“ စိတ်ချမ်းသာဖို့ ဘာအကြောင်းပြချက်မှ မလိုဘူး...”

စိတ်ချမ်းသာမှုဟာ အကျိုးတရားလား၊ အကြောင်းတရားလားလို့ မေးရင်

လူများစုက အကျိုးတရားလို့ ပြောကြလိမ့်မယ်။

လိုချင်တာ ရလို့ စိတ်ချမ်းသာတယ်။

စိတ်ချမ်းသာတာဟာ အကျိုးတရား။

သူက ကိုယ့်ကိုချစ်လို့ စိတ်ချမ်းသာတယ်။

စိတ်ချမ်းသာတာဟာ အကျိုးတရား။

ချီးမွမ်းတာ ခံရလို့ စိတ်ချမ်းသာတယ်။

စိတ်ချမ်းသာတာဟာ အကျိုးတရား။

+++++++++++++++++++++++++++

ဒါပေမယ့် တကယ် စိတ်ချမ်းသာချင်ရင် စိတ်ချမ်းသာမှုကို

အကြောင်းတရားဖြစ်အောင် လုပ်ရမယ်။

စိတ်ချမ်းသာမှုဟာ အကျိုးတရားဖြစ်နေရင် စိတ်ချမ်းသာစရာ တွေ

ဘယ်လောက်များများ စိတ်ချမ်းသာစရာလေးတစ်ခု ရှိနေရင်

စိတ်ချမ်းသာနိုင်တော့ဘူး။

+++++++++++++++++++++++++++

လူများစု စိတ်မချမ်းသာတာဟာ စိတ်ချမ်းသာစရာအကြောင်းကို ရှာနေကြလို့ပါ။

အကြောင်းမရှိပဲ စိတ်ချမ်းသာနိုင်မှ တကယ့်စိတ်ချမ်းသာမှု။

အကြောင်းရှိလို့ စိတ်ချမ်းသာတာဟာ ဘယ်သူမဆို ရနိုင်တယ်။

အကြောင်းမရှိပဲ စိတ်ချမ်းသာတာဟာ စိတ်အကြောင်းကို ကောင်းကောင်းသိတဲ့သူမှ ရတယ်။

+++++++++++++++++++++++++++

“ငါ စိတ်ချမ်းသာဖို့ ဘာအကြောင်းပြချက်မှ မလိုဘူး” ဆိုရင် အာဂလူလို့ဆိုရမယ်။

ဒီနေ့ကစပြီးတော့ ဘာအကြောင်းပြချက်မှ မရှိပဲ စိတ်ချမ်းသာအောင် နေမယ်လို့ 

ဆုံးဖြတ်နိုင်ရင် စိတ်ဓာတ်အင်အား တကယ်ကြီးတဲ့သူ ဖြစ်ပြီး။

+++++++++++++++++++++++++++

ကိုယ့်ကို ဘယ်သူမှ စိတ်ဆင်းရဲအောင်လုပ်လို့ မရတော့ဘူးဆိုရင်

က်ိုယ့်ကို ဘယ်သူမှ manipulate လုပ်လို့ မရတော့ဘူး။

တစ်ယောက်ယောက်က ကိုယ့်ကို စိတ်ချမ်းသာအောင် လုပ်ပေးမလားလို့

မျှော်လင့်နေရတာ မလွတ်လပ်ဘူး။

+++++++++++++++++++++++++++

တစ်ယောက်ယောက်က တစ်ခုခုပြောလိုက်ရင် ကိုယ့်စိတ်ချမ်းသာမှု

ချက်ချင်း ပျောက်သွားမယ်။ ဘာဖြစ်လို့လဲ။

ကိုယ့်စိတ်ချမ်းသာမှုဟာ သူများလက်ထဲမှာ ရှိနေလို့ပဲ။

ကိုယ့်စိတ်ချမ်းသာမှုဟာ သူများလက်ထဲမှာ ရှိနေရင်

ကိုယ့်ဘဝဟာ သူများလက်ထဲမှာ ရောက်နေလို့ပေါ့။

အဲဒါကောင်းသလား။

တကယ်ဥာဏ်ရှိတဲ့သူဟာ အဲဒါကို လက်မခံပါဘူး။

ကိုယ့်စိတ်ချမ်းသာမှုကို ဘယ်သူမှ မဖျက်ဆီးနိုင်မှ စိတ်ချမ်းသာမှု အစစ်လို့

ပြောလို့ရမယ်။

အဲဒါမှ ကိုယ့်စိတ်ချမ်းသာမှုလို့ ပြောလို့ရမယ်။

+++++++++++++++++++++++++++

No one can change your attitude without your permission.

