“ နေရာကောင်း…”

ကိုအေးရွှေ သစ်ပင်ပေါ် တွယ်တက်တယ်။

ဖြတ်သွားသူတစ်ယောက်က မေးတယ်။

“ ဟေ့လူ၊ ဘာတက်လုပ်မှာလဲ ”

“ သရက်သီးစားမလို့ ”

“ ခင်ဗျား ရူးနေသလား၊

ဒါ မန်ကျည်းပင်ပဲ ဥစ္စာ ”

“ ကျနော်အိတ်ထောင်ထဲမှာ

သရက်သီးတွေပါတယ်ဗျ ”

“ ကြောက်တတ်ရင် ရှေ့တိုး…”

ဒီရေတက်တော့မယ်ဆိုရင်

တံငါလှေတွေဟာ ကမ်းနဲ့ဝေးရာ

ပင်လယ်အတွင်းပိုင်းကို

ရောက်နိုင်သမျှရောက်အောင်

တိုးဝင်ရတယ်။

နောက်ဆုတ်ဖို့တော့ မကြိုးစားနဲ့။

ကမ်းဖက်ကို ဦးလှည့်လို့ကမ်းပေါ်မရောက်ခင်

ဒီလှိုင်းက မီလာလို့ကတော့

ကမ်းနဲ့လှိုင်းကြားမှာ တစ်စစီဖြစ်သွားမယ်။

သာသနာတော်မှာလည်း

ကိုယ်စွမ်းနိုင်သမျှ

ဒါန၊ သီလ၊ ဘာဝနာတို့ကို

အားထုတ်တဲ့နေရာမှာ

ဆင်းရဲတစ်ခုခုကြုံလာလို့

ဒီဆင်းရဲကို ကြောက်တယ်ဆိုရင်

နောက်မဆုတ်လိုက်နဲ့။

ရှေ့တိုးနိုင်သမျှတိုးကျင့်ရမယ်။

( ဒေးဒရဲ ကွင်းကျောင်းဆရာတော် )

“ အလေးချိန်အမှန်…”

ကြောင်တွေကို မုန်းတီးတဲ့ လူတစ်ဦးရှိတယ်။

အဲဒီလူဟာ

သူ့ဇနီးချစ်စနိုးမွေးထားတဲ့ ကြောင်ဝကြီးကို အမုန်းဆုံးဖြစ်တယ်။

တစ်နေ့မှာတော့ ညစာအတွက် အသားတွေ ဝယ်လာပါသည်။

ဝယ်လာတဲ့ အသားတွေကို မီးဖိုထဲရှိ စားပွဲတွင် တင်ထားလိုက်ပါတယ်။

နောက်ပိုင်းမှာ သူဝယ်လာတဲ့ အသားတွေ အားလုံး ပျောက်ဆုံးသွားပါတယ်။

“ အဲဒါ ဒီကြောင်စုတ်ကြောင့်ပေါ့ ”

လို့ ခင်ပွန်းဖြစ်သူက စိတ်ဆိုးဆိုးနဲ့ အော်ပြောပါတယ်။

ဇနီးက

“ မဟုတ်နိုင်ပါဘူးရှင်၊

ဒီကြောင်က သုံးပေါင်လောက်ရှိတဲ့ အသားတွေ

အားလုံးကို မစားနိုင်ပါဘူး ”

လို့သူမရဲ့ကြောင်ကို ကာကွယ်ပြောဆိုပါတယ်။

ခင်ပွန်းဖြစ်သူက

“ အေး…စားနိုင်သလား၊ မစားနိုင်ဘူးလားဆိုတာ

သက်သေပြမယ်၊

ကဲ…ချိန်ခွင်ယူခဲ့၊

အခုချိန်ကြည့်မယ် ”

လို့ ဒေါသနဲ့ သူရဲ့ဇနီးကို ချိန်ခွင်ယူခိုင်းလိုက်ပါတယ်။

ချိန်ကြည့်လိုက်တဲ့အခါမှာတော့ ကံမကောင်း၊အကြောင်းမလှတဲ့

ကြောင်ဝကြီးမှာ သုံးပေါင်တိတိဖြစ်နေတာကို တွေ့ရပါတယ်။

ခင်ပွန်းဖြစ်သူက

“ အဲဒါကြောင့် ပြောတာပေါ့၊

အဲဒါ ငါဝယ်ခဲ့တဲ့အသားတွေရဲ့ အလေးချိန် အတိအကျပဲ ”

