Thursday, June 7, 2012

"ကောင်းတာကို အတူတူလုပ်ပါ..."





စိတ်ချမ်းသာအောင် လုပ်နည်း အကျဉ်းချုပ်…မှအဆက်…

၂၅။     ကိုယ် ဝါသနာပါတာ ကိုယ့်အရည်အချင်းနဲ့ကိုက်ညီတာ
ပညာလည်း ရတာကို လုပ်ဖို့ အမြဲ စီစဉ်ပါ။
ရေရှည် ရည်မှန်းချက်ကို သေသေချာချာ ရွေးပါ။
ရည်မှန်းချက်တစ်ခုကို ရောက်ဖို့ နေ့စဉ် လုပ်နေတဲ့သူဟာ စိတ်စုစည်းမှု ရှိတယ်။
အဲဒါကိုက စိတ်ချမ်းသာဖို့ အကြောင်းတစ်ခု ဖြစ်တယ်။
ဘာလုပ်ရမှန်းမသိပဲ ကြုံရာကို လုပ်နေတဲ့သူဟာ စိတ်ချမ်းသာမှု အပြည့် မရနိုင်ဘူး။

***...***...***...***...***...

တကယ် စိတ်ချမ်းသာတဲ့သူ၊ ကိုယ့်ဘဝကို ကိုယ် စိတ်ကျေနပ်မှုရတဲ့သူဟာ ရည်မှန်းချက် ပီပြင်တဲ့သူ
ရည်မှန်းချက်ကိုရောက်အောင် နေ့တိုင်း လုပ်နေတဲ့သူပဲ။
ကိုယ့်ရည်မှန်းချက်ကို အဆင့်ဆင့် ပိုင်းထားပြီး တော့ မကြာမကြာ ဘယ်အဆင့်ရောက်နေပြီလဲဆိုတာကို
တိုင်းတာ စစ်ဆေးဖို့လိုတယ်။ တစ်ဆင့်ပြီးတိုင်း စိတ်ပိုချမ်းသာလာမယ်။

+++++++++++++++++++++++++++

၂၆။     ကိုယ့်အားကိုယ်ကိုးပါ။
ကိုယ် ဘာလုပ်မယ်ဆိုတာကို ကိုယ့်ဟာကိုယ်ဆုံးဖြတ်ပါ။
တတ်နိုင်သလောက် ကိုယ့်ဟာကိုယ် လုပ်တတ်အောင် လေ့လာပါ။
သူများကို အားကိုးရတာ ကြာလေနည်းလေ ဖြစ်အောင် လုပ်ပါ။
ကိုယ့်ဘဝမှာ ကောင်းတာတွေဖြစ်လာအောင် ကိုယ့်ဟာကိုယ် လုပ်နိုင်တဲ့သူဟာ ပိုပြီး
စိတ်ချမ်းသာတယ်။

+++++++++++++++++++++++++++


၂၇။     အရည်အချင်းရှိတဲ့သူဟာ စိတ်ပိုချမ်းသာတယ်။
မသိဘူး၊ မတတ်ဘူးလို့ပြောရတာ စိတ်မချမ်းသာစရာ ကောင်းပါတယ်။
စိတ်ရဲ့သဘာဝကိုက သိချင်တဲ့သဘာဝ ရှိတယ်။
ကလေးတွေကို ကြည့်ပါ။ လေ့လာပါ။
သူတို့ဟာ အမြဲတန်း စူးစမ်းနေတယ်။
သူတို့ တစ်ခုခုသိရရင် သိပ်ပျော်တယ်။
သိပ်ပြောချင်တယ်။
လူရဲ့ဦးနှောက်ဟာ သိဖို့ဖြစ်လာတာ။
မသိရရင် ဦးနှောက်ဟာ ထိုင်းမှိုင်းသွားတယ်။
မသိသေးတာတစ်ခုကို သိလိုက်တိုင်း ဦးနှောက်နဲ့စိတ်ဟာ အသက်ဝင်လာတယ်။
ဒါကြောင့် သိချင်စိတ် အားကြီးတဲ့သူ၊ သိရအောင် လေ့လာနေတဲ့သူ၊ စမ်းသပ်နေတဲ့သူ၊
တစ်နေ့ထက်တစ်နေ့ အသိအမြင် တိုးတက်နေတဲ့သူဟာ အသက်ဝင်နေတယ်။
သိရတာ ပျော်စရာ သိပ်ကောင်းပါတယ်။
ကြောင်လေးတွေကို ကြည့်ပါ။
နေရာအနှံ့သူတို့စူးစမ်းတယ်။
သူတို့မှာ သိချင်စိတ် သိပ်အားကြီးတယ်။

