ရည်(Vinegar)၊
ဆီးဝိ(Sea Weed) စတဲ့ ဆူရှီးကို အိမ်မှာလုပ်စားလို့ရနိုင်တဲ့ကုန်ကြမ်းတွေ အားလုံးတင်ရောင်းတယ်။
လုပ်စားချင်သူတွေ ဘယ်လိုလုပ်စားရသလဲလို့ လာမေးပါတယ်။
ရိုးရိုးသားသားပဲ ပြောပြပါတယ်။
ကျနော်တို့ကုမ္ပဏီက ဆူရှီးဘိုးလ်(Sushi Bowl)လို့ခေါ်တဲ့အမျိုးအမည်အသစ်တစ်မျိုးကို ထုတ်တယ်။
ဈေးနှုန်းက တစ်ခုကို တစ်သောင်းကျပ်ကျော်ကျော်ပေးရတယ်။
ပထမရက်မှာ နှစ်ဘူးထုတ်တယ်။
သူက ဆယ်မွန်ငါးနဲ့ တူနားငါး နှစ်မျိုးနဲ့ထုတ်တယ်။
အဲဒီရက်မှာ နှစ်ဘူးစလုံးကျန်တယ်။ မသိကြလို့ ထင်တယ်။
ယုံယုံက နောက်ရက်မှာ လေးဘူး ထုတ်တယ်။
ကျနော်က သဘောမတူချင်ဘူး။စဉ်းစားကြည့်လေ။ မရောင်းရလို့ နှစ်ဆ ထုတ်တာဟာ
စွန့်စားလွန်းရာ ကျမနေဘူးလား။ ဒါပေမယ့် ကျနော်ဘာမှမပြောပါဘူး။
စီးပွားရေးဆိုတာ တစ်ခါတစ်လေမှာ စွန့်စားရတာပဲလေ။
အဲဒီနေ့မှာ လေးဘူးစလုံး ရောင်းရတယ်။
တတိယနေ့မှာ ဆယ့်တစ်ဘူးရောင်းရတယ်။
ဆူရှီးဘိုး(Sushi Bowl) တွေ ရောင်းရတယ်ဆိုပြီး စတိုးမန်နေဂျာအသစ်က
Fresh Market Bowl အသစ် ထုတ်တယ်။ အသွင်မတူအောင်ဆိုပြီး
ဆန်နဲ့ပဲ (Black Bean) တွဲချက်တယ်။ ငါးအစား သူက ကြက်သား၊ အမဲသား၊ဝက်သားကို သုံးတယ်။
ဈေးနှုန်းက သက်သာတယ်။ ပါဝင်ပစ္စည်းက များတယ်။
ပြီးတော့ ကျနော်တို့ ရောင်းတဲ့ အရောင်းကောင်တာနားမှာ လာချရောင်းတယ်။
ဒီမှာတော့ ပြိုင်ဆိုင်မှုက ပြင်းထန်လွန်းလှတယ်။
စိတ်ရှုတ်နေလို့လည်း မရဘူး။
သူ့အလုပ်သူလုပ်၊ ကိုယ့်အလုပ်ကိုယ်လုပ်ပဲ။
ဇွဲမကောင်းသူတွေ ထွက်သွားလိမ့်မယ်။
စိတ်ကူးကောင်းပြီး ဆန်းသစ်နိုင်သူ ကျန်ခဲ့လိမ့်မယ်။
ဒီနေ့အဖို့တော့ ဒီလောက်ပါပဲ အမေရယ်။
အမေ့ကို ချစ်တဲ့သား
အောင်ဝင်းဟိန်း
အက်ရ်ှဗန်းမြို့(Ash-burn)
ဗားဂျီးနီးယားပြည်နယ်(Virginia)
အမေရိကန်ပြည်ထောင်စု(USA)







Tuesday, November 25, 2014

"အမေ့ထံသို့ ပေးစာများ-၁၀၁..."