လို့ ခင်ပွန်းက သူထင်မြင်ချက်မှန်ကန်ကြောင်း

လက်တွေ့တွေ့နေရတဲ့အတွက်

အားရဝမ်းသာ ပြောလိုက်ပါတယ်။

အဲဒီအခါ ဇနီးသည်က လေအေးလေးနဲ့

“ အဲဒါ အားလုံး ရှင်ဝယ်လာတဲ့အသားဆိုရင်

ကြောင်က ဘယ်ရောက်သွားသလဲ၊

ကြောင်ရဲ့အလေးချိန်က ဘယ်ရောက်သွားသလဲ ”

လို့ ပြန်မေးလိုက်ပါတော့တယ်။

အမုန်းဓာတ်ခံရှိရင် အမှန်ကို မြင်နိုင်ဖို့ခက်ခဲတတ်ပါတယ်။

မုန်းတဲ့အရာကိုပဲ ပျက်စီးစေချင်တာ ဓမ္မတာပါပဲ။

အမုန်းဟာ အမြင်ကို ဆိုးစေပြီး၊

အဆိုးကို မြင်စေပါတယ်။

ဒါကြောင့်

မေတ္တာစိတ်မွေးပြီး

အကောင်းမြင်ကြည့်လိုက်ပါလား ။

အရာရာဟာ လှပလာပါလိမ့်မယ်။

“ အကောင်းဆုံး ပျံသန်းနိုင်သူ…”

ကျနော် အခန်းထဲထိုင်နေတုန်းက

ယင်ကောင်တစ်ကောင်ဝင်လာပါတယ်။

တဝီဝီအသံကိုလည်း ပေးလာပါတယ်။

တမဟုတ်ချင်း ထပျံတတ်သလို နေရာမရွေးနားနိုင်ပါတယ်။

အချိန်မရွေး နားနိုင်၊ ပျံသန်းနိုင်ပါတယ်။

ပျံသန်းနေရာက အောက်ကို စိုက်ဆင်းလာပြီး

စားကြွင်းစားကျန်များကို လာနားတတ်ပါတယ်။

သူ့ကြည့်ရတာ ကြိုက်တဲ့အရာကို အချိန်မရွေး လုပ်နိုင်ပါတယ်။

အိမ်များမှာ တွေ့ရတဲ့ ယင်ကောင်တစ်ကောင်ဟာ အံ့မခန်းစွမ်းပါတယ်။

ကမ္ဘာပေါ်ရှိ လေယာဉ်အားလုံးထက် ပျံသန်းနိုင်မှု စွမ်းရည်တွင်

ယင်ကောင်က သာပါတယ်။

ပျံတက်ဖို့အတွက် ပြေးလမ်းမလိုပါ။

ဟယ်လီကော်ပတာတစ်စင်းလို နေရာက ထပျံနိုင်ပါတယ်။

ဘယ်တော့မှ ဝင်တိုက်ခြင်းမရှိပါ။

ပျက်ကျတာမျိုးလည်း မရှိပါ။

မမျှော်လင့်တဲ့ ချွတ်ယွင်းမှုကြောင့် ပျံသန်းရင်း

ပျက်ကျတာမျိုးလည်း မရှိပါ။

သူရဲ့ ပိုင်းလော့ဟာ အမောင်းသင်ရခြင်း၊

ပျံသန်းတတ်ဖို့ သင်ပေးရခြင်း မရှိပါ။

ဘယ်သင်တန်း ဘယ်စစ်ဆေးမှု မှ အောင်မြင်စရာမလိုပါ။

စက်ပျက်ခြင်းလည်းမရှိ။

လောင်စာဆီကုန်သွားခြင်းမျိုးလည်း မရှိပါ။

ကဲ…လူကြီးမင်ခင်ဗျား၊

ပတ်ဝန်ကျင်မှာ တွေ့နေကျ သတ္တဝါတစ်ကောင်ရဲ့

စွမ်းဆောင်နိုင်စွမ်းရည်တွေကို

သေသေချာချာ လေ့လာကြည့်ဖူးပါသလား…?

သေသေချာချာ လေ့လာကြည့်ရင်

အရာရာဟာ စိတ်ဝင်စားစရာတွေနဲ့ပြည့်နေတာကို

သိလာပါလိမ့်မယ်။