ကိုယ်က ခွင့်မပြုပဲ ကိုယ့်သဘောထားကို ဘယ်သူကမှ ပြောင်းလို့ မရဘူး။

+++++++++++++++++++++++++++

Sometimes things go your way and sometimes they don’t.

တစ်ခါတစ်လေ ကိုယ်ဖြစ်ချင်တာ ဖြစ်လာတယ်။ တစ်ခါတစ်လေ မဖြစ်ဘူး။

+++++++++++++++++++++++++++

You may not always get to choose what happens.

You always get to decide how you feel about what happens.

ကိုယ်ဖြစ်ချင်သလို အမြဲမဖြစ်ဘူး။

ဒါပေမယ့် ဖြစ်လာတဲ့ကိစ္စနဲ့ပတ်သက်ပြီး ကိုယ့်စိတ်ထားကိုတော့ ကိုယ်ထားတတ်ရင် ရပါတယ်။

+++++++++++++++++++++++++++

ဒီနေ့ ဘာတွေ တွေ့ကြုံရမယ်ဆိုတာ ကိုယ့်စိတ်ကြိုက်ရွေးလို့ မရပါဘူး။

ဒါပေမယ့် အဲဒီအတွေ့အကြုံတွေကို ဘယ်လို သဘောထားမယ်ဆိုတာကတော့

ကိုယ့်အပေါ်မှ မူတည်ပါတယ်။

အခြေအနေတွေက လုပ်သမျှ ခံရတဲ့သူ  ဖြစ်မလား။

အခြေအနေကို ကိုယ်က နိုင်နင်းတဲ့သူ ဖြစ်မလား။

+++++++++++++++++++++++++++

You have a right to be unhappy. I cannot talk you out of it.

စိတ်ဆင်းရဲချင်တယ် ဆိုရင် အဲဒါ ကိုယ့်အခွင့်အရေးပါပဲ။

+++++++++++++++++++++++++++

Most people have allowed unhappiness to be their strategy to living their life.