သို့
ချစ်တဲ့အမေ
သတိရစွာဖြင့် စာရေးလိုက်ပါတယ်။
အေသင်မြို့ကနေ ထွက်လာကထဲက ကားကို ပုံမှန်မောင်းခဲ့တယ်။
နားချင်တဲ့နေရာမှာ နားမယ်။
အိပ်ချင်တဲ့အချိန်ရောက်ရင် ရောက်တဲ့မြို့မှာ ဝင်အိပ်မယ်။
ဂျော်ဂျီယာပြည်နယ်ကနေ တောင်ပိုင်းကာရိုးလိုင်းနားပြည်နယ်ကို နှစ်နာရီလောက်ပဲ
မောင်းရတယ်။
နေရောင်ခြည်က ရှိနေသေးတာမို့ ဆက်မောင်းခဲ့တယ်။
မြောက်ပိုင်းကာရိုးလိုင်းနားပြည်နယ်ကိုရောက်တော့ နေရောင်ခြည်မရှိတော့။
ည ဆယ်နာရီကျော်တော့ ရောက်တဲ့မြို့တစ်မြို့မှာ အိပ်မယ်ဆိုပြီး
မြို့တစ်မြို့ကို ဝင်ခဲ့တယ်။
အရင်ဆုံးလုပ်ရမယ့်အလုပ်က အိပ်ရမယ့်ဟော်တယ်တစ်ခုကို ရှာတယ်။
တွေ့တဲ့ဟော်တယ်တိုင်းက လူပြည့်နေတယ်။
GPS ထဲက ပြတဲ့ဟော်တယ်အတော်များများကို သွားဖြစ်တယ်။
အချို့ဟော်တယ်က တစ်ခန်းသာ ကျန်တော့တယ်။
အဲဒီအခန်းက ဆေးသောက်သောက်သူတွေ နေတဲ့အခန်း။
အခန်းကို သွားကြည့်တော့ မနေနိုင်လောက်အောင် ဆေးလိပ်အနံ့တွေ ရနေတယ်။
ဟော်တယ်အခန်းကို ရှာရင်း သတိထားမိတဲ့အချက်က
ဆယ်နာရီကျော်ကျော်သာ ရှိသေးတယ်။ ဒီမြို့ရဲ့လမ်းမတွေပေါ်မှာ
ကားတွေ မတွေ့ရခြင်းဖြစ်တယ်။ဒါဟာ ဖြစ်ရိုးဖြစ်ဆင်မဟုတ်ပါ။
အမေရိကန်ရဲ့မြို့အတော်များများကို ရောက်ဖူးပါတယ်။
တစ်ညလုံး ကားတွေနဲ့ဥဒဟို သွား၊လာနေကြမြဲ။
ည ဆယ်နာရီဆိုတာ ကားပြတ်တတ်တဲ့အချိန်မဟုတ်။
လမ်းမပေါ်တွင် ကားမရှိတော့ ကျနော်တို့ကားတစ်စီးထဲ သွားလာနေတော့ ထူးခြားနေသလိုဖြစ်နေတယ်။
ဒါနဲ့တွေ့တဲ့ဟော်တယ်တစ်ခုမှာ
အခန်းရရင် ဘာဘဲဖြစ်ဖြစ် ဝင်တည်းတော့မယ်လို့
စိတ်ကူးပြီး ဟော်တယ်တစ်ခုထဲဝင်တော့
အဲဒီဟော်တယ်ထဲကနေ ရဲကား သုံးစီးထွက်လာပါတယ်။
ဒီမြို့ဟာ တည်းခိုသင့်တဲ့မြို့တစ်မြို့မဟုတ်မှန်း နားလည်လိုက်ပါတယ်။
စိတ်ကူးကို ပြောင်းလိုက်ပါတယ်။
ကားကို ဆက်မောင်းလာတယ်။ တစ်မြို့ပြီးတစ်မြို့ကို ဖြတ်ကျော်လာခဲ့တယ်။
