Saturday, April 9, 2011

" ဥာဏ်ပညာကြီးမားသူဖြစ်ရပါလို၏..."


ကဿပဘုရားရှင်ရဲ့

သာသနာထွန်းကားနေတဲ့ခေတ်တစ်ခေတ်တုန်းကအဖြစ်အပျက်။

ဂင်္ဂါမြစ်အနီးက ကျောင်းတိုက်ကြီး တစ်တိုက်မှာ

ရဟန်းတော်များ သီတင်းသုံးနေကြပါတယ်။


ရဟန်းတော်တစ်ပါးဟာ

နံနက်စောစောထပြီး တံမြက်လှည်းရင်း

မြတ်စွာဘုရားရဲ့ဂုဏ်တော်တွေကို

ဆင်ခြင်လေ့ရှိပါတယ်။


တစ်နေ့တော့

တံမြက်လှည်းပြီး ပုံထားတဲ့အမှိုက်တွေကို

အနီးမှာ ရှိနေတဲ့ ကိုယ်ရင်တစ်ပါးကို လှမ်းခေါ်ပြီး

“ ကိုရင် ဒီအမှိုက်တွေ ကျုံးပြီး ပစ်လိုက် ”လို့ခိုင်းပါတယ်။

ဒါပေမယ့် ကိုရင်က မကြားဟန်ပြုနေပါတယ်။

နောက်နှစ်ကြိမ်၊သုံးကြိမ် ထပ်ခေါ်ပါတယ်။

ကိုရင်က မကြားဟန်ပဲပြုနေပါတယ်။


ဒီတော့ ရဟန်းက

ကိုရင်အနားကို သွားပြီး

မကြားဟန်ပြုနေတဲ့ ကိုရင်ကို တံမြက်စည်းရိုးနဲ့ရိုက်ပါတယ်။

ပြီးတော့ အမှိုက်ကို ကျုံးခိုင်းလိုက်ပါတယ်။

ကိုရင်လည်း ငိုပြီး ကြောက်ကြောက်နဲ့အမှိုက်ပစ်နေတုန်း

ဘယ်လိုဆုတောင်းသလဲဆိုတော့ ...


" ငါဟာ ဒီအမှိုက်ကျုံး ပစ်ရတဲ့ကုသိုလ်ကောင်းမှုကြောင့်

နိဗ္ဗာန်ရောက်တဲ့အထိ မွန်းတည့်နေလို ဘုန်းတန်ခိုးကြီးသူ ဖြစ်ရပါလို၏ "


လို့ ပထမအကြိမ် ဆုတောင်းလိုက်ပါတယ်။

နောက်အမှိုက်ပစ်ပြီး ရေချိုးဖို့ ဂင်္ဂါမြစ်ဆိပ်အဆင်း

တစ်ဝုန်းဝုန်းနဲ့လှိုင်းတံပိုးတွေ ထနေတဲ့မြစ်ရေအလျင်ကို မြင်ရပြန်တော့

ဘယ်လိုဆုတောင်းသလဲဆိုတော့ ...


"ငါဟာ ဒီမြစ်ရေအလျင်လို ဥာဏ်ပညာကြီး ရပါလို၏ "


ဆုတောင်းပြန်ပါတယ်။


ကိုရင်ဟာ ဆရာရိုက်လို့ အမှိုက်ကျုံးပစ်ရပေမယ့်

တကယ်လုပ်ရတဲ့အခါ

ကျတော့ စိတ်ပါလက်ပါနဲ့လုပ်ပြီး ဆုတောင်းခဲ့တာပါပဲ။

တံမြက်လှည်းတဲ့ ရဟန်းတော်လည်း

တံမြက်စည်းကို ထားနေကျနေရာမှာ ထားခဲ့ပြီး

ရေချိုးဖို့ ဂင်္ဂါမြစ်ဆိပ်ဆင်းအလာ

ကိုရင်ရဲ့ဆုတောင်းသံကြားလိုက်ရတော့


" ငါခိုင်းလို့လုပ်ရတဲ့ ကိုရင်က ဒီလိုဆုတောင်းလို့ပြည့်ရင်

ငါကပြောစရာတောင် မလိုဘူး "


ဆိုပြီး၊


" ငါဟာ တံမြက်လှည်းရတဲ့ကုသိုလ်ကောင်းမှုကြောင့် နိဗ္ဗာန်ရောက်သည့်ဘဝတိုင်

ဂင်္ဂါမြစ်ရဲ့လှိုင်းတံပိုးလို မကုန်ခန်းနိုင်တဲ့ ဥာဏ်ပညာကြီးမားသူ ဖြစ်ရပါလို၏

ပြီးတော့ ကိုရင်မေးတိုင်း မေးတိုင်း ဖြေကြားနိုင်တဲ့ ပုဂ္ဂိုလ် ဖြစ်ရပါလို၏ "


လို့ ဆုတောင်းလိုက်ပါတယ်။

အဲဒီကုသိုလ်ကောင်းမှုနဲ့ ဆုတောင်းတွေကြောင့်ပဲ

သူတို့ဆုတောင်းအတိုင်း

ကိုရင်က မိလိန္ဒမင်းကြီးဖြစ်ပြီး

ရဟန်းတော်က အရှင်နာဂသိန် ဖြစ်လာခဲ့ပါတယ်။


ဂေါတမမြတ်စွာဘုရား ပရိနိဗ္ဗာန်ပြုပြီး နှစ်ပေါင်း ငါးရာအလွန်မှာ

သူတို့နှစ်ဦး ပေါ်ထွန်းခဲ့တာပါ။

သူတို့နှစ်ဦးကြောင့် သာသနာမှာအကျိုးများလွန်းလှတဲ့

မိလိန္ဒပဥှာကျမ်းကြီးပေါ်ပေါက်လာခဲ့ရပါတယ်။

အဲဒီကျမ်းကြီးမှာ မိလိန္ဒမင်းကြီးကမေးပြီး

အရှင်နာဂသိန်ကဖြေကြားထားတဲ့ကျမ်းကြီးဖြစ်ပါတယ်။







လူသားတိုင်း ကျန်းမာကြပါစေ... လူသားတိုင်း ချမ်းသာကြပါစေ...
ခန္ဓာကိုယ်ကို လေ့ကျင့်ခန်းနဲ့စောင့်ရှောက်ပါ။ စိတ်ကို စာဖတ်ခြင်းနဲ့စောင့်ရှောက်ပါ။...

နူတ်ဆက်စကားလေးများ.....

မြန်မာတို့ရဲ့ ဘလော့ဂ်များ...

picoodle.com