+++++++++++++++++++++++++++

၂၈။     အရက်စွဲတာ မူးယစ်ဆေးစွဲတာမျိုး မဖြစ်အောင် စကတည်းက အဲဒါမျိုးကို မလုပ်ပါနဲ့။
အဲဒီလို တစ်ခုခုကို စွဲမိရင် စိတ်ချမ်းသာမှုမရနိုင်တော့ဘူး။
မကောင်းတဲ့အကျင့်ဆိုးတွေကို မဖြစ်အောင် ရှောင်ပါ။
အကျင့်ဆိုးမှန်သမျှဟာ လွတ်လပ်မှုကို ဖျက်ဆီးတယ်။ ဂုဏ်သိက္ခာကို ကျစေတယ်။
လူလူချင်း ရင်းနှီးမှုကိုလည်း ပျက်စေတယ်။
အကျင့်မကောင်းသူချင်း ပေါင်းလို့ရပေမယ့် အဲဒီလို ပေါင်းတာက စိတ်ချမ်းသာမှု မရနိုင်ဘူး။
ကောင်းတာကို အတူတူလုပ်ရတာ သိပ်ပျော်စရာ ကောင်းပါတယ်။
မကောင်းတာကို အတူတူလုပ်ရတာက စစ်မှန်တဲ့ပျော်ရွှင်မှု မရနိုင်ဘူး။
မကောင်းတာကို လုပ်တဲ့သူတွေဟာ တစ်ယောက်ကို တစ်ယောက် စိတ်ချလက်ချ မယုံကြဘူး။
လူလူချင်း မယုံကြည်မှုဟာ စိတ်ကို ပင်ပန်းစေတယ်။

***...***...***...***...***...

ကောင်းတာကို အတူတူလုပ်ကြတဲ့သူချင်း တစ်ယောက်ကိုတစ်ယောက် ယုံကြည်ကြတယ်။
တစ်ယောက်ကိုတစ်ယောက် ယုံယုံကြည်ကြည် ဆက်ဆံရတာ စိတ်ချမ်းသာတယ်။
ဒါကြောင့် စိတ်ချမ်းသာချင်ရင် ကောင်းတာကို အတူတူလုပ်ပါ။

+++++++++++++++++++++++++++

၂၉။    မကောင်းတဲ့ အသက်မွေးဝမ်းကျောင်း မဖြစ်အောင် အသက်မွေးဝမ်းကျောင်းမှုကို
သေသေချာချာ စဉ်းစားပြီး ရွေးပါ။
မှားနေရင် ရပ်ပါ။
အလုပ်ဟာ ဘဝမှာ အင်မတန် အရေးပါပါတယ်။
ဘဝရဲ့ အကောင်းဆုံးအချိန်တွေကို အလုပ်လုပ်ရပါတယ်။
တစ်နေ့တာရဲ့အကောင်းဆုံးအချိန်ကို အလုပ်မှာ သုံးရတယ်။
ဒါကြောင့် အလုပ်မှာ စိတ်ချမ်းသာမှုရဖို့ သိပ်အရေးကြီးတယ်။
အလုပ်မှာ စိတ်ဆင်းရဲရင် စိတ်ချမ်းသာပါတယ်လို့ ပြောဖို့ မလွယ်ဘူး။
အလုပ်မှာ စိတ်ဆင်းရဲရင် အိမ်မှာပါ ထိခိုက်တယ်။

+++++++++++++++++++++++++++

၃၀။     ခိုးတတ်တဲ့အကျင့်၊ လိမ်တတ်တဲ့အကျင့် မဖြစ်အောင် စကတည်းက
ဘယ်တော့မှ မလုပ်ပါနဲ့။

+++++++++++++++++++++++++++

စိတ်ချမ်းသာဖို့ လိုရင်းပါ (ဆရာတော်ဦးဇောတိက) စာအုပ်မှ ကောက်နှုတ်ဖော်ပြပါတယ်။

+++++++++++++++++++++++++++

ကိုယ်ကိုယ်တိုင် ဖတ်ဖို့ (၂၆)…



လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com