" အမေ့ထံသို့ပေးစာများ-၂၈..."

သို့

ချစ်တဲ့အမေ

သားသတိတရစာရေးလိုက်ပါတယ်။

ဒီအချိန်ဟာ အမေရိကန်နိုင်ငံရဲ့ဆောင်းတွင်းကာလပါပဲ။

တော်တော်အေးတယ်အမေ။

တာချီလိတ်ထက်ပိုအေးပါတယ်။ ဖါးကန့်ထက်လည်းပိုအေးပါတယ်။

ရေခဲလောက်အောင်တော့ မအေးပေမယ့် အအေးဒဏ်ကြောင့်

သစ်ပင်တိုင်းဟာ အရိုးပြိုင်းပြိုင်းဖြစ်နေကြပြီ။

ဆောင်းဝင်စကာလတုန်းက သစ်ရွက်တွေဟာဝါလာတယ်။ပြီးတော့နီလာတယ်။

ပြိုင်တူဝါ၊ပြိုင်တူနီတော့ ပတ်ဝန်ကျင်တစ်ခုလုံး ဝါ၊နီပြိုင်နေကြတော့

လှလိုက်တာလို့ထင်ခဲ့မိတယ်။အခုတော့ အဲဒီအရွက်တွေအားလုံးကြွေကုန်ကြပြီ။

မလှပနိုင်ကြတော့ဘူး။အပင်တိုင်းဟာ ရိုးတံတွေသာကျန်တော့တယ်။

အခြားပြည်နယ်တွေမှာတော့ ရေတွေခဲလောက်အောင်ကို အေးတယ်လို့ပြောသံကြားမိပါတယ်။

ဒီကယ်လီဖိုးနီးယားကတော့ သမုဒ္ဒရာနဲ့နီးလို့ထင်ပါရဲ့။

ဒီအမေရိကန်နိုင်ငံမှာတော့ ရာသီဥတုအမျှတဆုံးနေရာတစ်ခုလို့ပြောကြပါတယ်။

မြန်မာနိုင်ငံကလာသူအဖို့တော့ အအေးဆုံးနေရာတစ်ခုလို့ပြောရမယ်ထင်တယ်။

တာချီလိတ်ကဝယ်လာတဲ့အနွေးထည်တွေနဲ့မလုံလောက်လို့အနွေးထည်ထူထူထပ်ဝယ်ရတယ်။

ဒါတောင်အပြင်ထွက်ရင် တုန်နေအောင်ကိုချမ်းလှပါတယ်။

အစဉ်ပြေတဲ့အချက်တစ်ခုကတော့ အိမ်မှာ Heaterလို့ခေါ်တဲ့အနွေးပေးစက်ရှိနေတာပဲ။

အိမ်ရောက်ရင်တော့ အနွေးပေးစက်ဖွင့်မှ နေနိုင်တယ်။

အကြောင်းမရှိရင် အပြင်မထွက်တော့ပါဘူး။

အခုတော့ အမေရိကန်မှာနေတဲ့လူတွေ အိမ်ပြန်ရောက်ရင်

အပြင်လုံးဝမထွက်ပဲ အိမ်ထဲမှာပဲနေကြတာကို သဘောပေါက်စပြုလာပါပြီ။

ဘာဘဲပြောပြော ရာသီဥတု ညီမျှတဲ့မြန်မာနိုင်ငံကို ပိုလွမ်းလာမိတယ်။

သူများနိုင်ငံရောက်တော့မှ ကိုယ့်နိုင်ငံဟာ ဘယ်လောက်လှပတယ်။

ဘယ်လောက်နေထိုင်လို့ကောင်းတယ် ဆိုတာကို ပိုပြီးသဘောပေါက်လာရပါတယ်။

အမေကိုရော၊ရွာကိုရော လွမ်းလှပါတယ်။

ကျနော့်အလုပ်ကတော့ ကျနော်နေတဲ့နေရာနဲ့မိုင် ငါးဆယ်လောက်ဝေးတဲ့နေရာမှာရှိတယ်။

