တစ်ခါတုန်းက လိပ်မကြီးတစ်ကောင်ရှိလေရဲ့။
အဲဒီလိပ်မကြီးဟာ ဥတွေဥချင်လာတယ်။
အဲဒီတော့ သူပေါက်ပွားခဲ့ရာ 'ဘားမား'ဆိုတဲ့ကျွန်းလေးကို သတိရလာပါတယ်။
အဲဒီကျွန်းဟာ အခုလောလောဆယ်သူရောက်နေတဲ့နေရာဆိုရင် အရမ်းဝေးပါတယ်။
ဒါပေမယ့် အဲဒီကျွန်းကိုရောက်အောင်ကြိုးစားပြီးကူးခတ်ပြီးသွားခဲ့ပါတယ်။
အဲဒီကျွန်းပေါ်ရောက်တော့ သဲသောင်ပြင်ပေါ်ကို ယက်ပြီး တစ်ရွေ့ရွေ့တက်လာခဲ့ပါတယ်။
လိပ်မကြီးက ယက်ရင်း၊တက်ရင်းနဲ့စဉ်းစားလာပါတယ်။
လူတွေက ပြောကြတယ်။
လိပ်လိုပဲ ကိုယ့်ဖက်ကိုယ့်ယက်တတ်သတဲ့။
ကောင်းတဲ့စကားပုံတော့ ဟုတ်ဟန်မတူပါဘူး။
အတ္တကြီးတယ်ဆိုတဲ့သဘောကို ကိုယ်စားပြုထားတာလို့ထင်မိပါတယ်။
မသိလို့မေးလိုက်ချင်ပါတယ်။
လူတွေကရော ကိုယ့်ဖက်ကိုယ်မယက်တတ်ကြဘူးလား။
အတ္တမကြီးဘူးလားလို့မေးလိုက်ချင်မိပါတယ်။
ဒါနဲ့ပဲ'ဘားမား'ဆိုတဲ့ကျွန်းပေါ်ရောက်လာပြီး
ဥတွေဥလို့ကောင်းတဲ့နေရာတစ်ခုကို လိုက်ရှာရသေးတယ်။
စိတ်ချလုံခြုံတဲ့နေရာပေါ့။
အဲဒီနေရာရောက်အောင် မနဲရှာရပါတယ်။
ရှာလို့တွေ့ပြီးဆိုတာနဲ့ညအမှောင်ကို အောင့်အည်းစောင့်ရသေးတယ်။
လူတွေနဲ့အခြားလိပ်ဥကိုစားတတ်တဲ့ သတ္တဝါတွေကို မမြင်ရအောင်လေ။
စိတ်ချတဲ့အခါမှ လိပ်ဥတွေအမြောက်အများကို ဥကျင်းထဲမှာ ဥချလိုက်ပါတယ်။
လိပ်ဥတွေကို စောင့်ရှောက်ချင်ပေမယ့် အနားမှာမနေရဲပါဘူး။
လိပ်မကိုတွေ့ရင် လိပ်ဥရှိမှာပဲလို့အသေအချာတွက်ပြီး ဥကိုလိုက်ရှာမှအခက်။
ဒါနဲ့ပဲ လိပ်မကြီးဟာ လိပ်ဥကိုထားခဲ့ပြီး၊
ရေကြည်ရာ မြက်နုရာကိုထွက်ခဲ့ရပြန်ပါတယ်။
တဖြည်းဖြည်းနဲ့လိပ်ဥတွေနဲ့ဝေးသထက်ဝေးလာခဲ့ပါတယ်။
ဒါပေမယ့် အစာရှာစားချိန်ကလွဲရင်
ကျန်တဲ့အချိန်တိုင်းမှာ လိပ်ဥတွေကို မေတ္တာပို့နေမိပါတယ်။
လိပ်ဥတွေဆိုတာ ရင်ငွေ့နဲ့ဝေးပေမယ့် အမေ့မေတ္တာနဲ့မဝေးပါဘူး။
အချိန်တိုင်းလိုလို မေတ္တာပို့သနေတဲ့အတွက်ကြောင့်ပဲ
အချိန်တန်လာတော့ လိပ်ဥထဲက လိပ်ကလေးတွေဟာ ဥကပေါက်ပွားလာပါတယ်။
လိပ်ကလေးတွေကလည်း ဥခွံကိုဖောက်၊ သဲသောင်ကိုဖြတ်ပြီး
ပင်လယ်ထဲကိုဆင်းသွားကြပါတယ်။
လိပ်ကလေးတွေမြောက်များစွာဟာ ဒီလိုနဲ့နေရာအနှံ့အပြားကို ရောက်သွားကြပြန်ပါတယ်။
ဘယ်နေရာပဲရောက်ရောက်၊