လေယာဉ်ကွင်းနဲ့နီးတဲ့မြို့တစ်မြို့ကိုရောက်တော့ အချိန်ကလည်း ည ၁၂း၀၀နာရီ
ထိုးတော့မယ်။ ဒီမြို့တော့ အိပ်သင့်တဲ့မြို့လို့ မျော်လင့်မိပါတယ်။
လေယာဉ်ကွင်းရဲ့ဝင်းခြံတွေထဲမှာ ကားအမြောက်အများကို တွေ့ရတယ်။
အဲဒီကားတွေက လေယာဉ်နဲ့ခရီးသွားတွေရဲ့ကားတွေဖြစ်ကြောင်းကို
မိတ်ဆွေတစ်ဦးပြောဖူးလို့ သိထားပါတယ်။
လေယာဉ်နဲ့ခရီးသွားတွေက ကြိုက်တဲ့မြို့တွေကို သွားကြ၊
ကြိုက်တဲ့နိုင်ငံတွေကို သွားကြ၊
ကိုယ့်ရဲ့ကိုယ်ပိုင်ကားတွေကိုတော့ လေယာဉ်ကွင်းရဲ့ကားအငှားဌာနတွေမှာ ထားခဲ့ကြ၊
ကြိုက်သလောက်နေပြီးမှ ပြန်လာရင် အဲဒီအငှားဌာနကကားကို ပြန်ထုတ်ပြီး အိမ်ပြန်ကြ။
ဒီအချိန်က ခရီးသွားရာသီဖြစ်တာကြောင့် ကားအများအပြားကို တွေ့ရတယ်။
ဒါကြောင့်လည်း ဟော်တယ်တိုင်းလိုလို လူတွေပြည့်နေကြတာကိုးလို့နားလည်လိုက်ပါတယ်။
ဟော်တယ်တစ်ခုကိုဝင်စုံးစမ်းကြည့်တော့ ဈေးအမြင့်ဆုံးအခန်းတစ်ခန်းသာကျန်တော့ကြောင်း
သိရတယ်။
မတတ်နိုင်တော့ပါ။ အဲဒီတစ်ခန်းကို ရတာကိုပဲ
သူ့မကိုပဲ ကျေးဇူးတင်ရမလိုလို၊
ကိုယ့်အတွက်ပဲ ဝမ်းသာရမလိုလို၊
ဈေးအကြီးဆုံးအခန်းဖြစ်သလို အပေါ်ဆုံးအထပ်လည်း ဖြစ်နေပါတယ်။
အခန်းက ကျယ်သလို ကောင်းလည်း ကောင်းလှပါတယ်။
အိပ်ခန်းကသတ်သတ်၊
ဧည့်ခန်းက သတ်သတ်၊ဧည့်ခန်းမှာ ပစ္စည်းမျိုးစုံထားပေးထားပါတယ်။
မခံစားနိုင်တော့ပါ။
ပင်ပန်းနေတဲ့အတွက် ရောက်တာနဲ့အဝတ်အစားလဲပြီးအိပ်လိုက်ပါတယ်။
နောက်တစ်နေ့ နံက်စာစားချိန်ရောက်မှ နိုးပါတော့တယ်။
နံနက်စာ စားပြီး ထပ်အိပ်လိုက်ပြန်ပါတယ်။
အချိန်ပြည့်တော့မှ အိပ်ယာထ၊ ရေချိုးပြီး ခရီးဆက်ခဲ့ပါတယ်။
အမှန်ဆိုရင် ဒီနေ့ဟာ အိမ်ပြန်ရောက်ရမယ့်ရက်။
နောက်တစ်နေ့ဟာ အလုပ်ပြန်ဝင်ရမယ့်ရက်။
လုပ်ငန်းကို တာဝန်ယူထားသူကို ဖုံးဆက်လိုက်တယ်။
တစ်ရက်ပိုပြီး လုပ်ပေးနိုင်သလားလို့ မေးပါတယ်။
သူကတစ်ရက်ဆိုရင် တာဝန်ယူနိုင်ပါတယ်လို့ အကြောင်းပြန်လာပါတယ်။