ဆန်ဖရန်စစ္စကိုလေဆိပ်နဲ့အနီးဆုံးမြို့နယ်မှာအလုပ်လုပ်ရတယ်။

အလုပ်ကတော့ အိမ်မှာလိုက်ပြီးလူနာကိုစောင့်ရှောက်ရတဲ့အလုပ်ပါ။

ကျနော့်ရဲ့လူနာက အသက်(၈၃-နှစ်)ရှိတဲ့မြန်မာ-တရုပ်အဖိုးကြီးတစ်ယောက်ပါ။

ရောဂါကတော့ အင်ဇိုင်းမားလို့ခေါ်တဲ့သက်ကြီးသတိမေ့တဲ့ရောဂါပါ။

ဆေးရုံမတက်ခင်တုန်းကတော့ သွားသွားလာလာရှိသေးတယ်။

ဆေးရုံကဆင်းလာပြီးတဲ့နောက်မှာတော့ လှုပ်ကိုမလှုပ်တော့ဘူး။

လှုပ်တာဆိုလို့ ပါးစပ်တစ်ခုပဲရှိတော့တယ်။

ပါးစပ်ကတော့ တစ်ရံတစ်ခါမှာ တစ်ခုခုကိုပြောနေတယ်။

ရှေ့စကား၊နောက်စကားတွေလည်း အဆက်အစပ်မရှိတော့ပါဘူး။

ဘာပြောသလဲဆိုတာကို သိချင်လို့မေးရင်လည်း ပြန်မဖြေနိုင်တော့ဘူး။

သားသမီးဆယ့်နှစ်ယောက်ရှိတယ်။ အဲဒီသားသမီးတွေကိုမမှတ်မိတော့ဘူး။

သူ့ဇနီးသည်ကိုတောင် မမှတ်မိတော့ဘူး။

မလှုပ်ရှားနိုင်တော့ Bedsoreလို့ခေါ်တဲ့အနာတွေဖြစ်မှာစိုးလို့

နှစ်နာရီကိုတစ်ကြိမ်လောက်ကိုယ်နေဟန်ထားကိုပြောင်းပေးရတယ်။

ဒါတောင် ကျနော်မရောက်ခင်တုန်းက

မြီးညှောင့်ရိုးနားတစ်ဝိုက်မှာအနာတွေဖြစ်သွားလို့ဆေးထည့်ပေးနေရတယ်။

လက်တွေကတော့ အမြဲတမ်းတုန်နေတယ်။

လက်နဲ့ကိုင်မိတဲ့အရာတွေကိုလည်း ပါးစပ်ထဲထည့်တယ်။ကိုက်တယ်။

အဲဒါကိုလည်း သတိထားနေရတယ်။

သတိကတော့ အတော်လေးလွတ်နေပါပြီ။

အသိကလည်းမရှိသလောက်ပါပဲ။

အသက်အရွယ်ကြီးလာတော့ ကလေးငယ်တစ်ယောက်လိုပြန်ဖြစ်လာတယ်။

ပါးစပ်ကအစားအစာကိုမစားနိုင်တော့ဘူး။

အစားခွန့်ရင်ငုံထားတာများတယ်။ မျိုချရကောင်းမှန်းတောင်မသိတော့ဘူး။

အငုံကောင်းလို့ သီးသွားပြီးအသက်ရှုလမ်းကြောင်းထဲအစာဝင်သွားလို့

အဆုပ်အအေးပတ်ပြီးဆေးရုံတင်လိုက်ရတယ်။

ဆေးရုံမှာတော့ အစာကိုပိုက်နဲ့သွင်းပေးတယ်။

ကျနော်တို့လက်ထက်တုန်းကတော့ နှာခေါင်းပိုက်နဲ့အစာအိမ်ထဲကိုတိုက်ရိုက်သွင်းပေးတဲ့စံနစ်