ဥချိန်ရောက်လာရင် ပေါက်ပွားခဲ့ရာ ဘားမားဆိုတဲ့ကျွန်းကိုရောက်အောင်ပြန်လာပြီး
ဥတွေကို ထပ်မံဥပြန်ပါတယ်။
ဒီလိုနဲ့' ဘားမား 'ဟာ
နောက်တော့ လိပ်ကျွန်းဖြစ်လာပါတော့တယ်။
++++++++++++++++++
တိုင်းပြည်ကနေ ပညာရှင်တွေထွက်ခွာသွားတာကို အများက
( Brain Drain ) လို့ဆိုကြပါတယ်။
အဘိဓါန်ထဲရှာကြည့်တော့( brain drain )ကို
( နိုင်ငံအတွက် ပညာရှင် ဆုံးရှုံးမှု။ ဦးနှောက်ယိုစီးမှု။)
ဆိုတာတွေ့ရပါတယ်။
ပညာရှင်ဆိုတဲ့နေရာမှာ
အတတ်ပညာရှင်တွေပါသလို၊
အသိပညာရှင်တွေလည်းပါတယ်။
တိုင်းပြည်ကထွက်ခွာသွားစရာအကြောင်းကအမျိုးမျိုးပါပဲ။
ဘယ်လိုပဲထွက်ထွက် ပညာရှင်ဆုံးရှုံးမှုလို့
သိမ်းကြုံးပြောဆိုကြတယ်ဆိုရင်
မှားလိမ့်မယ်လို့ထင်မိပါတယ်။
နိုင်ငံတကာမှာ အတတ်ပညာတွေ၊
အသိပညာတွေကို ဆက်လက်သင်ကြားပြီး
တတ်လာတဲ့အသိပညာ၊အတတ်ပညာနဲ့
တိုင်းပြည်နဲ့လူမျိုးအတွက်
ပြန်လည်အကျိုးပြုနိုင်မယ်ဆိုရင်( Brain Drain) မဟုတ်တော့ပဲ
ဘရိမ်းကိန်း ( Brain Gain ) လည်းဖြစ်နိုင်တယ်ဆိုတာပါပဲ။
တိုင်းပြည်နဲ့လူမျိုးကို ကမ္ဘာ့အဆင့်အတန်းမီတဲ့နိုင်ငံတစ်ခုဖြစ်အောင်ဆိုရင်
နိုင်ငံတွင်းမှာရှိတဲ့ရတနာတွေနဲ့မလုံလောက်ပါဘူး။
နိုင်ငံပြင်ပက ပညာတွေနဲ့ပေါင်းစပ်မှ
နိုင်ငံတွင်းရတနာတွေဟာ ပိုမိုအဖိုးတန်တဲ့ရတနာတွေဖြစ်လာနိုင်ပါတယ်။
ကုန်ကြမ်းရောင်းတဲ့နိုင်ငံကနေ
ကုန်ချောထုတ်လုပ်တဲ့နိုင်ငံဖြစ်လာခဲ့ရင်
ပညာရှင်တွေ ထွက်သွားပေမယ့်
ဘရိမ်းကိန်း ( Brain Gain )ပါလို့ဆိုနိုင်ပါတယ်။
အရေးကြီးတာက
ထွက်သွားတဲ့ပညာရှင်တွေအားလုံးဟာ
လိပ်တွေဖြစ်ဖို့သာလိုပါတယ်။
ကိုယ့်အတွက်သာကိုယ်ကြည့်ရင်တော့ လိပ်သေးသေးလေးပေါ့။
ကိုယ့်မိသားစုအတွက်သာကြည့်ရင်တော့ လိပ်အကောင်ကပိုကြီးလာတဲ့သဘောပေါ့။
ကိုယ့်နိုင်ငံနဲ့ကိုယ့်လူမျိုးအတွက်လည်းကြည့်တတ်ရင်တော့ လိပ်အကောင်ပိုကြီးပြီပေါ့။
ထင်ရှားတဲ့သာဓကပြရရင်တော့
တရုပ်ပြည်ကြီးဟာ ဒီလိုနည်းနဲ့တိုးတက်လာခဲ့တာပါ။
ပြည်ပရောက်တရုပ်တွေကြောင့် တရုပ်ပြည်ကြီးအရှိန်အဟုန်နဲ့တိုးတက်လာတာကို
ဘယ်သူမှ မငြင်းနိုင်ပါဘူး။
မြန်မာပြည်လည်း အရှိန်အဟုန်နဲ့တိုးတက်လာပါစေ။
No comments:
Post a Comment