လူတော်တော်များများဟာ စိတ်ဆင်းရဲနေတဲ့နည်းနဲ့ ဘဝကို နေကြတယ်။

စိတ်ဆင်းရဲနေတာဟာ သူတို့အတွက် လုပ်နည်းလုပ်ဟန် တစ်မျိုးဖြစ်နေတယ်။

အဲဒီလို နေရတာ တွက်ချေကိုက်ရဲ့လား။

သဘောထားကို ပြောင်းပါလို့တော့ မပြောလိုပါဘူး။

ဒါပေမယ့် စိတ်ချမ်းသာတာဟာ တွက်ချေကိုက်တယ်လို့တော့ ပြောချင်တယ်။

+++++++++++++++++++++++++++

စိတ်ဆင်းရဲနေတဲ့အချိန်မှာ ကိုယ့်စိတ်ကို ကိုယ် သေသေချာချာ ကြည့်ပါ။

အဲဒီလို ခံစားနေရတာကို ကြိုက်သလား။

ဘာအကျိုးရှိသလဲ။

စိတ်ဆင်းရဲနေရုံနဲ့ ကိုယ်ဖြစ်ချင်တာ ဖြစ်လာမှာလား။

+++++++++++++++++++++++++++

စိတ်ချမ်းသာတဲ့သူမှာ အခက်အခဲတွေ၊ ပြဿနာတွေ မရှိတာ မဟုတ်ပါဘူး။

သူတို့ဟာ အခက်အခဲတွေကို၊ ပြဿနာတွေကို စိတ်ဆင်းရဲနေတဲ့နည်းနဲ့

မဖြေရှင်းကြဘူး။

+++++++++++++++++++++++++++

ရီတာဟာ အကောင်းဆုံးဆေးလို့ ဆိုကြတယ်။

ဆေးဆိုတာ မကျန်းမာတဲ့ ခန္ဓာကိုယ်ကို ကျန်းမာအောင် လုပ်ပေးတယ်။

အားရှိအောင် လုပ်ပေးတယ်။

ဒါကြောင့် အဆင်မပြေတာ တစ်ခုခုရှိနေတဲ့အခါမှာ ရီနိုင်ဖို့ လိုတယ်။

အဆင်မပြေတာတစ်ခုခု ရှိနေတဲ့အခါမှာ ရီနိုင်တာဟာ စိတ်ဓာတ်အင်အားကြီးတဲ့

လက္ခဏာဖြစ်ပါတယ်။

စိတ်ဓာတ် အားနည်းတဲ့သူဟာ နည်းနည်းလေး အဆင်မပြေတာ တစ်ခုခု ရှိနေရင်

မရီနိုင် မပြုံးနိုင်တော့ဘူး။

+++++++++++++++++++++++++++

စိတ်ချမ်းသာအောင်နေတတ်တဲ့သူဟာ ပိုပြီး အောင်မြင်တယ်။

လိုချင်တာရဖို့ အလားအလာ ပိုများတယ်။

သံလိုက်ဟာ သံကို ဆွဲငင်နိုင်သလို စိတ်ချမ်းသာမှုဟာ အောင်မြင်မှုကို ဆွဲငင်နိုင်တယ်။

+++++++++++++++++++++++++++

စိတ်ချမ်းသာမှုဟာ ကိုယ့်အင်အား ကိုယ့်စွမ်းအား ။

စိတ်ချမ်းသာနေမှ အင်အားကြီးတဲ့သူ။

စိတ်ချမ်းသာနေတဲ့အချိန်မှာ စိတ်ဓာတ်အင်အား အကြီးဆုံးပဲ။

စိတ်ချမ်းသာနေတဲ့အချိန်မှာ ဥာဏ်ပညာ ထက်မြက်တယ်။

+++++++++++++++++++++++++++

စိတ်ချမ်းသာမှုဟာ စိတ်အတွင်းအခြေအနေ ဖြစ်တယ်။

စိတ်ချမ်းသာနေတာဟာ အကောင်းဆုံး စိတ်အခြေအနေဖြစ်တယ်။

အဲဒီစိတ်အခြေအနေမှာ ဥာဏ်အကောင်းဆုံး။

အဲဒီအခြေအနေမှာ အကောင်းဆုံးစိတ်ကူးတွေ ထွက်တယ်။

စိတ်ချမ်းသာနေတဲ့အချိန်မှာ သတိကောင်းတယ်။ စိတ်ဟာ ပစ္စုပ္ပန်မှာ ရှိတယ်။

စိတ်ချမ်းသာနေတဲ့အချိန်မှာ ကျန်းမာရေးကောင်းတယ်။

စိတ်ချမ်းသာနေတာဟာ ကျန်းမာရေးကို ပိုကောင်းစေတယ်။

စိတ်ချမ်းသာအချိန်မှာ ဘာဘဲလုပ်လုပ် ပိုပြီး အဆင်ပြေတယ်။

စိတ်ချမ်းသာနေတဲ့အချိန်မှာ စိတ်ကောင်းရှိတယ်။

+++++++++++++++++++++++++++

စိတ်ချမ်းသာနေတာဟာ ကိုယ့်ရဲ့ပင်ကိုယ်စိတ်အခြေအနေ။

မနက် နိုးလာတာနဲ့ ဘာအကြောင်းပြစရာမှ မလိုပဲ စိတ်ချမ်းသာနေတဲ့သူ ဖြစ်ရမယ်။

အဲဒီစိတ်ချမ်းသာမှုကိုလည်း ဘယ်လို အကြောင်းကိစ္စကမှ မဖျက်ဆီးနိုင်ရဘူး။

+++++++++++++++++++++++++++

စိတ်ချမ်းသာမှုဟာ ဘဝနေနည်းပါ (ဆရာတော်ဦးဇောတိက) စာအုပ်မှ

ကောက်နှုတ်ဖော်ပြပါတယ်။

+++++++++++++++++++++++++++

ကိုယ်ကိုယ်တိုင် ဖတ်ဖို့-၁၀၅…