ကိုအသုံးပြုတယ်။အခုဒီမှာကတော့ အဲဒီလိုမျိုးမဟုတ်တော့ဘူး။

ချက်ရဲ့အပေါ်၊အစာအိမ်ရဲ့အောက်တည့်တည့်လောက်မှာ ဗိုက်ကိုဖေါက်လိုက်တယ်။

အစာပြွန်ကိုအစာအိမ်ထဲတိုက်ရိုက်ထည့်တဲ့နည်းစံနစ်ကိုအသုံးပြုတာကိုတွေ့ရတယ်။

ဒီနည်းစံနစ်ကတော့ အခုလိုသတိမကောင်းတော့တဲ့လူနာအတွက်ပိုကောင်းတယ်။

နှာခေါင်းပိုက်ကျတော့ အနေခက်စေတယ်။

လူနာက သတိမကောင်းတော့ ခဏခဏဆွဲထုတ်လို့ပြန်ပြန်ပြီးတပ်ပေးရတာက

အလုပ်ပိုတစ်ခုလိုဖြစ်နေတယ်။

အခုတော့ ဗိုက်ကတိုက်ရိုက်ဖောက်ထည့်တဲ့နည်းစနစ်ကတော့

လူနာအတွက် သက်တောင့်သက်သာဖြစ်စေတယ်။

အကျိုးသက်ရောက်မှုပိုကောင်းသလို လူနာက သတိလွတ်ပြီးဆွဲထုတ်လိုက်မိရင်

အန္တရာယ်လည်းပိုကြီးတာပေါ့။အခန့်မသင့်ရင် သေတဲ့အထိဖြစ်နိုင်တယ်။

အကောင်းအဆိုးကတော့ ဒွန်တွဲနေတာပါပဲ။

အဲဒီပိုက်ကနေပြီး နှစ်နာရီတစ်ကြိမ်လောက်အရည်ဖြစ်တဲ့အစာတွေကိုထည့်ပေးရတယ်။

ဆေးရုံကညွှန်းကြားထားတဲ့အစားအစာဆိုတော့ အာဟာရတန်ဖိုးမြင့်တယ်။

အလုပ်ရှုတ်သက်သာတယ်။

သောက်ရမယ့်ဆေးကိုတော့ နံနက်ပိုင်းမှာ တစ်ကြိမ်ပဲတိုက်တယ်။

ဆေးလုံးတွေဆိုတော့ အားလုံးကိုရောကြိတ်လိုက်တယ်။

ပြီးတော့ရေနဲ့ဖျော်လိုက်တယ်။

နောက် အစာအိမ်ပိုက်နဲ့ပဲ ထည့်လိုက်တယ်။

နှစ်ပေါင်းများစွာ လုပ်လာခဲ့တဲ့အလုပ်ဆိုတော့ မပင်ပန်းလှပါဘူး။

နည်းစံနစ်အသစ်တွေကလည်း မခက်လှပါဘူး။ မြင်တာနဲ့သိသွားတာပါပဲ။

ကားတစ်စီးကိုကောင်းကောင်းမောင်းတတ်ရင်

ကားတိုင်းကိုမောင်းတတ်တဲ့သဘောပါပဲ။

ကားတစ်စီးနဲ့တစ်စီးကတော့ နည်းပညာနည်းနည်းချင်းစီကွာနိုင်ပေမယ့်

အခြေခံသဘောတရားကတော့ အတူတူပါပဲ။

ဆေးပညာကလည်း ဒီလိုပါပဲ။

လူ့ရဲ့ခန္ဓာကိုယ်ဖွဲ့စည်းပုံကအတူတူပဲလေ။

လူမျိုးမတူလို့ဖွဲ့စည်းပုံပြောင်းလဲသွားတာမှ မဟုတ်တာ။

အခြေခံသဘောတရားကတော့အတူတူပါပဲ။

ခက်လှတာတော့မဟုတ်ပါဘူး။

ဒါပေမယ့် ဒီနိုင်ငံရဲ့သတ်မှတ်ချက်ကိုက Certificate လက်မှတ်ကို အဓိကထားလွန်းလှတယ်။

အဲဒီ Certificate လက်မှတ်ကိုလည်း ဒေါ်လာအများကြီးနဲ့ဝယ်ရမယ်ဆိုတော့

ငွေကြေးမတတ်နိုင်သူအဖို့ရှေ့တိုးရခက်ခဲလှတယ်။

ဒီအမေရိကန်နိုင်ငံဟာလည်းကောင်းတာတွေအများကြီးရှိသလို

မကောင်းတာတွေလည်းအများကြီးရှိနေပါတယ်။

ဒါကလည်း သဘာဝပါပဲ။

လူဘုံလောကမှာ အားလုံးကောင်းတဲ့နိုင်ငံ၊ အားလုံးကောင်းတဲ့လူမျိုး မရှိပါဘူး။

အားလုံးဟာ အကောင်း၊အဆိုးဒွန်တွဲနေကြစမြဲပါ။

အကောင်းတွေများတဲ့နိုင်ငံနဲ့အဆိုးတွေများတဲ့နိုင်ငံတော့ကွာခြားနိုင်ပါတယ်။

ဒီနိုင်ငံနဲ့ပတ်သက်ပြီး

အဆိုးတွေကိုပြောပြီးအချိန်မကုန်ချင်လို့သာ အကောင်းတွေရွေးပြောနေတာပါ။

(အဆိုးတွေကို သတင်းစာကပြောပါလိမ့်မယ်)

