မြို့ကြီးတစ်မြို့ရဲ့အဝင်ဝနားမှာရှိတဲ့ စားသောက်ဆိုင်တစ်ခုမှာ
ပညာရှိဆိုကရေးတီးက စားသောက်ပြီးထိုင်နေတယ်။
မကြာခင်မှာ အခြားမြို့က ခရီးသွားတစ်ယောက်ရောက်လာပြီး
ဒေသခံဖြစ်သူ ဆိုကရေးတီးကိုမေးခွန်းတစ်ခုမေးပါတယ်။
“ဒီမြို့ကလူတွေ ဘယ်လိုစိတ်နေသဘောထားမျိုးရှိကြပါသလဲ ခင်ဗျာ.?”
ဆိုကရေးတီးကပြန်မေးပါတယ်။
“ခင်ဗျား…ထွက်လာခဲ့တဲ့မြို့ကလူတွေကရော ဘယ်လိုစိတ်နေသဘောထားမျိုးရှိကြသလဲ?”
ခရီးသွားဧည့်သည်က
“ကျနော်တို့မြို့ကတော့ ဆိုးပါ့ဗျာ…လုံးဝမယုံကြည်ရတဲ့လူတွေ၊
အမြီးကျက်အမြီးစား ခေါင်းကျက်ခေါင်းစားလူတွေ၊ ချည်းပါပဲ။
လူလိမ်လူညာလည်း ပေါပါ့ဗျာ…။ကောင်းကွက်ဆိုလို့တစ်စက်မှမရှိတဲ့ လူတွေချည်းပါပဲ”
လို့မဲ့မဲ့ရွဲ့ရွဲ့နဲ့ပြောပြတယ်။
ဒီတော့
“အင်း…ဒီမြို့ကလူတွေလည်းအဲဒီအတိုင်းပါပဲ”လို့ပြန်ဖြေလိုက်တယ်။
နောက်များမကြာခင်မှာ အခြားခရီးသွားတစ်ယောက် ရောက်လာပြန်ပါတယ်။
ဆိုကရေးတီးနဲ့စကားပြောရင်းက မေးခွန်းတစ်ခုမေးပြန်ပါတယ်။
“ဒီမြို့ကလူတွေ ဘယ်လိုစိတ်နေသဘောထားမျိုးရှိကြပါသလဲ ခင်ဗျာ.?”တဲ့။
ဆိုကရေးတီးက
“ခင်ဗျား…ထွက်လာခဲ့တဲ့မြို့ကလူတွေကရော ဘယ်လိုစိတ်နေသဘောထားမျိုးရှိကြသလဲ?”ပေါ့။
ဒုတိယခရီးသွားဧည့်သည်က
“ကျနော်တို့မြို့ကလူတွေလား?
အဲဒီလူတွေက အင်မတန်ကို စိတ်သဘောထားတွေ ကောင်းကြပါတယ်။
ပြီးတော့ ရိုးသားကြတယ်။ အလုပ်ကို ကြိုးစားကြတယ်။
တစ်ဦးကိုတစ်ဦးလည်း ကူညီရိုင်းပင်းကြတယ်။
အလှုအတန်းတွေလည်းရက်ရောကြပါတယ်ဗျာ။
အင်မတန်ကိုနေချင်စရာကောင်းတဲ့မြို့လေးပါ။
အဲဒီမြို့ကထွက်လာရတဲ့အတွက် စိတ်မကောင်းဖြစ်မိပါတယ်ဗျာ…” အားရပါးရပြန်ဖြေပါတယ်။
ဆိုကရေးတီးက
“အခုဒီမြို့မှာလည်း ခင်ဗျာပြောတဲ့လူမျိုးတွေကိုပဲ ထပ်တွေ့ရဦးမှာပါ။”လို့ပြန်ပြောလိုက်ပါတယ်။
တွေးကြည့်ရအောင်လားခင်ဗျာ…
တူညီတဲ့နေရာတစ်ခုမှာ တူညီတဲ့မေးခွန်းတစ်ခုကိုပဲ
အဖြေကနှစ်မျိုးထွက်နေတယ်။
ဘယ်လိုပါလိမ့်လို့ဇဝေဇဝါဖြစ်ခဲ့ဖူးပါတယ်။
အရက်ကိုကြိုက်တတ်သူဟာ အရက်ဆိုင်ကိုသွားမှာပဲ။
ဒီတော့ အရက်သမားတွေနဲ့တွေ့မှာပဲ။
ဘောလုံးပွဲကြိုက်တတ်သူက ဘောလုံးဝါသနာပါသူတွေနဲ့ဆုံကြမှာပဲ။
တရားကိုနှစ်သက်သူက ဘုရားကိုသွားပြီးတရားနှစ်သက်သူတွေနဲ့ဆုံကြမှာပါပဲ။
ဒီသဘောအတိုင်းပါပဲ။
ကိုယ့်စိတ်နေသဘောထားနဲ့တူညီတဲ့လူတွေနဲ့တွေ့ဆုံနေကြမှာပါပဲ။
စိတ်နေသဘောထားမတူတဲ့သူတွေဟာ ရိုးသားတဲ့စိတ်အခြေခံနဲ့ဆိုရင် ပေါင်းသင်းလို့မရပါဘူး။
ဘယ်နေရာသွားသွား၊ဘယ်နိုင်ငံရောက်ရောက်၊
ဘယ်သူတွေနဲ့တွေ့တွေ့၊
အစဉ်ပြေတာလဲ ကိုယ့်စိတ်ပဲ။ အစဉ်မပြေတာလဲ ကိုယ့်စိတ်ပါပဲ။
ကိုယ့်စိတ်ထဲမှာ အမုန်းတွေ၊အငြိုးအတေးတွေ၊
ဒေါသစိတ်တွေနဲ့အာဃာတတွေရှိနေမယ်ဆိုရင်တော့
ဘယ်နိုင်ငံရောက်ရောက်၊ပျောက်သွားမှာမဟုတ်ပါဘူး။
တွေ့တဲ့သူတွေကလည်း အဲဒီလိုစိတ်နေသဘောထားတွေရှိတဲ့သူတွေပဲဖြစ်နေမှာပါ။
ဒီလိုဆို ဘယ်မှာစိတ်ချမ်းသာတော့မလဲ။
စိတ်ချမ်းသာမှုကို တန်းဖိုးထားမယ်ဆိုရင်တော့ အကောင်းမြင်စိတ်ကိုမွေးမြူ
ရတော့မယ်ဆိုတာကို တဖြည်းဖြည်းသဘောပေါက်လာမိပါတယ်။
No comments:
Post a Comment