တစ်ခါတုန်းက ရွာတစ်ရွာမှာ ချမ်းသာတဲ့ သူဋ္ဌေးကြီးတစ်ယောက်ရှိပါတယ်။
တစ်နေ့တော့ သူဋ္ဌေးကြီးကတန်ဖိုးကြီးတဲ့ ပြိုင်မြင်းတစ်ကောင် ဝယ်လာတယ်။
မကြာခင်မှာပဲ အဲဒီမြင်းဟာပျောက်သွားပါလေရော။
သူဋ္ဌေးကြီးဟာစိတ်ညစ်ညစ်နဲ့ ရွာဦးဘုန်းတော်ကြီးကျောင်းကို သွားပြီး
ဆရာတော်ကို စိတ်ညစ်ရတဲ့အကြောင်းကို ပြောပြတယ်။
ဆရာတော်ကြီးက “စိတ်မညစ်ပါနဲ့တကာကြီး၊ အဲဒါကောင်းဖို့ဖြစ်လာတာပါ” လို့ပြောလိုက်တယ်။
သူဋ္ဌေးကြီးက နားမလည်ဘူး၊
နောက်တစ်ပတ်မှာတော့ မြင်းကိုရှာတွေ့တယ်။
အဲဒီမြင်းနဲ့အတူ မြင်းမတစ်ကောင်ပါ အပိုပါတဲ့အတွက်သူဋ္ဌေးကြီးကပျော်နေတယ်။
ဆရာတော်ပြောတာ မှန်လိုက်တာလို့တွေးမိတယ်။
နောက်(၆)လမှာတော့ တစ်ဦးတည်းသောသားဟာ အဲဒီမြင်းကို စီးရင်းနဲ့
မြင်းပေါ်ကလိမ့်ကျပြီး ခြေထောက်ရော၊လက်ရောကျိုးသွားပါတယ်။ သူဋ္ဌေးကြီးကစိတ်ညစ်ညစ်နဲ့ဆရာတော်ကြီးဆီရောက်သွားပြန်တယ်။
ဆရာတော်ကြီးက“စိတ်မညစ်ပါနဲ့တကာကြီး၊ အဲဒါဟာလည်း ကောင်းဖို့ဖြစ်လာတာပါ”လို့
ထပ်ပြောပြန်တော့သူဋ္ဌေးကြီးက နားမလည်ပြန်ဘူး၊
ဒုက္ခိတဖြစ်သွားတဲ့သားနဲ့ပက်သက်ပြီး ဘယ်လိုလုပ်ပြီးကောင်းဖို့ဖြစ်နိုင်မှာလဲ?
စိတ်ရှုတ်ရှုတ်နဲ့ပြန်လာတယ်။
နောက်မကြာခင်မှာပဲ ပြည်တွင်းစစ်တွေဖြစ်လာပါတော့တယ်။
စစ်ဖြစ်ပြီးဆိုတော့ အဲဒီရွာမှာရှိတဲ့ အရွယ်ရောက်
လူငယ်တွေအားလုံးဟာ စစ်ထဲပါသွားပြီး တစ်ယောက်မှရွာကို ပြန်မရောက်ကြတော့ပါဘူး။
သူဋ္ဌေးကြီးရဲ့သားကတော့ဒုက္ခတဖြစ်နေတာကြောင့်
စစ်သားစုဆောင်းသူတွေက မခေါ်ဘဲ ချန်ထားခဲ့တယ်။
ဒီတော့မှ ဆရာတော်ကြီးပြောတဲ့ “အရာရာဟာကောင်းဖို့ဖြစ်လာတယ်”ဆိုတာကို သဘောပေါက်လာပါတော့တယ်။
ကျနော်တို့ ရှေ့ကိုကြိုမမြင်နိုင်တာတွေက အများကြီးပါပဲ။
လတ်တလော ဖြစ်ရပ်ကို ပဲ စိတ်နှစ်ပြီး ခံစားတော့ စိတ်ညစ်စရာဆိုမပြေပျောက်တော့ဘူး။
မမြဲတဲ့လောကကြီးကိုလည်း အရာရာဟာမြဲနေသလို ထင်လာမိတတ်တယ်။
သေသေချာချာပြန်စဉ်းစားကြည့်ပါ။
မြဲတာဘာရှိသလဲ?
အသက်လည်း မမြဲဘူး။
ဥစ္စာလည်း မမြဲဘူး။
အာဏာလည်း မမြဲဘူး။
ပြီးတော့......................မမြဲဘူး။ပြီးတော့.......................မမြဲဘူး။
ပြီးတော့.......................မမြဲဘူး။
အဓိကအရေးကြီးဆုံးကတော့ ဘာဘဲဖြစ်ဖြစ်၊စိတ်မညစ်ဖို့ပါပဲ။
ပြီးတော့ လုပ်သင့်လုပ်ထိုက်တာကို အရှိန်အဟုန်မပျက်၊ဆက်လုပ်နေဖို့ပါပဲ။
အရာရာဟာ ကောင်းဖို့ဖြစ်လာတာပါ။
No comments:
Post a Comment