အကောင်းတွေထဲကလည်း ကိုယ့်နိုင်ငံ၊ကိုယ့်လူမျိုးအတွက်

အားကျ၊အတုယူနိုင်တဲ့အကောင်းတွေသာရွေးပြောဖြစ်တာပါ။

အမေရိကန်နိုင်ငံရောက်လို့ ဒီနိုင်ငံကိုအထင်ကြီးသွားတာမျိုးမဖြစ်သလို

ကိုယ့်နိုင်ငံကိုလည်း အထင်သေးသွားတာမျိုးမဖြစ်ပါဘူး။

ကိုယ့်နိုင်ငံကိုချစ်တဲ့စိတ်ဟာလည်းနည်းနည်းလေးမှ

လျော့ပါးမသွားပါဘူးလို့သေသေချာချာပြောနိုင်ပါတယ်။

အခုကျနော့်လူနာကိုပဲကြည့်။

နိုင်ငံသားဖြစ်နေတဲ့အတွက် အစိုးရက ဆေးကုသစရိတ်ကိုထောက်ပံ့တယ်။

ကောင်းကောင်းမွန်မွန်အိုရတယ်။

သက်သက်သာသာနာရတယ်။

ဒါပေမယ့် မအိုအောင်၊မနာအောင်တော့ ဘယ်အစိုးရမှ မတတ်နိုင်ပါဘူး။

ဘယ်သူမှ မတတ်နိုင်ပါဘူး။

အိုခြင်း၊နာခြင်းနဲ့သေခြင်းကတော့ လွန်ဆန်နိုင်တဲ့တရားမှမဟုတ်တာ။

ဒါတောင် အမေရိကန်ရောက်ပြီးအနေကြာတဲ့အဖွားအိုတစ်ဦးက

"ဒီမှာ အိုရ၊နာရတာ သိပ်ကောင်းတာပဲ၊အားလုံးကို အစိုးရကတာဝန်ယူထားတယ်" လို့

ပြောတော့ အမြင်ကပ်ကပ်နဲ့ပြောလိုက်မိသေးတယ်။

"အစိုးရကပိုက်ဆံပဲထောက်ပံ့တာပါ။ ဝေဒနာကို လာပြီးခံပေးတာမှ မဟုတ်တာ၊

ကိုယ်ဘာသာကိုယ်ခံစားရတာကရော ကောင်းလား" လို့ပြန်မေးတော့

အဖွားကြီးက ကျနော့်ကိုမျက်စောင်းထိုးတယ်။

ကျနော်လည်း မဟုတ်တာပြောတတ်သူတွေကို ပြန်မေးခွန်းထုတ်တတ်တဲ့အကျင့်

ကိုပြင်ရအုန်းမယ်။ ကျနော်အတွေးက လူကြီးတွေဆိုတာ လူငယ်တွေအတွက်

မှန်တာ၊ဟုတ်တာတွေပဲပြောစေချင်တာပါ။

တလွဲမာနတွေ၊အပိုကြွားဝါတာတွေမလုပ်စေချင်တော့မေးခွန်းထုတ်မိတာပေါ့။

ကံကောင်းတာက ကျနော်အခုထိ ရွာပြင်ထွက်မနေရသေးတာပါပဲ။

ကျနော်ဟာ ဆိုဆုံးမ,လွယ်ကူသူဖြစ်အောင် ကြိုးစားနေပါတယ်။

ဘယ်သူမဆို ဆိုဆုံးမ,လွယ်ကူသူဖြစ်အောင် ကြိုးစားသင့်တယ်လို့

အမေကပြောခဲ့တာကိုလည်း မမေ့ပါဘူး။

ကဲ...ကျနော်နားလိုက်ဦးမယ်။

အမေကျန်းမာရေးကို ဂရုစိုက်ပါနော်။

ကျနော်တို့မိသားစုနေကောင်းကြပါတယ်။

အမေ့ကိုချစ်တဲ့သား

အောင်ဝင်းဟိန်း

ဆန်ဟိုဆေး(San Jose)

ကယ်လီဖိုးနီးယား(California)

အမေရိကန်ပြည်ထောင်စု(USA)

၁-၂၅-၂၀၁၂