ဒါကြောင့် ကျနော်တို့ ဝါရှင်တန်ဒီစီမြို့ကို ဆက်မောင်းသွားပါတယ်။
စိတ်ကူးထားတာက ဝါရှင်တန်ဒီစီမြို့မှာ တစ်ညအိပ်မယ်။
ဝါရှင်တန်ဒီစီမြို့ရဲ့ညအလှကို တိုးကားတွေစီးပြီး လျှောက်ကြည့်မယ်။
နောက်တစ်နေ့မှာတော့ VOA သတင်းဌာနကို လျှောက်လည်မယ်။
မြန်မာထမင်းဆိုင်မှာ အဝစားမယ်။
မရောက်ဖူးသေးတဲ့နေရာတွေ အနှံ့လျှောက်လည်မယ်။
ဝါရှင်တန်ဒီစီမြို့ကိုရောက်တော့ နေဝင်ဆည်ဆာဖြစ်နေပြီ။
ဒီကာလဟာ ခရီးသွားရာသီဆိုတာ သိပေမယ့် အထပ်ပေါင်းများစွာရှိတဲ့ဟော်တယ်တွေ
ကိုယ့်အတွက် တစ်ခန်းတစ်လေတော့ဖြင့် ရနိုင်တယ်ဆိုတဲ့အတွေးနဲ့
ဟော်တယ်တစ်ခုပြီးတစ်ခု လျှောက်ရှာဖြစ်တယ်။
အခန်းလွတ်မရှိပါဆိုတဲ့စကားတွေကိုသာ ကြားခဲ့ရပါတယ်။
အံသြမိပါတယ်။ အခန်းရှာချိန်ဟာ သုံးနာရီကျော်သွားခဲ့တယ်။
ည ကိုးနာရီကျော်လာပြီမို့ စိတ်လျော့ကာ ဗားဂျီးနီးယားပြည်နယ်ရဲ့အက်ရှ် ဗန်းမြို့ကို ပြန်လာခဲ့တယ်။
အက်ရ်ှဗန်းမြို့မှာပင် ဟော်တယ်ကို ရှာချိန်ဟာ သုံးနာရီကျော်ကျော်ရှာလေတော့မှ
ဈေးနှုန်းမြင့်တဲ့အခန်းတစ်ခန်းကို ရပါတယ်။
ခရီးသွားရာသီမှာ ဟော်တယ်အခန်းကို ရှာရတဲ့ဒုက္ခက ကြီးမားလှပါဘိ။
အွန်လိုင်းနဲ့ကြိုတင်ဘွတ်ကင်လုပ်ထားသင့်ကြောင်းလည်း ထပ်လောင်း သိလိုက်ရပါတယ်။
ဟော်တယ်မှာ  ပြည့်ပြည့်ဝဝနားလိုက်တဲ့အတွက် ကျေနပ်သလိုလိုတော့ ဖြစ်သွားပါတယ်။
နောက်တစ်နေ့ နေ့လည်မှာတော့ DMVရုံးကိုဝင်ပြီး ကားကိစ္စကို အပြီးလုပ်ဆောင်ဖြစ်ပါတယ်။
DMVရုံးနဲ့ တည်းခိုခဲ့တဲ့ဟော်တယ်က နီးနီးလေးဖြစ်နေတဲ့အတွက်
 အစစအရာရာ အစဉ်ပြေသွားပါတယ်။
ကားကိစ္စကို ပြီးစီးအောင်လုပ်ပြီးတော့မှ အိမ်ပြန်ခဲ့ပါတယ်။
 ဒီနေ့တော့ ဒီလောက်ပါပဲ။
အမေ့ကို ချစ်တဲ့သား
အောင်ဝင်းဟိန်း
အက်ရ်ှဗန်းမြို့(Ash-burn)
ဗာဂျီးနီးယားပြည်နယ်(Virginia)
အမေရိကန်ပြည်ထောင်စု(USA)








လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com